Jeremías 7 - Mam Huehuetenango New Ortography

In pakb'an Jeremías tuj tja Dios

1Tzajtzun yolin Qman tuk'il Jeremías ex tma kyja':

2Tenkuya ttzi ja te k'ulb'il ex atzun chik'b'anxa tqanil lu: Kykyaqile aqeye aj Judá in che oktze ttzi ja lu tu'n kyk'ulune te Qman, kyb'intze tqanil lu

3tu'n Qman aju Tajaw Tkyaqil, aju Kydios aj Israel: Kych'expume kyb'inchb'ene ex kyb'inchame b'a'n, tu'ntzun kukx tu'n kyanq'intle twitz tx'otx' lu.

4Mi'n tz'ok qe' kyk'u'je kyi'j qeju in che kub' sb'unte kyeye ex in kyma'n: Lu tja Qman lu, lu tja Qman lu, lu tja Qman lu.

5Qa ax tok ma ch'expet kymodiye ex kyb'inchb'ene, qa ma che oke tz'aqlxix jun tuk'il juntl,

6qa mi ma che ok tene yajlal kye stranjer xjal, ex qe k'wa'l minti' kyman ex kytxu', ex qe meb'a xu'j, ex qa mi'n ma kub' kyb'yo'ne qe xjal minti' kyil tuj lugar lu, ex qa mi'n ma che k'ulune kywitz junxitl dios aju ktzajel mya b'a'n kyib'aje tu'n kylaj,

7oktzun che kyjel nq'o'ne tu'n kukx kyanq'intle twitz tx'otx' lu, aju xi nq'o'ne kye qtzan kyxe'chele te jumajx.

8Nim in qe' kyk'u'je kyi'j qe yol te sb'ub'l, aqeju minti' kyajb'en.

9In che elq'ane, in che b'yone xjal, in kyb'incha'ne aj pajil, in xi kyma'ne jun yol ax tok twitz Qman ex noq tten kyu'ne, in kub' kypatune storak twitz Baal, ex in che k'ulune kywitz junxitl dios minti' ojtzqin kyu'ne,

10ex te tib'ajxi in che ule tuj njaye lu, aju o'kx at tajb'en te k'ulb'il weye, ex in kyma'ne: Minti' b'is qi'je, b'a'n tu'n qb'inchanteye noq alkye qajb'ile.

11¿Apetzun tajb'en njaye te tja eleq' tuj kywitze? Ma wile tkyaqilju in kyb'incha'ne. Aqine Dios in chin q'mante jlu.

12Kyxi'ye tuj Silo, aju tnejel lugar jaw nsk'o'ne tu'n ttzaj na'n nb'iye tuj, b'ixtzun kyile ti o b'aj ti'j wu'ne tu'n tlaj kyb'inchb'en aj Israel mya b'a'n, aqeju etzan wu'ne.

13Chi Qman in tma'n: Maske ela'xi maj txi nma'ne kyeye ti'j kytene mya b'a'n, pero minti' in chinx kynimane; in chin txokone kyi'je, ex minti'x in chin tzaj kytzaq'we'ne.

14Kyja'tzun, aju o b'ant wu'ne ti'j lugar Silo, axtzun kb'antel wu'ne ti'j ju ja lu, aju pa'nmaj o'kx tu'n tajb'en te k'ulb'il weye, aju xi nq'o'ne kyeye ex kye qe kyxe'chele, ex aju q'uql kyk'u'je ti'j.

15Che ik'el nlajo'ne nwitze ik tza'n e jik' nlajo'ne qe kyermaniye, qe tiyjil Efraín.

El kypa'n kyib' aj Israel ti'j Dios.

16Chi Qman tzaj tma'n te Jeremías: Mi'n na'na Dios ti'j tnam lu, mi'n kub'sana nwitze ex mi'n tzaj yolina weye kyi'j. Mi'n kukx tzaj tqanina weye, ex mlay tzaj nb'i'ntle.

17¿Minti'petzun nno'k tke'yina aju in kyb'incha'n aj Judá kyuj kytanmi ex kyuj cay te Jerusalén?

18Qe kyk'wa'l in che chmon si', qe mamb'aj in kub' kyq'o'n q'aq' ex qe xu'j in che xyoq'in tq'otjil pan, tu'n t-xi kyq'o'n pan te kydios aju tok tb'i “Xu'j Rey te Tuj Kya'j”, ex in xi kyq'o'n vin te oyaj kye junxitl dios, noq tu'n ttzaj nq'oje kyi'j.

