1 Tesalonicenses 2 - Mam Huehuetenango New Ortography

Aju taq'unb'en Pablo tuj Tesalónica

1Ex ax qeye erman b'a'n kyu'ne, tej qpone kyuk'ile mya noqx gan.

2Maske otoq qo k'ixb'isanjtze tuj tnam Filipos ex otoq qo ok yaso'ne, ik tza'n b'a'n kyu'ne, pero minti' o xob'e, noq o'kx ok qe' qk'u'je ti'j Dios tu'n t-xi qpakb'a'ne tqanil kolb'il aju tzaj tq'o'n Dios, ex tzaj nim kyq'oj xjal qi'je.

3Ex tej t-xi qq'o'ne kynab'le, minti' o tzpete ti'j, ex minti' jun qximb'etze mya b'a'n, ex minti' o sb'une kyi'je.

4Ex tu'nju otoq tzik' twitz Dios qi'je, kyja'tzun tzaj toqxe'nan tqanil kolb'il qeye, kyja'tzun tten in qo yoline ti'j, minti' in qo yoline tu'n kytzalaj xjal qi'je, noq o'kx in qo yoline tu'n ttzalaj Dios qi'je, porke ojtzqi'n tuj qanmiye tu'n Dios.

5Porke minti' o xmoxine kyi'je tu'n tkub' kyi'je qu'ne, ik tza'n b'a'n kyu'ne, ex minti' pon qk'u'je ti'j kypwaqe ex minti' o sb'une kyi'je tu'n ttzaj kyq'o'ne kypwaqe qeye. A Dios testiw qi'je.

6Minti' o qajb'eye tu'n qjaw nimsa'ne kyu'n xjal, mi kyu'ne, mi kyu'n txqantl xjal, maske at qoklene tu'n qjaw nimsa'ne porke apostol qo'ye te Crist.

7Ex o tene kyxole b'unin qyole, ik tza'n jun txuyb'aj kwentinxix qe tal tu'n, ex at-xix tk'u'j kyi'j.

8At-xix qk'u'je kyi'je, ex b'a'n ela tuj qwitze tu'n t-xi qma'ne tqanil kolb'il kyeye, aju tzaj tq'o'n Dios, ax ikx qaq' qib'e tu'n qajb'ene kyeye, tu'nju at-xix qk'u'je kyi'je.

9Tu'nju na'nx kyu'ne erman, tza'n tten o aq'nane ex o sikte tu'n tknet aju in ajb'en qeye, o aq'nane qonik'an ex q'ijl tu'n mi'n tkub' qq'o'ne jun iqtz kyib'aje; kyja'tzun tten xi qpakb'a'ne tqanil kolb'il kyeye, aju tzaj tq'o'n Dios.

10Aqeye testiw qi'je ex tuk'ix Dios, tza'n tten xqo tene kyxole okslal qeye; tej xqo tene kyuk'ile saq tuj qanmiye, ex ma qo b'ete tuj tumelxix, ex minti' qpaltile.

11Ax ikx b'a'n kyu'ne tza'n tten xi qq'o'ne kynab'le ex xi qq'uqb'a'ne kyk'u'je teyle junjun kyeye, o qb'inchaye kyeye ik tza'n in tb'incha'n jun mamb'aj kye tk'wa'l.

12Xi qma'ne kyeye tu'n kyb'inchanteye aju b'a'n nne'la tuj twitz Dios, ax Dios ma txkon kyeye tu'n kyokxe tuj tkawb'il ex tuj tajwalil.

13Kyja'tzun kukx in xi qq'o'ne chjonte te Dios tu'nju xi kyoksla'ne tyol Dios, aju kyb'iye qeye; tej t-xi kyoksla'ne minti' o kymaye qa tyol xjal, o'kx o kymaye qa tyol Dios, ex ax tok tyol Dios ex in aq'nan tuj kyanmiye aqeye okslal qeye.

14Ex aqeye erman, ma tz'el kykano'ne kyi'j qe okslal ti'j Jesucrist etzan qe tu'n Dios ate' tuj tx'otx' Judea; porke ma che yajlanjtze kyu'nx kyxjalile ik tza'nx kye e yajlanjtz kyu'n xjal judiy.

15Ex kyu'n judiy kub' kyb'yo'n Qajaw Jesús kyuk'ix qe t-sanjel Dios, ax ikx qeye ma qo etz lajo'ne kyu'n, ex minti' kyaj ti'j tu'n ttzalaj Dios kyi'j, ex in che q'ojin kyi'j kykyaqil xjal.

16Ok in qo yoline kyuk'il xjal mya judiy tu'n kyklet, in che ok ten mayolte qeye ti'j jlu; kyja'tzun kukx in chmet kyil, kyja'tzun tten ma tzaj tq'oj Dios kyi'j, ma'xix jun kycastiw tzul tu'n.

O tajb'e Pablo tu'n t-xi juntl maj visitaril kye aj Tesalónica

17Atzun qe erman, mya nim q'ij ma kyaj qkolin qib'; minti' nno'k qke'yin qwitz, ex aju qanmiye at kyuk'ile; kyja'tzun nno'k tililxix qu'ne tu'n qpone kyuk'ile ex qajb'ilxixe tu'n tok qke'yine kywitze.

18Kyja'tzun o qajb'eye tu'n qxi'ye kyuk'ile, ax tok ela' maj kub' nximane, aqine Pablo, pero o mayonjtze tu'n Satanás.

19Porke ¿alkyetzunju tu'n tqe' qk'u'je ti'j, ex alkye tu'n qtzalaje ti'j, ex alkyetzun jun yek'b'il kxel qyek'une ti'j qaq'unb'ene twitz Qajaw Jesucrist ok tul? ¿Myapetzun aqeye?

20Ax tok aqeye jun yek'b'il kxel qyek'une ti'j qaq'unb'ene, ex noq kyu'ne qo tzalajele.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help