1Atzun yol lu in tma'n Qman: Nimku mya b'a'n ma kyb'incha aj Moab, kyja'tzun mlay tzik'x ti'j wu'ne tu'n mi'n tkub' kycastiw, tu'nju kub' kypatun tb'aqil rey kye aj Edom tejxi tkub' tza'jix.
2Tu'n tlaj jlu k'okel nqoptz'i'ne q'aq' ti'j tx'otx' Moab ex che b'ajel tz'e'y qe tja rey tuj tnam Queriot, qe q'ojlel che sch'il wen tuj q'oj, tuk'ix chun in q'ajt kyu'n, ex che kymeltzun aj Moab kyu'n aj q'oj kyi'j.
3K'elel wi'ne kyrey aj Moab ex kymel wu'ne, kyuk'ix qeju at kyoklen ttxlaj, chi Qman.
4Atzun yol lu in tma'n Qman: Nimku mya b'a'n ma kyb'incha aj Judá, kyja'tzun mlay tzik'x ti'j wu'ne tu'n mi'n tkub' kycastiw, tu'nju minti' ma txi kyniman qe nxnaq'tzb'ile, aqine Kyman, ex minti' ma txi kyniman qe nleye, noq o'kx ma che el tzpet tu'nju in che k'ulun kywitz qe tilb'ilal, aqeju e k'ulun kyxe'chel kywitz.
5Tu'n tlaj jlu, k'okel nqoptz'i'ne q'aq' ti'j tx'otx' Judá, ex tu'n q'aq' lu che b'ajel tz'e'y qe tja rey jatum in kawin tuj Jerusalén.
Tzul castiw kyib'aj aj Israel6Atzun yol lu in tma'n Qman: Nimku mya b'a'n ma kyb'incha aj Israel, kyja'tzun mlay tzik'x ti'j wu'ne tu'n mi'n tkub' kycastiw, tu'nju in xi kyk'ayin aju xjal minti' til tu'n tlaj tk'as ex ju meb'a xjal in xi kyk'ayin noq tu'n jun moj xjab'.
7In che yajlan kyi'j qe xjal meb'a ex minti' in xi kyb'incha'n kyi'j qe xjal mans. Jun ku'xun tuk'il tman in che kub' tan tuk'il junx q'apoj, ex tu'ntzun jlu nno'k kyq'o'n nb'iye xjan te minti' tajb'en.
8Twitz noq alkyex altar in che kub' koẍe' tib'aj xb'alun otoq kyaj kyi'n te prent, ex tuj tja kydios in che'x k'al vin otoq tzaj kylaq'o'n tu'n kymult xjal.
9Atzun weye e b'aj naj aj Amorreo wu'ne kywitze, maske ma tij kywa'l ik tza'n twa'l tze' wi'ten ex puro kyuw qe ik tza'n tze' k'ol, pero b'i'x e b'aj naj wu'ne te jumajx.
10Atzun kyeye e je'tz wi'ne tuj Egipto ex 40 ab'q'i e ẍaqlunjtze wu'ne tuj tzqij tx'otx' tu'n t-xi nq'o'ne kytx'otx' aj Amorreo te kyeye.
11Kyxol qe kyky'ajale e jaw nsk'o'ne junjun tu'n kyok te nsanjele ex junjuntl e ok nq'o'ne te Nazareo. ¿Myape ax tok jlu, aqeye aj Israel? Chi Qman.
12Atzun kyeye ok kylajwersine qe Nazareo tu'n t-xi kyk'a'n vin ex e ok kymayo'ne qe nsanjele tu'n mi'n t-xi kypakb'a'n nyole.
13Kyb'intze, ok nb'incha'ye tu'n kyb'aj b'etz'ane kyu'n qe aj q'oj kyi'je, ik tza'n in kub' b'etz'q'aj tx'otx' tjaq' jun carret nojni wen tu'n nimku che'l triw.
14Maske kye che ojqelane wen, pero mlay che tzoqpaje; aju xjal at tipun, kb'ajel tipun, ex qe xjal kyuw kyk'u'j tuj q'oj, mlay che klet.
15Aju xjal at t-xob'l plech mlay kub' we' twitz aj q'oj ti'j, qe xjal kye che ojqelan, mlay che klet ex mi qe xjal kyjax kyib'aj chej, ax ikx mlay che klet.
16Tuj tq'ijlalil lu, aju xjal mas kyuw tk'u'j tuj q'oj che kyjel t-xo'n qe tmakb'il in che ajb'en tuj q'oj tu'ntzun tb'ant tqelan ok tel oq. Ate Qman ma q'mante yol lu.
Who We AreWhat We EelieveWhat We Do
2025 by iamachristian.org,Inc All rights reserved.