19Baqa wi'je in kyb'incha'n mya b'a'n, kyi'jx in kyb'incha'n mya b'a'n lu, kyu'nx in kub' kyq'o'n kych'ixwi. Aqine Dios in chin q'mante jlu.

20Tu'ntzun jlu tzul nim ntx'u'jile ti'j lugar lu ex kyib'aj qe xjal, ax ikx kyi'j qe alumaj, kyi'j qe tze' ate' tuj kojb'il ex ti'j awal. Ik k'okel nq'oje ik tza'n jun q'aq' mlay yupj. Aqine Dios in chin q'mante jlu.

21Ate Qman aju Tajaw Tkyaqil, aju Kydios aj Israel in tma'n kyja': Kypatun kub'e noq jte'x alumaj kyaje ex noq jte'x chojb'il, ex kychyo'nxe kychib'jal.

22Tej kyetz wi'ne qe kyxe'chele tuj Egipto minti' xi nma'ne kye tu'n tkub' kypatun alumaj tib'aj altar, ex mi tu'n ttzaj kyq'o'n chojb'il weye.

23Aju weye xi nma'ne kye, tu'n tb'ant kyniman weye tu'ntzun woke te Kydios, atzun kye tu'n kyok te jun tnam etzan wu'ne. Ax ikx xi nma'ne kye tu'n tjapun kyu'n aju xi nma'ne, tu'ntzun tel b'a'n te kye.

24Ex minti' e niman weye ex minti' tzaj kyq'o'n kywi' ti'j nyole. Noq o'kx o kyb'incha mya b'a'n tu'nju puro kyuw kyanmi. Minti' e ajtz meltz'aj wuk'ile, noq ttzal kyi'j ajtz kyq'o'n nwitze.

25Atxix tej kyetz qe kyxe'chele tuj Egipto, ax ikx ja'lo, kukx ma che tzaj nsama'ne qe nmajene kyuk'il, aqeju nsanjele.

26Atzun kye minti' ma chinx kyniman ex minti' ma tzaj kyq'o'n kywi' ti'j nyole, noq o'kx ma kub' kykyuwsa'n kyanmi, mas nim mya b'a'n ma kyb'incha ik tza'n kyb'incha qtzan kyxe'chel.

27Q'manxa tkyaqil jlu kye maske mi'n tzaj kyq'o'n kywi' ti'ja; che txkontza maske mi'n tzaj tzaq'we'na kyu'n.

28Q'manxa kye: Atzun qe xjal lu mib'an che niman te Qman aju Kydios, ex mi'n kyaj tu'n kykawinjtz. Te jumajx ma tzik' tna'l kyu'n tu'n kyyolin ax tok.

In che k'ulun aj Israel kywitz qe tilb'ilal

29Aqeye aj Jerusalén, kymatzo'n el ttzmal kywi'ye ex kyxo'mixe. Kyb'itzanxe jun b'itz b'isb'ajil kywi' qe tal witz tz'la'j kyi'j, porke in q'ojl Qman kyi'je, ma che kyaj koline ex ma che el ik'une tu'n.

30Chi Qman in tma'n: Ma kyb'incha aj Judá mya b'a'n nwitze, ma tz'okx kyq'o'n qe tilb'ilal txqantl dios puro ik'b'il qe tuj ja o'kx at tu'n tajb'en te k'ulb'il weye, ex ma tz'ok kyq'o'n njaye xjan te minti' tajb'en.

31Ma jaw kyb'incha'n jun altar Tofet tb'i tuj chq'ajlaj Ben-hinom, tu'n tkub' kypatun qe tal kyky'ajal ex qe tal kyme'jel; a jlu minti' o txi nma'ne kye tu'n tb'ant kyu'n ex minti'lpe ul tuj nximb'etze ikju.

32Kyja'tzun chi Qman: Tzul tq'ijlalil tu'n mi'ntl tok q'ma'n Tofet tb'i ju lugar lu ex mi lugar Ben-hinom, noq o'kx Chq'ajlaj te B'iyb'il k'okel tb'i. Ex ax tuj lugar Tofet che b'elex maqut qe kyimni tu'n tlaj minti' juntl lugar.

33Aju kyximlal qe kyimni lu k'ajb'el te kychi' k'utz ex te kychi' txkup, ex mi a'l jun kxel sek'punte kye ti'j kychi'.

34B'i'x che b'el naj qe b'itz te ik'sb'il q'ij wu'ne kyuj qe tnam ate' tuj Judá ex kyuj qe cay te Jerusalén, kyuk'ix qe b'itz te tzalajb'il ex qe b'itz te casamyent; enter tnam kyjel ten mer ik tza'n jun tzqij tx'otx' minti' xjal tuj.