1Tujx q'ij lu etz Jesús tuja ex kub' qe' ttzi laguna.
2Ex pon kychmon kyib' nim xjal tuk'il; jaxtzun Jesús tuj barc ex kub' qe', atzun kykyaqil xjal ate' ttzi a'.
3Ex xi tma'n Jesús nimku yol kye xjal tuj techal ex tma:
—At jun xjal xi' awal triw.
4Ex tej t-xi tchitun iyaj, kub' tz'aq ch'in iyaj tuj b'e; e ul qe chyu'j ex jaw kywa'n.
5Ch'intl iyaj kub' tz'aq kyxol ab'j jatum mya nim tpimil tx'otx', ex jurat naj tzaj poq'l, porke mya nim tpimil tx'otx',
6ex tej tmeq't q'ij o tz'e'y, ex b'i'x tzqij tu'nju mya nim tlok'.
7Ch'intl iyaj kub' tz'aq kyxol ch'i'x k'ul; tejtzun tch'iy ch'i'x k'ul, o xk'ost triw tu'n.
8Ex ch'intl iyaj kub' tz'aq tuj tb'anil tx'otx', ex ok twitz, at ok jun syent twitz, ex at ok 60 twitz, ex at ok 30 twitz ti'j jun tqan.
9Alkye at t-ẍkyin, b'inx ju yol lu, chi Jesús kye.
Aju tnab'l techal Marcos 4.10-12; Lucas 8.9-1010E ultzun laq'e' qe t-xnaq'tzb'en Jesús ttxlaj, ex xi kyqanin te:
—¿Tiqu'n in yolina kyuk'il xjal tuj techal?
11Xi ttzaq'we'n Jesús:
—Te kyeye ma tzaj tq'o'n Dios tu'n tel kynik'e ti'j ju yol ewantoq nej ti'j kawb'il in tzaj tuj kya'j; atzun kye xjal mya q'o'n tu'n tel kynik' ti'j.
12Porke aju xjal at ch'in te, kxel q'o'n txqantl te tu'ntzun tten mas nim te; ex aju xjal minti' te, aju ch'in at te k'elel q'i'n.
13Kyja'tzun in chin yoline kye tuj techal; porke nno'k kyke'yin ex minti' in kyil; in che b'in ti'j ex minti' in kyb'i'n ex minti' nne'l kynik' ti'j.
14Kyja'tzun tten ma japun kyi'j aju yol kyaj tma'n Isaías aju t-sanjel Dios. Chi Isaías:
Kukx in kyb'i'ne, ex minti' nne'l kynik'e ti'j; ex kukx nno'k kyke'yine, ex minti' in kyile.
15Porke aju kyanmi xjal lu ma kyuwix, minti' in xi kyb'i'n tu'n kyẍkyin ex ma kub' kymaltz'u'n kywitz; tu'ntzun mi'n kylonte tu'n kywitz, ex tu'n mi'n kyb'inte tu'n kyẍkyin, ex tu'n mi'n tel kynik' ti'j tuj kyanmi, ex tu'n mi'n kyajtz meltz'aj tu'n kyb'anix wu'ne, chi Isaías.
16Atzun kyeye at tzalajb'il kyeye, porke in kyile tu'n kywitze, ex in kyb'i'ne tu'n kyẍkyine.
17Ex ax tok kxel nma'ne kyeye, nimku t-sanjel Dios kyuk'ix qe xjal tz'aqlxix o kyajb'e tu'n kylonte aju in kyile, ex minti' o kyil; ex o kyajb'e tu'n kyb'inte aju in kyb'i'ne, ex minti' o kyb'i.
In tchik'b'a'n Jesús ju techal ti'j ju xjal xi' awal Marcos 4.13-20; Lucas 8.11-1518Kyb'intztzune ti in tma'n ju techal ti'j xjal xi' awal.
19Jun xjal in tb'i'n aju yol ti'j tkawb'il Dios ex minti' nne'l tnik' ti'j, nnu'ltzun tajaw il, in jatz ti'n ju yol otoq ku'x awa'n tuj tanmi xjal. Aju xjal lu ik tten ik tza'n b'e jatum kub' tz'aq iyaj.
20Ex aju xjal in xi tb'i'n ju yol, ex jurat naj in xi toksla'n tuk'il tzalajb'il, aju xjal lu ik tten tza'n qe ab'j jatum kub' tz'aq iyaj;
21ex tu'nju minti' tlok' iyaj, noq kab'e q'ij in kyaj ten. Ikxtzun tten xjal ju. Ok in tzaj jun yajb'il te ex ok tel ik'un kyu'n xjal tu'n tlaj tyol Dios, jurat in kub' tz'aq.
22Ex juntl xjal ik tten ik tza'n ju tx'otx' at ch'i'x k'ul tuj, in xi tb'i'n tyol Dios, ex in b'aj tk'u'j ti'j nimku tuj tq'ijlalil ja'lo ex in sb'unjtz tu'n q'inumab'l; kyja'tzun nne'l tipun tyol Dios tuj tanmi xjal ex minti' in witzan.
