Ezequiel 48 - Mam Huehuetenango New Ortography

Ok tkub' sipet tx'otx' kyxol kyiyjil aj Israel

1Atzun list lu kyi'j kab'laj k'loj kyiyjil aj Israel.

Aju tmojonil kytx'otx' tuj tumlal tb'anq'ab' q'ij ktzajel qe' ti'j Nintz Mar, k'ik'el tuj b'e in xi' tuj tnam Hetlón, k'ik'el twitz tnam Hamat ex twitz tnam Hazar-enan, k'ik'el tjaq' tx'otx' te Damasco ex Hamat, atzun kye aj Dan kytx'otx', kxel qe' tuj mojon tuj tumlal tjawitz q'ij ex kpol b'aj tuj mojon tuj telex q'ij.

2Aju kytx'otx' aj Aser tmojonin tib' tuk'il kye aj Dan, ktzajel qe' ti'j mojon tuj tjawitz q'ij, kpol b'aj ti'j Nintz Mar.

3Aju kytx'otx' aj Neftalí tmojonin tib' tuk'il kye aj Aser, ktzajel qe' ti'j mojón tuj tjawitz q'ij, kpol b'aj ti'j Nintz Mar.

4Aju kytx'otx' aj Manasés tmojonin tib' tuk'il kye aj Neftalí, ktzajel qe' ti'j mojón tuj tjawitz q'ij, kpol b'aj ti'j Nintz Mar.

5Aju kytx'otx' aj Efraín tmojonin tib' tuk'il kye aj Manasés, ktzajel qe' ti'j mojon tuj tjawitz q'ij, kpol b'aj ti'j Nintz Mar.

6Aju kytx'otx' aj Rubén tmojonin tib' tuk'il kye aj Efraín, ktzajel qe' ti'j mojon tuj tjawitz q'ij, kpol b'aj ti'j Nintz Mar.

7Aju kytx'otx' aj Judá tmojonin tib' tuk'il kye aj Rubén, ktzajel qe' ti'j mojón tuj tjawitz q'ij, kpol b'aj ti'j Nintz Mar.

8Aju tx'otx' pa'nmaj te Qman tmojonin tib' tuk'il kye aj Judá, ktzajel qe' ti'j mojon tuj tjawitz q'ij ex kpol b'aj ti'j Nintz Mar, kab'laj kilómetro tuk'il mey twitz, ex aju tnuqb'il ax ik tza'n echb'in kye tx'otx' pa'nmaj kye kab'laj k'loj kyiyjil aj Israel; tuj tmij tx'otx' lu kb'el ten tja Dios.

Aju tx'otx' pa'nmaj te Qman Ezequiel 45.1-6

9Aju tx'otx' pa'nmaj te Qman at kab'laj kilómetro tuk'il mey tnuqb'il ex jwe' kilómetro twitz.

10Tujtzun tx'otx' lu k'elel pa't jun piẍ tu'n tajb'en kye pal; aju tnuqb'il tuj tumlal tb'anq'ab' q'ij ex tuj tumlal tnayaj q'ij kab'laj kilómetro tuk'il mey, aju twitz tuj tjawitz q'ij ex tuj telex q'ij jwe' kilómetro. Tujtzun tmij tx'otx' lu kb'el ten tja Dios.

11Aju tx'otx' lu k'ajb'el kye pal pa'nmaj qe tu'n kyajb'en weye, aqeju tiyjil Sadoc, atzun qe e ajb'en weye ex japunxix kyu'n ex minti' el kypa'n kyib' wi'je ik tza'n kyb'incha txqantl aj Leví tej tel kypa'n kyib' aj Israel wi'je.

12Kyja'tzun tuj ju tx'otx' pa'nmaj te Qman k'elel pa't jun piẍ tx'otx' tu'n tajb'en kye pal, tmojonin tib' tuk'il kytx'otx' aj Leví, ex aju tx'otx' lu k'okel te xjan.

13Ax ttxlaj kytx'otx' pal kxel q'ot kytx'otx' aj Leví, te kab'laj kilómetro tuk'il mey tnuqb'il, ex jwe' kilómetro twitz. Aju tx'otx' pa'nmaj te Qman tu'n tkyaqil, at kab'laj kilómetro tuk'il mey tnuqb'il ex jwe' kilómetro twitz.

14Atzunju tx'otx' lu mas tb'anilxix tuj enter kytx'otx' aj Israel. Mlay txi k'ayit, mi tu'n tb'aj ch'expet ex mi tu'n t-xi q'ot te juntl xjal, porke aju tx'otx' lu xjansamaj te Qman.

15Aju ch'intl tx'otx' kyaj ten at kab'laj kilómetro tuk'il mey tnuqb'il ex kab'e kilómetro tuk'il mey twitz, a jlu mya xjansamaj. Tujtzun tx'otx' lu jaku b'ant tu'n kynajan qe xjal tuj, ex ktzajel ch'iy k'ul tuj te kywa alumaj. Ex tuj tmij kb'el ten tnam.

16Aju echb'in teju tnam lu, 2,250 metro junjun pak', te jawni, te kub'ni, te elni, ex te okni.

17Ti'jele tnam ktzajel ch'iy k'ul te kywa alumaj, te 125 metro junjun pak'.

