1Aju xu'j tok te rey tuj tx'otx' Sabá o tb'i tqanil ti'j rey Salomón qa at nim tnab'l. Tzajtzun tu'n tul tuj Jerusalén tu'n kyxi tqanin qe xjel kyuwxix te Salomón, ex nimxix txqan xjal uk'in tu'n, kyuk'ix qe chej camey iqan perjum kyu'n, tuk'ix nim tajlal q'an pwaq ex qe tal ab'j puro tb'anilxix. Tejtzun tul twitz rey Salomón xi tqanin tkyaqilju ximamaj tu'n.
2Xi ttzaq'we'n Salomón kykyaqil qe t-xjel, mi jun xjel minti'wt tzaq'wet tu'n Salomón.
3Atzunte xu'j aju tok te rey tuj tx'otx' Sabá, tej tke'yinte tnab'l Salomón ex ju tex tja otoq jaw tb'incha'n,
4ju tb'anil tchi' tkub' twi' tmes, qe lugar jatum in che okx ten qe xjal ma' kyoklen ate'k ttxlaj, ex aju tmodiyil tza'n tten in che ajb'en tmajen ex ju kyxb'alun tb'anilxix tok, ex qe q'ol tk'a' ex ju kyxb'alun tb'anilxix tok, ex qe grad tu'n tjapun twitz tja Dios; tu'n tkyaqil jlu b'i'x o naj tnab'l xu'j,
5ex xi tma'n te rey kyja': Aju tqanil o nb'iye max tuj ntanmiye ti'j tkyaqilju in tb'incha'na ex ti'j tnab'la, ax tok qe jlu;
6minti' xi nnimane nej, maxitzun ma txi nnimane ja'lo tejxi ma chin ule tzalu ex ma wile tu'n nwitze. Ax tok noq ch'in tzaj q'ma'n weye ti'j tnab'la, ex mas nim tnab'la at twitzju o nb'iye.
7Nimlo tzalajb'il kye qe xjal ate' tuk'ila, ex nimlo tzalajb'il kye qe ajb'el teya, aqeju ax ate' ttxlaja ex in che b'in ti'j tyola nimxix tnab'l.
8Nimanxwit tb'i Qman aju Tdiosa tu'nju in tzalaj ti'ja, ex ma tz'ok q'o'na tu'n te kawil kyib'aj aj Israel. Ex tu'nju tk'ujlalil Qman kyi'j aj Israel tajb'il kukx tu'n kyten qe te jumajx, kyja'tzun ma tz'ok q'o'na te rey kyib'aj, tu'ntzun tkawina tuj tumelxix ex tz'aqlxix, chi xu'j rey.
9Xitzun tq'o'n xu'j q'an pwaq te rey Salomón, b'alo 90 quintal, tuk'ix nim perjum ex kyuk'ix qe tal ab'j tb'anilxix. B'ajxtoq pon txqan perjum kyuk'il aj Israel ik tza'nju xi q'o'n te rey Salomón tu'nju xu'j tok te rey tuj tx'otx' Sabá.
10Qe tmajen rey Hiram kyuk'ix qe tmajen rey Salomón otoq tzul kyi'n q'an pwaq tzaj kyi'n tuj tx'otx' Ofir, ax ikx tzaj kyi'n ma chixin txqan tze' sándalo tb'i, at tk'ok'jal, kyuk'ix qe tal ab'j tb'anilxix.
11Ti'j tze' sándalo o tb'incha Salomón qe grad jatum tu'n kyjapun xjal twitz tja Dios, tuk'ix ti'j tja rey, ax ikx e b'ant qe chnab' arpa ex qe kitar ti'j tze' sándalo, tu'n kyajb'en kyu'n qeju b'a'n che chimb'an. B'ajxtoq pon q'i'n txqan tze' sándalo ik tza'n jlu tuj tx'otx' Judá.
12Xi tq'o'n rey Salomón te xu'j rey tuj tx'otx' Sabá tkyaqilju o pon tk'u'j xu'j ti'j ex tkyaqilju xi tqanin, ex mas nim oyaj xi tq'o'n Salomón te xu'j rey ik tza'nju otoq tzul ti'n. Te tib'ajxi jlu ajtzun meltz'aj xu'j rey tuj ttanmi kyuk'ix qe xjal ajb'el te.
El tqanil ti'j tnab'l Salomón ex ti'j tq'inumab'l 1 Reyes 10.14-29; 2 Crónicas 1.14-1713Tkyaqil tajlal q'an pwaq o tk'am Salomón tuj junjun ab'q'i b'alo jwe' syent quintal,
14ex minti' ok tajlal aju in tzaj kychjo'n qe comersyant, ex aju in tzaj kychjo'n qe xk'a'mil k'aẍjel. Ax ikx kykyaqil qe rey tuj tx'otx' Arabia ex qe gobernador te junjun tnam, nnu'l kyi'n q'an pwaq ex saq pwaq tuk'il rey Salomón.
15Xi tma'n rey Salomón tu'n kyb'aj b'inchet kab' syent maqb'il q'an pwaq kytx'otx'il ex nmaq qe, teyle junjun ch'ixmi xi ti'n wajxaq libr q'an pwaq, ex tu'n martiy e b'aj tx'ino'n.