23Atzun juntl xjal ik tten ik tza'n tb'anil tx'otx' jatum kub' tz'aq iyaj, in xi tb'i'n ju yol ex nne'l tnik' ti'j, ex nno'k twitz iyaj tuj. At junjun nno'k jun syent twitz, ex at junjun nno'k 60 twitz, ex at junjun nno'k 30 twitz ti'j jun tqan, chi Jesús.
Aju techal ti'j ch'im k'ul t-xol triw24Xi tma'n Jesús juntl techal kye, chi kyja':
—Aju kawb'il in tzaj tuj kya'j ik tten ik tza'n jun xjal ku'x tawa'n tb'anil iyaj tuj tkojb'il.
25Ex te qonik'an in che tantoq xjal, ul jun xjal at tq'oj ti'j, ku'x tawa'n tiyjil ch'im k'ul t-xol triw, ex ajtzun.
26Tej tjawil poq'l triw ex tej tok twitz, ax ikx te ch'im k'ul tzaj poq'l.
27E ultzun qe tmajen xjal, xi kyma'n te: Tat, ¿myapetzun tb'anil iyaj ku'x tawa'na tuj tkojb'ila? ¿Tza'ntzun tten ma tzaj poq'l ch'im k'ul t-xol triw? Che chi.
28Xi tma'n ju tajaw awal kye: Tu'n jun xjal at tq'oj wi'je ma tb'incha jlu. Xitzun kyma'n qe majen te: ¿Tajpeya tu'n qxi'ye ex tu'n tjaw qb'aqo'ne ch'im k'ul?
29Mi'n, chi te xjal xi tma'n kye, ex ok tjatz kyb'aqo'ne ch'im k'ul, mya yajku tuk'ix triw kjawitz kyb'aqo'ne.
30E tten, junx e ttzaj ch'iy tuk'il triw, maxi kjawil b'aqet ok tjaw triw. Oktzun tpon tq'ijlalil tu'n tjaw triw, maxitzun kxel nma'ne kye majen: Nej kychmo'nktze ch'im k'ul, ex kyk'alome junjun che'l tten tu'n tokx tuj q'aq'; atzunte triw kychmo'nktze tu'n tokx tuj ntx'utx'e, chi tajaw awal.
Aju techal ti'j twitz mostazaMarcos 4.30-32; Lucas 13.18-1931Xi tma'n Jesús juntl techal kye. Chi kyja':
—Aju kawb'il in tzaj tuj kya'j ik tten ik tza'n jun twitz mostaza tzaj ti'n jun xjal ex ku'x tawa'n tuj tkojb'il.
32Aju twitz mostaza mas tal ch'inxix twitz tkyaqil iyaj; oktzun tch'iy, mas in ch'iy twa'l kywitz txqantl tal awal tuj pe'n, ex nno'k ik tza'n jun tze', kyja'tzun in che ul qe chyu'j ex in b'ant kyq'u' t-xol tq'ab'.
Aju techal ti'j t-samel pan Lucas 13.20-2133At juntl techal xi tma'n Jesús kye. Chi kyja':
—Aju kawb'il in tzaj tuj kya'j ik tten ik tza'n ch'in t-samel pan tzaj ti'n jun xu'j tu'n tjaw mal tk'u'j pan, xi t-smo'n tuj ox malb'il arin, ex jawtzun mal tkyaqil tq'otjil pan tu'n.
Alkye kyajb'en qe techal in tma'n Jesús Marcos 4.33-3434Tkyaqil jlu xi tma'n Jesús kye xjal tuj techal, ex minti' o yolin kyuk'il myawt tuj techal,
35tu'ntzun tjapun aju o q'manjtz tu'n t-sanjel Dios, chi kyja':
Ok chin yolile tuj techal; kxel nchik'b'a'ne aju ewan atxix tb'antlen twitz tx'otx', chi t-sanjel Dios.
In tchik'b'a'n Jesús techal ti'j ch'im k'ul t-xol triw36B'ajtzun tq'olb'en tib' Jesús kyuk'il xjal, okx tuja, e pontzun laq'e' qe t-xnaq'tzb'en ttxlaj ex xi kyma'n te:
—Chik'b'antza qeye aju techal ti'j ch'im k'ul tuj kojb'il, che chi.
37Xi ttzaq'we'n Jesús:
—Aju in ku'x awante tb'anil iyaj, atzun qine sk'o'maj qine tu'n Dios tu'n ntene kyuk'il xjal.
38Aju kojb'il, atzun tkyaqil twitz tx'otx'. Aju tb'anil iyaj, atzun qeju at kyoklen tuj tkawb'il Dios, atzunju ch'im k'ul, atzun qeju tk'wa'l tajaw il.
39Aju aj q'oj ku'x awante ch'im k'ul, atzun tajaw il. Aju tu'n tjaw chmet twitz triw, atzun in yolin ti'j mankb'il tq'ijlalil, ex qe majen in jaw kychmo'n twitz triw, atzun qe anjel.