18Ttxlaj ju tnam te okni at jun piẍ tx'otx' te jwe' kilómetro tnuqb'il, ax ikx ttxlaj te elni at juntl piẍ ax ikx te jwe' kilómetro tnuqb'il, ex kykab'il piẍ tx'otx' lu kymojonin kyib' tuk'il ju tx'otx' pa'nmaj te Qman. Tujtzun tx'otx' lu kb'elex awat awal, ex aju twitz k'okel, k'ajb'el te kywa qe xjal in che aq'nan tuj tnam.

19Aqeju in che aq'nan tuj tnam, noq alkyex k'loj tiyjil Israel, atzun qe che aq'nal tuj tx'otx' lu.

20Tkyaqilju tx'otx' pa'nmaj, aju xjansamaj te Qman, tuk'ix tx'otx' te tnam, junx echb'in te tnuqb'il tuk'il twitz, kab'laj kilómetro tuk'il mey junjun pak' ttxlaj.

Aju tx'otx' pa'nmaj te kawil Ezequiel 45.7-8

21-22Atzun te kawil ttx'otx', atzun aju tkyaj t-xol kytx'otx' aj Judá tuk'il kytx'otx' aj Benjamín: aqeju kab'e piẍ tkyaj tuj kykab'il pak' ju tx'otx' pa'nmaj te Qman ex ju tx'otx' te tnam. Aju echb'il te ttx'otx' ju kawil, kab'laj kilómetro tuk'il mey twitz, kxelx qe' ti'j ju tx'otx' pa'nmaj te Qman ex ju tx'otx' te tnam, kpol b'aj tuj ju mojón tkub' tuj tjawitz q'ij; juntl piẍ kxelx qe' ti'j ju tx'otx' pa'nmaj te Qman ex ju tx'otx' te tnam, kpol b'aj ti'j Nintz Mar. Ex tujtzun tmij tx'otx' lu kyjel ten ju tx'otx' pa'nmaj te Qman tuk'ix tja Dios, tuk'ix kytx'otx' aj Leví ex tuk'ix ju tx'otx' te tnam.

Aju kytx'otx' txqantl k'loj kyiyjil aj Israel

23Aju kytx'otx' txqantl k'loj kyiyjil aj Israel ik tten kyja': Aju kytx'otx' aj Benjamín ktzajel qe' ti'j mojón tuj tjawitz q'ij, kpol b'aj ti'j Nintz Mar.

24Aju kytx'otx' aj Simeón tmojonin tib' tuk'il kye aj Benjamín, ktzajel qe' ti'j mojón tuj tjawitz q'ij, kpol b'aj ti'j Nintz Mar.

25Aju kytx'otx' aj Isacar tmojonin tib' tuk'il kye aj Simeón, ktzajel qe' ti'j mojón tuj tjawitz q'ij, kpol b'aj ti'j Nintz Mar.

26Aju kytx'otx' aj Zabulón tmojonin tib' tuk'il kye aj Isacar, ktzajel qe' ti'j mojón tuj tjawitz q'ij, kpol b'aj ti'j Nintz Mar.

27Aju kytx'otx' aj Gad tmojonin tib' tuk'il kye aj Zabulón, ktzajel qe' ti'j mojón tuj tjawitz q'ij, kpol b'aj ti'j Nintz Mar.

28Aju mojón tuj tumlal tnayaj q'ij kxel qe' ti'j tnam Tamar, k'elex jatum ta' twi a' tuj Meriba-cades, ex k'elex ttzi'yile nima te Egipto, tu'n tpon b'aj ti'j Nintz Mar.

29Atzun tx'otx' lu ok kyk'ma' kab'laj k'loj kyiyjil aj Israel te kyetzb'il, ex kyja'tzun ktelb'a kyu'ne ok tkub' kysipane. Aqine Dios in chin q'mante jlu.

Qe tlamel tnam Jerusalén

30-34Aju tnam k'okel jun muro ti'j te 2,250 metro echb'in te teyle junjun ttxlaj tuj kykyajil pak'. Tuj junjun pak' ttxlaj muro kyjel ox tlamel, ex teyle junjun tlamel k'okel tb'i jun k'loj kyiyjil aj Israel ti'j. Atzun tx'olb'ab'en kye jlu: Qe tlamel kykub' tuj tumlal tb'anq'ab' q'ij, k'okel tb'i Rubén ti'j jun, atzun juntl k'okel tb'i Judá ti'j, ex atzun juntl k'okel tb'i Leví ti'j; qe tlamel kykub' tuj tumlal tjawitz q'ij, k'okel tb'i José ti'j jun, atzun juntl k'okel tb'i Benjamín ti'j, ex atzun juntl k'okel tb'i Dan ti'j; qe tlamel kykub' tuj tumlal tnayaj q'ij, k'okel tb'i Simeón ti'j jun, atzun juntl k'okel tb'i Isacar ti'j, ex atzun juntl k'okel tb'i Zabulón ti'j; qe tlamel kykub' tuj tumlal telex q'ij, k'okel tb'i Gad ti'j jun, atzun juntl k'okel tb'i Aser ti'j, ex atzun juntl k'okel tb'i Neftalí ti'j.

35Aju echb'in te muro ti'jele tnam, 9,000 metro tu'n tkyaqilx, ex aju tb'i tnam k'okel, atzun jlu: Ate Qman at tzalu.