16Ax ikx xi tma'n tu'n kyb'aj b'inchet ox syent maqb'il tal ch'in qe, ex teyle junjun ch'ixmi xi ti'n kyaje libr q'an pwaq; ax tu'n martiy e b'aj tx'ino'n, ex e okx tq'o'n kykyaqil qe maqb'il lu tuj tja rey, aju tok tb'i Tjaq' Tqan Tze' Líbano.
17Ax ikx xi tma'n tu'n tb'aj b'inchet jun nintz q'uqb'il jatum tu'n tkub' qe' kawil, marfil ttx'otx'il, ex xi tma'n tu'n tb'aj lo'tzin ti'j tu'n q'an pwaq tb'anilxix.
18Aju q'uqb'il at qaq grad te ex jun wa'lb'il jatum tu'n kykub' ten tqan, q'an pwaq ttx'otx'il, ex at kytemb'il q'ab'aj kykab'il pak' te q'uqb'il, ex ttxlajtzun qe kab'e ttemb'il q'ab'aj lu at jun tilb'ilal b'alun junjun pak', wa'l kykub' qe ttxlaj.
19Ax ikx wa'l kub' kab'laj tilb'ilal b'alun, junjun te junjun pak' kytxlajile qe grad. B'ajxtoq b'inchet jlu ikju tu'n juntl rey kyuj qe txqantl nasyon.
20Ax ikx tkyaqil tk'ab'l rey q'an pwaq kytx'otx'il ex kykyaqil txqantl makb'il in che ajb'en tuj tja rey, aju tok tb'i Tjaq' Tqan Tze' Líbano. Mi jun kyxol qe jlu saq pwaq ttx'otx'il, porke aju saq pwaq tuj tq'ijlalil Salomón myaxix wi'yil.
21Ex attoq txqan tbarc rey in che'x aj tuj tnam Tarsis kyuk'ix qe tmajen rey Hiram; in che ul aj jun maj tuj ox ab'q'i, ex in tzaj kyi'n q'an pwaq, saq pwaq, marfil, xmaẍ ex qe chyu'j pavo real kyb'i.
22Mas nim tq'inumab'l rey Salomón ex mas nim tnab'l o ten kywitz kykyaqil txqantl rey e ten twitz tx'otx'.
23Kykyaqil qe rey twitz tx'otx' o kyajb'e tu'n kyke'yinte twitz Salomón ex tu'n kyb'inte ti'j tnab'l otoq tzaj tq'o'n Dios,
24ex kykyaqil ab'q'i in pon kyi'n oyaj te Salomón: At makb'il saq pwaq ttx'otx'il, at q'an pwaq ttx'otx'il, at xb'alun, at makb'il in che ajb'en tuj q'oj, at t-samel chib'j at tk'ok'jal, at chej cabay ex at chej mul.
Ok ten Salomón xk'a'mil kyi'j carwaj ex kyi'j chej cabay 1 Reyes 10.26-29; 2 Crónicas 1.14-1725O b'ant kyaje mil ja tu'n Salomón jatum tu'n kyten qe tchej cabay ex qe tcarwaj in che ajb'en tuj q'oj, ex attoq kab'laj mil xjal b'a'n che chejin. Aqe jlu e okx tq'o'n tu'n kyten kyuj qe cuartel jatum ate' qe carwaj in che ajb'en tuj q'oj ex tuj lugar niqayin ttxlaj tuj Jerusalén.
26O kawin rey Salomón kyib'aj kykyaqil qe rey tzajx qe' ttzi nima Éufrates ex pon b'aj ti'j kytx'otx' aj Filisteo, ex max jatum ulni b'aj ttxa'n kytx'otx' aj Egipto.
27Ex o chmet nimxix saq pwaq tuk'il rey Salomón tuj Jerusalén mer ik tza'n ab'j, ex o chmet nim tze' wi'ten ik tza'n tqan higo in tzaj ch'iy tjaq' k'ul tuj chq'ajlaj t-xe witz.
28Qe tchej Salomón, atzun in che tzaj q'i'n tuj Egipto ex kyuj kykyaqil txqantl nasyon.
Tej tkyim Salomón 1 Reyes 11.41-4329Aju txqantl tx'olb'ab'en ti'j Salomón, atxix tej ttzyet tkawin ex tejxi tkyim, atzun tz'ib'an kyuj qe libro kub' ttz'ib'an Natán aju t-sanjel Dios, ex tuj libro jatum tz'ib'an tqanil q'manjtz tu'n Ahías aju aj Silo, ax ikx tuj libro jatum tz'ib'an qe yol tzaj tyek'un Dios te Iddo ti'j Jeroboam aju tky'ajal Nabat.
30O kawin Salomón 40 ab'q'i kyib'aj kykyaqil aj Israel tuj Jerusalén,
31ex tejtzun tkyim, ku'x maqu'n tuj lugar tok tb'i Ttanmi David aju qtzan tman, ex a Roboam aju tky'ajal kyaj ten te rey te t-xel.
Who We AreWhat We EelieveWhat We Do
2025 by iamachristian.org,Inc All rights reserved.
