1Xitzun ttzaq'we'n Elifaz aju aj Temán ex tma:
2¿Chipetzuna qa tu'nju at nimxix tnab'l xjal at tajb'en te Dios?
3¿Ti tajb'en te Dios aju at tipumal tu'n tb'ant tkyaqil tu'n qa aya puro tz'aqlxix ex minti' tpaltila?
4Qa ma kub' kawina tu'n Dios ex qa ma kub' tcastiwoya tu'n, a jlu mya tu'nju in ajb'ena te tuj tumelxix,
5noq o'kx tu'nju at nimxix mya b'a'n ma tb'inchaya ex nimxix tila minti' b'ajsb'il te.
6El tqanina prent kye termaniya ex mya iltoq ti'j; el ti'na kyxb'alun tok kyi'j ex e kyaj tq'o'na sb'iql kyi'j.
7Tej in che txqet minti' xi tq'o'na kyk'a a'; tej ttzaj we'yaj kyi'j minti' xi tq'o'na kywa.
8Tu'nju at tipuna ex xo'na kyu'n xjal, ok tq'on tib'a te tajaw kytx'otx'.
9Minti' xi tq'o'na alkye at tajb'en kye meb'a xu'j, ex e b'aj tyajla'na qe k'wa'l minti' kyman ex kytxu'.
10Kyja'tzun txolin ti'ja ja'lo tu'n xob'ajil, ex minab'en ma tzaj nim xob'ajil ti'ja.
11Tkyaqil qlolj ta', mi jun ti'xti in tila; nib'an taj mulq'aja tjaq' nintz a'.
12Ate Dios tokx tib'ajxi kya'j ex in ku'tz tke'yin qe che'w mas najchaq kyjax.
13¿Tza'ntzun tten in tma'na minti' tok tkwent Dios ti'j aju in b'ant kyu'n xjal, ex minti' tumel tu'n tkawin kyi'j tu'n tlaj minti' in til tu'n tlaj q'eq muj?
14Maqo'n twitz tu'n muj ex minti' in til, o'kx in b'et twitz kya'j, in tzaj tuj jun plaj ex in pon tuj juntl plaj, chiya.
15¿Tajpeya tu'n tb'eta tuj ojtxi b'e, aju o che b'et qe xjal mya b'a'n tuj?
16Aqeju jurat naj e kyim, e je'x iqan tu'n nima otoq ch'iy.
17Che chi te Dios: Pa'nmil tib'a qi'je. ¿Ti jaku tb'incha Dios qi'j, aju Dios at tipumal tu'n tb'ant tkyaqil tu'n? Che chi.
18(Maske tu'n Dios otoq noj kyja tu'nju nimku at kye. Miwt pon nximb'etze ik tza'n kye qe xjal mya b'a'n.)
19Tej kyke'yinte qe tz'aqlxix jlu, e tzalaj ti'j; ex qeju minti' kyil xi kytze'n, che chi kyja':
20Ma b'aj tz'e'y tu'n q'aq' kyq'inumab'l qe xjal mya b'a'n.
21B'incham ttena tuk'il Dios, tu'ntzun ttena juntl maj tuj txub'txaj.
22Q'onxa amb'il tu'n ttzaj xnaq'tza'na tu'n, awanku'xa tyol tuj tanmiya.
23Qa ma tz'ajtz meltz'aja tuk'il Dios aju at tipumal tu'n tb'ant tkyaqil tu'n, ktela b'a'n ik tza'n nej; qa ma tz'ex ti'na ju mya b'a'n at tuj tjaya,
24ex qa ma tz'ok tq'o'na q'an pwaq aju wi'yilxix mer ik tza'n quq ex ik tza'n noq alkyexku ab'j at tuj tq'ab' xaq,
25kyja'tzun tten ate Dios k'okel te teya ik tza'n q'an pwaq ex ik tza'n saq pwaq nimxix.
26Ktzalajela tu'n ex jaku yolina tuk'il minti' t-xob'ila.
27Qa ma kub'sana twitz, jaku tzaj b'i'na tu'n ex kjapunel tu'na aju otoq txi ttziyana te.
28B'a'n k'elel tkyaqil aju tajb'ila tu'n tb'ant; ktel spik'un tuj tb'eya.
29Porke nno'k te ch'in toklen tu'n Dios aju xjal in jaw tniman tib', atzunte xjal mans in klet tu'n.
30Ok kletela tu'n qa minti' tila, qa saq ta' tuj tanmiya.
Who We AreWhat We EelieveWhat We Do
2025 by iamachristian.org,Inc All rights reserved.