40Kyja'tzun, ik tza'n in jaw b'aqet ch'im k'ul ex nno'kx q'ot tuj q'aq', ikxtzun kb'ajel tuj mankb'il tq'ijlalil.
41Aqine sk'o'maj qine tu'n Dios tu'n ntene kyuk'il xjal, che tzajel nsama'ne qe n-anjele, ex k'elex kyi'n tuj nkawb'ile kykyaqil qeju in che kub' tz'aq xjal tuj il kyu'n, kyuk'ix qeju in kyb'incha'n mya b'a'n.
42Ex che okex q'o'n tuj jorni in k'ant tu'n q'aq'; atzun ktzajel oq'el ex kqitx'itx'il t-xe kye' xjal.
43Atzun qe tz'aqlxix che qoptz'ajel ik tza'n tqan q'ij tuj tkawb'il Kyman. Alkye at t-ẍkyin, b'inx ju yol lu.
Aju techal ti'j jun q'inumab'l ewantoq44Aju kawb'il in tzaj tuj kya'j ik tten ik tza'n jun q'inumab'l ewan tuj jun kojb'il o knet tu'n jun xjal ex ku'x tewan juntl maj, ex o tzalajxix ti'j; xi'tzun ex xi tk'ayin tkyaqilju at te, ex laq'et ju kojb'il tu'n, jatum ewan ju q'inumab'l.
Aju techal ti'j jun perla wi'yilxix45Ax ikx aju kawb'il in tzaj tuj kya'j ik tten ik tza'n jun comersyant in jyon ti'j tb'anil perla;
46tejtzun tknet jun perla wi'yilxix tu'n, xi'tzun ex xi tk'ayin tkyaqilju at te, ex laq'et ju perla tu'n.
Aju techal ti'j xyub' te tzuyb'il kyiẍ47Ax ikx aju kawb'il in tzaj tuj kya'j ik tten ik tza'n jun xyub' te tzuyb'il kyiẍ; ok in ku'x q'ot tuj mar in che tzyet kykyaqil txkaj kyiẍ tu'n.
48Oktzun tnoj xyub', in jatz q'i'n kyu'n xjal ttzi a'; in che kub' qe' xjal ti'j, in jatz kysk'o'n qeju b'a'n ex in ku'x kyq'o'n tuj chi'l, atzunju mya b'a'n nne'x kyxo'n.
49Iktzun kb'ajel tuj mankb'il tq'ijlalil; che tzajel qe anjel ex k'elel kypa'n qeju mya b'a'n kyxol qeju tz'aqlxix,
50ex che okex q'o'n qe mya b'a'n tuj jorni in k'ant tu'n q'aq'; atzun ktzajel oq'el ex kqitx'itx'il t-xe kye' xjal, chi Jesús kye.
Aju q'inumab'l ak'aj ex aju te ojtxi51Xitzun tqanin Jesús kye t-xnaq'tzb'en:
—¿Mape tz'el kynik'e ti'j tkyaqil jlu?
Xi kytzaq'we'n t-xnaq'tzb'en:
—Ma tz'el qnik'e ti'j, Tat.
52Xitzun tma'n Jesús kye:
—Kyja'tzun tten jun xnaq'tzal ti'j ley qa ma tz'ok te xnaq'tzb'en ti'j kawb'il in tzaj tuj kya'j, ik tten ik tza'n jun tajaw ja in jaw t-sk'o'n ti'xti ak'aj ex qa te ojtxi jatum chmo'n tq'inumab'l.
Tej tpon Jesús tuj tnam Nazaret Marcos 6.1-6; Lucas 4.16-3053Tejtzun tb'aj tma'n Jesús qe techal lu, ik'tzun tuj lugar lu,
54ex pon tuj ttanmi, xi tq'o'n xnaq'tzb'il kye xjal tuj ja te kyk'ulb'il; kyja'tzun e lab'in xjal ti'j, ex in kyma'n:
—¿Jatum in tzaj tnab'l xjal lu? ¿Ex tza'n tten in che b'ant qe b'inchb'en nim kyipumal tu'n?
55¿Myapetzun tky'ajal calpinter jlu? ¿Myapetzun Mariy tb'i ttxu'? ¿Ex myapetzun Jacobo tb'i jun titz'in, ex juntl José tb'i, ex juntl Simón tb'i, ex juntl Judas tb'i?
56¿Ex myapetzun kykyaqil tanb' ate' quk'il? ¿Tza'ntzun tten in b'ant tkyaqil jlu tu'n? Che chi xjal.
57Kyja'tzun mya b'a'n ela tyol Jesús tuj kywitz. Ex xi tma'n Jesús kye:
—Qe t-sanjel Dios at nimb'il kye tuj tkyaqil lugar. O'kx tuj kytanmi ex tuj kyja minti' nimb'il kye.
58Kyja'tzun mya nim b'inchb'en nim tipumal b'ant tu'n Jesús tuj ttanmi, tu'n tlaj minti' xi kyoksla'n xjal.
Who We AreWhat We EelieveWhat We Do
2025 by iamachristian.org,Inc All rights reserved.
