1Nman, na'ntza aju ma b'aj qi'je, ke'yintza aju nim mya b'a'n ma tzaj qi'je, ma kub' qch'ixwiye tu'n.
2Aju qetzb'ile atzun ta' ja'lo tuj kyq'ab' stranjer xjal; qe qjaye ma tz'el kyetzan qe xjal minti' ojtzqi'n kywitz qu'ne.
3Ma qo kyaje meb'a, o che kyim qmane; atzun qtxu'ye ma che kyaj ten meb'a xu'j.
4Aju a' etzantoq qu'ne nej, atzun ja'lo loq'aj nne'l qu'ne; aju si' etzantoq qu'ne nej, atzun ja'lo in xi qchjo'ne twi'.
5Kukx in qo yajlanjtze kyu'n, in qo sikte ex minti' in tzaj kyq'o'n ch'in amb'il tu'n qojlane.
6Okx qq'on qib'e tjaq' kykawb'il aj Egipto ex tjaq' kykawb'il aj Asiria tu'n ttzaj kyq'o'n qwaye.
7Qe qxe'chele o che b'inchan il ex o che kyim, ex aqo'ye ma kub' qcastiwoye tu'n kylaj.
8In che kawin qe majen qi'je, ex mi a'l jun b'a'n tklonte qeye tuj kyq'ab'.
9Xi qoyin qchwinqlale tu'n tknet qwaye, tu'nju atzun ate' qe eleq' tuj lugar minti' kynajb'il xjal tuj.
10In julin qtz'umale tu'n kyaq ik tza'n tuj jun jorni, tu'n tlaj kyaq in tzaj qi'je tu'n we'yaj.
11Ma che kub' ipan qe xu'j najl tuj tnam Sión, ax ikx qe q'apoj najl kyuj qe tnam tuj Judá.
12Qe nejenel qxole ma che jaw yob'in ti'j kyq'ab', qe tij xjal minti' in che'x niman.
13Qe ku'xun ma che ok q'o'n te che'l triw; atzun qe tal q'a ma che kub' tz'aq tjaq' talil si'.
14Minti'tl in che kub' qe' qe tij xjal ttzi tlamel tnam; minti'tl in b'injtz kyb'itz qe ku'xun.
15Minti'tl tzalajb'il tuj qanmiye; aju qb'ixb'ile te tzalajb'il ma tz'ok te b'is.
16Ma tz'el q'i'n qoklene; b'ek'b'il qwitze, ma qo b'inchane il.
17Tu'n tlaj jlu at b'is tuj qanmiye; ex kyja'tzun ma tz'ok muj ti'j tb'aq' qwitze.
18Aju tnam Sión ma kub' xitj ex mi a'l xjal at tuj; o'kx qe wech in che b'et tuj.
19Atzun teya Nman, kukx ktemb'ila te jumajx; kukx kkawila tuj tkyaqil tab'q'iyil te jumajx.
20¿Tiqu'n ma tzik' qna'njtze tu'na te jumajx? ¿Tiqu'n ma qo kyaj tkolina nimku q'ij?
21Nman, qo ti'n aja tuk'ila, ex jakutzun qo aj meltz'aje. Q'ontza tzalajb'il qeye ik tza'n o qo tzalaje nej.
22Atzun teya ma qo el tik'una te jumajx; nimxix tq'oja ma tzaj qi'je.
Who We AreWhat We EelieveWhat We Do
2025 by iamachristian.org,Inc All rights reserved.
