Efesios 4 - Mam Huehuetenango New Ortography

Ate Xewb'aj Xjan mojb'alte qe tu'n qten junx

1Aqine pres tu'n tlaj tb'i Qajaw, chin kub'sale kywitze tu'n kyb'ete tuj tumelxix, porke ma che txkonjtze tu'n Dios.

2Kymansinku kyib'e ex che oke mans; ten kypasense ex tzik'xku kyu'ne kyxolxe, ex kyk'ujlam kyib'e.

3Tz'ok tililx kyu'ne kukx tu'n tten kymojb'ab'l kyib'e, aju in tq'o'n Xewb'aj Xjan, porke kytzuylaj kyib'e tu'nju kymojb'ab'l kyib'e.

4Noq junx qximlal, ex junx Xewb'aj Xjan, ex ma che txkonjtze tu'n Dios tu'n tok qe' kyk'u'je o'kx ti'j ju ktzajel tq'o'n kyeye.

5Junx Qajaw, junx qokslab'l, junx b'yab'l qe.

6Junx Dios ex Mamb'aj qe qkyaqil; ate Dios qib'aj qkyaqil, ex in aq'nan qxol qkyaqil, ex at tuj qanmi qkyaqil.

7Pero teyle junjun qe ma tzaj tq'o'n Dios t-xtalb'il tu'n tten qoklen ik tza'nxju tzaj tmalo'n Crist.

8Porke in tma'n tuj Tu'jil:

Tej tjax tuj kya'j, xi ti'n txqan pres tuk'il ex xi tq'o'n kyoklen xjal, chi tuj Tu'jil.

9Ex aju yol tej tjax, ¿ti in tma'n? Atzun in tma'n, nej otoq ku'x aj tjaq'xi tx'otx'.

10Aju ku'x aj tjaq'xi tx'otx', axtzunju ma jax, max ma japun tib'ajxi kya'j tu'n tten tuj tkyaqil.

11Ex ax Crist ok q'onte kyoklen okslal tu'n kyok junjun te apostol, ex junjuntl tu'n kyok te t-sanjel Dios, ex junjuntl tu'n kyok te pakb'al tqanil kolb'il, ex junjuntl tu'n kyok te pastor ex xnaq'tzal,

12tu'ntzun kyxnaq'tzet-xix qe okslal tu'n kyajb'en tuj aq'untl, tu'n tch'iy ju Iglesi aju t-ximlal Crist.

13Kyja'tzun tu'n tmoje' qokslab'l junx, ex junx tu'n qojtzqintexix Tk'wa'l Dios, ex tu'n ttz'aqet-xix qnab'l, tu'ntzun ttz'aqet-xix qu'n ik tza'n te Crist tz'aqlxix.

14Kyja'tzun mi'n qo ok ik tza'n jun k'wa'l in meltz'aje' tnab'l, ex mi'n qo jaw sutin tu'nju xnaq'tzb'il in kyq'o'n xjal ik tten ik tza'n kyq'iq', porke in che sb'un ex in kyma'n yol xmletz' tu'n kyel tzpet xjal.

15Atzun qe, qo lpe'k ti'j ju yol axix tok tuk'il qk'ujlalil, qo ch'iy tuj tkyaqil ato'k ti'j Crist, ex atzun qwi'ju.

16Atzun qe t-ximlal Crist qo', ex tu'n Crist in ch'iy t-ximlal ttzuylaj tib' ex tmojb'an tib' tu'n tyaqmil, ex kykyaqil ate'k ti'j Crist in kyonin kyib' kyxolx noq alkyex kyaq'un, ex in che ch'iy tu'nju in kyk'ujlan kyib'.

Aju ak'aj qchwinqlal tu'nju okslal qo' ti'j Crist

17Atzun jlu kxel nma'ne ex kxel nkyuwsa'ne kyeye tuj tb'i Qajaw: Mi'n che anq'intle ik tza'n qe txqantl xjal mya okslal qe in che anq'in tuk'il kyximb'etz noqx gan.

18Tuj qlolj ta' kynab'l, ex kypa'n kyib' ti'j ju chwinqlal in tq'o'n Dios, porke minti' nne'l kynik' ti'j, tu'nju kyuw kyanmi.

19Ex tu'nju minti'tl nne'l kynik' ti'j alkyeju b'a'n ex alkyeju mya b'a'n, ma txi kyq'on kyib' tuj achb'il, tu'n kyb'inchante tkyaqil ttz'ilil aju in ponxix kyk'u'j ti'j.

20Atzun kyeye, mya ik tten xnaq'tzb'il ma kyk'ame ti'j Crist,

21porke ma kyb'iye tyol ex ma che xnaq'tzanjtze tu'n, ik tza'nx ju yol axix tok at tuk'il Jesús.

22Kykotpi'mele kyi'je aju ojtxi kytene, ex kyq'onkje aju ojtxi kychwinqlale, porke aju ojtxi kytene nib'an tnaj tu'nju in pon tk'u'j ti'j nimku ex in t-sb'un tib'.

23Kyja'tzun, tz'okwit kyanmi te ak'aj tuk'ix kynab'le,

24ex kyq'o'nke kyi'je aju ak'aj kytene, porke o che b'inchanjtze tu'n kyoke ik tza'n tilb'ilal Dios, tu'n kyoke tz'aqlxix ex xjan tu'nju yol axix tok.

25Kyja'tzun, kyq'onkje aju nik'aj yol; che yoline axix tok kyuk'il txqantl, porke junx ato'k ti'j junx qximlal.

26Qa ma tzaj kyq'oje, pero mi'n kyb'inchaye il; mi'n txi kyk'u'ne q'oj okxi tex q'ij.

27Ex mi'n txi kyq'o'ne amb'il te tajaw il.

28Aju b'a'n tz'elq'an nej, mi'n tz'elq'antl, noq o'kx tu'n taq'nan tu'n tq'ab' tu'n tb'inchante jun aq'untl tuj tumelxix, tu'ntzun tknet aju in ajb'en te, ex tu'n t-xi tq'o'n ch'in teju atx taj te.

29Mi'n kymaye jun tk'ayil yol, noq o'kx tu'n kyyoline ti'j ju yol b'a'n, tu'ntzun tok kynab'l txqantl, ex tu'n tajb'en te jun onb'il te kye qeju in che b'in ti'j.

30Mi'n tzaj tb'is Xewb'aj Xjan kyu'ne, aju T-xew Dios, porke ma tz'ok q'o'n jun sey kyi'je tu'n Xewb'aj Xjan tu'n tqe'xix kyk'u'je ti'j ju kolpib'l kyeye tuj tq'ijlalil tzul.

31Kykolinkje q'oj, mi'n che jaw kyaqpaje, mi'n tzaj tlo'ch kyk'u'je, mi'n che jaw sch'ine tu'n kyq'oje, mi'n che yasune, mi'n che ximane mya b'a'n ti'j juntl.

32Aju mas b'a'n, atwit kyk'u'je kyi'je kyxolxe, q'aq'anx kyk'u'je ti'j juntl, kynajsame kyile kyxolxe ik tza'n te Dios kub' tnajsa'n kyile noq tu'n Crist.