Apocalipsis 21 - Mam Huehuetenango New Ortography

Aju ak'aj kya'j ex ju ak'aj tx'otx'

1Tb'ajlenxi jlu o wile jun ak'aj kya'j ex jun ak'aj tx'otx'; porke aju tnejel kya'j ex ju tnejel tx'otx' otoq che kub' naj, ex minti'tl mar.

2Aqine Juan o wile aju nintz tnam xjan, aju ak'aj Jerusalén kyja' tku'tz tuj kya'j, tzaj tuk'il Dios tb'inchan tib' ik tza'n jun xu'j b'anin tten tu'n tmoje' tuk'il tchmil.

3Ex o nb'iye jun tq'ajq'ajel kyuwxix tzaj tuj kya'j, in tma'n:

—Ma tzul Dios kyxol xjal, ex ax knajal Dios kyuk'il; che okel xjal te jun tnam etzan tu'n Dios, ex axte Dios ktel kyuk'il te Kydios.

4Ex k'elel t-su'n Dios ta'l kywitz kykyaqil; ex minti'tl kamik, ex minti'tl b'is, ex minti'tl oq'el, ex minti'tl k'ixk'oj; porke aqeju at tnejel ma che naj, chi ju tzaj yolin.

5Ex tma Dios aju q'uql tuj tq'uqb'il jatum in kawin:

—Tkyaqil k'okel te ak'aj wu'ne.

Ex tzaj tma'n weye:

—Tz'ib'ankuya, porke aqeju yol lu axix tok ex b'a'n tu'n tqe' kyk'u'je kyi'j.

6Ex tzaj tma'n weye:

—Ma b'ant. Aqine atine t-xe tnejel ex kukx chin tele ok tjapun b'aj mankb'il tq'ijlalil, ik tza'n ju letr A ex Z. Alkye at txqetle'n ti'j, noq kukx kxel nq'o'ne a' te, aju kjawitz tuj twi a' te chwinqlal.

7Alkye ma kub' ti'j mya b'a'n tu'n, ok tk'ma' tkyaqil tu'n tok te tetzb'il; aqine chin okele te Tdios, atzun te k'okel te nk'wa'le.

8Pero aqeju kye che xob', ex qeju mya okslal, ex qeju ik'b'il qe, ex qeju b'yol xjal qe, ex qeju yaẍil, ex qeju b'a'n che ky'a'n, ex qeju k'ulul kywitz tilb'ilal, ex kykyaqil qe nik'al yol, atzun che xe'l tuj najab' in k'ant tu'n q'aq' ex azufre, atzun tkab'in kamikju.

Aju ak'aj tnam Jerusalén

9Tzajtzun jun anjel wuk'ile, jun kye qeju wuq anjel aqeju o wile nej tzyu'n wuq laq kyu'n nojni tu'n wuq mankb'il k'ixb'isab'l, ex tzaj tma'n weye kyja':

—Tzaja tzalu, kxel nyek'une teya aju xu'j b'anin tten tu'n tmoje', aju t-xu'jil Tal Ẍne'l.

10Ik tza'n tuj witzik' tzaj tyek'un Xewb'aj Xjan weye, inx q'i'ne tu'n anjel twi' jun witz ma'xix ex ma' twa'l, ex tzaj tyek'un weye aju nintz tnam xjan Jerusalén kyja' tku'tz tuj kya'j, tzaj tuk'il Dios.

11In qoptz'aj tnam tu'n t-spik'umal Dios, in qoptz'aj ik tza'n jun tal ab'j wi'yilxix, ik tza'n ju tal ab'j jaspe tb'i, q'ancha'l tu'n tex qke'yin tuj ik tza'n cristal.

12At jun muro ma'xix ex ma' twa'l ti'jele tnam, ex at kab'laj tlamel, ex at junjun anjel ttzi junjun tlamel; ex tz'ib'an kyb'i kab'laj k'loj kyiyjil aj Israel kyi'j tlamel.

