Génesis 48 - Mam Huehuetenango New Ortography

Kub' ky'iwla'n Efraín ex Manasés tu'n Jacob

1Te tib'ajxi jlu, pon tqanil tuk'il José, otoq yab't tman. Xi'tzun José tuk'il ex xi ti'n Manasés ex Efraín, aqeju kab'e tky'ajal.

2Tej tb'inte Jacob otoq tzul José aju tky'ajal lolte te, jaw tipuman tib', kub' qe' twi twatb'il,

3ex xi tma'n te José kyja': Aju Dios at tipumal tu'n tb'ant tkyaqil tu'n kub' tyek'un tib' nwitze tuj tnam Luz tuj tx'otx' Canaán, ex kub' ky'iwla'n qine tu'n.

4Tzaj tma'n weye kyja': Wu'ne kchmetel nim tb'aja ex nim tiyjila. Ti'ja che elel nimku k'loj xjal. Kxel nq'o'ne tx'otx' lu kye tiyjila che ul itz'j te tib'ajxi, ex k'okel te kye te jumajx, chi Dios.

5Atzun ja'lo, weye Efraín ex Manasés, aqeju kab'e tky'ajala e ul itz'j tzalu tuj Egipto tej na'nxtoq wule tuk'ila tuj tx'otx' lu. Weye qe jlu ik tza'n Rubén ex Simeón.

6Atzun qe tk'wa'la che ul itz'j kyib'ajxi qe jlu, atzun qe teya, ex noq tu'nju kyerman kyib' tuk'il Efraín ex Manasés at kyoklen ti'j etzb'il kyuk'il.

7Tej wajtze tuj Padan-aram kyaj kyim Raquel aju ttxu'ya tuj tx'otx' Canaán, tej ch'ixtoq nkanune tuj Efrata, ex ku'x nmaqu'ne tuj tb'eyil Efrata, aju ax juntl tb'i Belén, chi Jacob.

8Til Israel qe tky'ajal José ex xi tqanin te kyja':

—¿Alkye qe jlu? Chi Israel.

9Xi ttzaq'we'n José te tman:

—Atzun qe nky'ajale o che tzaj tq'o'n Dios tzalu, chi José.

Xitzun tma'n tman te kyja':

—Che tlaq'b'antza qe nwitze tu'ntzun kykub' nky'iwla'ne, chi tman.

10Myaxix b'a'ntoq tb'aq' twitz Israel tu'nju otoq tijin. Tu'ntzun jlu minti'xix in tiltoq. E je'x tlaq'b'a'n José qe tky'ajal twitz tman; atzun te e tzaj tchle'n, el ttz'ub'an kywitz,

11ex xi tma'n te José kyja':

—Minti'toq ximan wu'ne tu'n twile twitza; atzunte Dios o tzaj tq'o'n amb'il weye tu'n twile kywitz qe tk'wa'la, chi Israel.

12E je'l ti'n José qe tky'ajal kywi tch'ek tman, kub' mok'e' ex pon takl tib'aj twitz max twitz tx'otx'.

13E tzajtzun ti'n qe kab'e tky'ajal, ate Efraín tuj tb'anq'ab', ex ate Manasés tuj tnayaj, ex e pon tlaq'b'a'n twitz tman. Kyja'tzun kyaj ten Efraín tuj tnayaj Israel ex Manasés tuj tb'anq'ab'.

14Tejtzun kyxi tnuqpi'n Israel qe tq'ab' kyib'aj, aj tq'o'n tb'anq'ab' tib'aj twi Efraín aju tz'inb'aj; atzun tnayaj tib'aj twi Manasés, maske atoq tzikb'aj.

15Kub'tzun ky'iwla'n José tu'n Jacob, ex chi kyja':

Aju Dios o niman nchmane Abraham ex nmane Isaac te, aju Dios kwentin qine tu'n atxix tej wul itz'je ex kukx ja'lo,

16aju anjel in chin klete tu'n tuj nimku mya b'a'n, awt ky'iwlante kye ku'xun lu, ex kukxwit tzaj na'n nb'iye kyi'j qe ku'xun lu, tuk'ix tb'i Abraham aju nchmane, ex tb'i Isaac aju nmane. Chmet-xwit nim kyiyjil twitz tx'otx', chi Jacob.

17Mya b'a'n e'la tuj twitz José tu'nju kub' tq'o'n tman tb'anq'ab' tib'aj twi Efraín. Tu'ntzun jlu tzaj ttzyu'n José tq'ab' tman, tu'n tel ti'n tib'aj twi Efraín ex tu'n tkub' tq'o'n tib'aj twi Manasés,

18ex xi tma'n te tman kyja':

—Mi'n, tat. Mik'x ttenju. Ate Manasés tzikb'aj. Atzun q'onka tb'anq'ab'a tib'aj twi', chi José.

19Atzunte tman minti' o tkuya ex xi tma'n te kyja':

—B'a'n wu'ne, nky'ajal. B'a'n wu'ne. Ax ikx te ku'xun lu k'okel te jun k'loj xjal nim toklen. Atzunte tz'inb'aj mas toklen ktel twitz tzikb'aj, ex che okel qe tiyjil te nimku k'loj xjal, chi tman José.

20Tujxtzun q'ij lu e b'aj tky'iwla'n qe kab'e ku'xun lu ex tma kyja':

—K'ajb'el kyb'iye kyu'n aj Israel te jun ky'iwb'il, ex ok kyma': Awt Dios ky'iwlante kyeye ik tza'n tb'incha kyi'j aj Efraín ex aj Manasés, che chilo, chi Israel.

Kyja'tzun xi tq'o'n Israel mas toklen Efraín twitz Manasés.

21Xi tma'n Israel te José kyja':

—Weye chin kymele; atzunte Dios ktel kyuk'ile ex che ajele tu'n tuj kytx'otx' qe kyxe'chele.

22O txi nq'o'ne mas nim tx'otx' teya kywitz qe termaniya, aju el wi'ne kye aj Amorreo tej nq'ojine kyi'j tu'n nspadiye ex tuk'ix xob'l npleche, chi Israel.