13At ox tlamel ttxlaj tnam te okni, ex at ox tlamel ttxlaj tnam te jawni, ex at ox tlamel ttxlaj tnam te kub'ni, ex at ox tlamel ttxlaj tnam te elni.

14Ex aju ma tij muro ti'jele tnam at kab'laj t-simyentil, ex tz'ib'an tb'i junjun apostol ti'j junjun simyent, atzun kyb'i qe kab'laj apostol te Tal Ẍne'l.

15Aju anjel o yolin wuk'ile at jun echb'il q'i'n tu'n ik tza'n ajlaj, q'an pwaq ttx'otx'il, tu'n tkub' techan aju tnam tuk'ix tlamel ex tuk'ix ju ma tij muro tok ti'jele.

16Aju tnam at kyaje ttxlaj junx ta' kywitz; junx ta' tnuqb'il tuk'il twitz; ex kub' techan anjel ju tnam tu'nju ajlaj, at kab' mil tuk' 200 kilómetro tnuqb'il; aju tnuqb'il tuk'ix twitz tuk'ix twa'l junx ta' echb'in te.

17Ex kub' techan ju ma tij muro, at 72 var twa'l muro, ik tza'n in xi techan jun xjal tu'n tq'ab', ikxtzun xi techan anjel.

18Aju ma tij muro b'incha'maj ti'j ab'j jaspe tb'i, atzunju tnam junxte q'an pwaq tb'anilxix, ik ke'yin ik tza'n vidr q'ancha'l tu'n tex qke'yin tuj.

19Atzun qe t-simyentil muro ti'j tnam b'incha'maj ti'j tkyaqil txkaj ab'j tb'anilxix. Aju tnejel simyent b'incha'maj ti'j ab'j jaspe; atzun tkab'in simyent b'incha'maj ti'j ab'j zafiro; atzun toxin simyent b'incha'maj ti'j ab'j ágata; atzun tkyajin simyent b'incha'maj ti'j ab'j esmeralda;

20atzun tjwe'yin simyent b'incha'maj ti'j ab'j ónice; atzun tqaqin simyent b'incha'maj ti'j ab'j cornalina; atzun twuqin simyent b'incha'maj ti'j ab'j crisólito; atzun twajxaqin simyent b'incha'maj ti'j ab'j berilo; atzun tb'elajin simyent b'incha'maj ti'j ab'j topacio; atzun tlajin simyent b'incha'maj ti'j ab'j crisopraso; atzun tjunlajin simyent b'incha'maj ti'j ab'j jacinto; ex atzun tkab'lajin simyent b'incha'maj ti'j ab'j amatista.

21Aqeju kab'laj tlamel kab'laj perla qe; jun perla junjun tlamel. Ex ju cay tuj tnam puro q'an pwaq tujile, ik ke'yin ik tza'n vidr q'ancha'l tu'n tex qke'yin tuj.

22Ex minti' tja Dios o wile tuj tnam porke ate Dios aju Qman aju at tipumal tu'n tb'ant tkyaqil tu'n, atzun tja Diosju at tuj tnam, tuk'ix ju Tal Ẍne'l.

23Ex mya il ti'j tu'n t-spik'b'anjtz tuj tnam tu'n tqan q'ij ex tu'n tqan xjaw; porke tu'nx t-spik'umal Dios in spik'b'anjtz tuj. Ex ate Tal Ẍne'l q'olte spik'un tuj.

24Ex qe nasyon otoq che klet ok che b'etel tuj t-spik'umal tnam; ex qe rey twitz tx'otx' tzul kyi'n kyq'inumab'l ex kyoklen tuj.

25Qe tlamel tnam mlay che lamet q'ijl, porke minti' qonik'an tuj tnam lu.

26Ex qe nasyon tzul kyi'n kyq'inumab'l ex ju kyoklen tuj tnam.

27Pero mlay tz'okx jun ti'xti tz'il tuj tnam lu, ex mi qeju b'inchal ik'b'ilxix twitz Dios, ex mi qeju nik'al yol; noq o'kx che okex qeju tz'ib'an kyb'i tuj tu'jil chwinqlal aju te Tal Ẍne'l.