1Aya Nman, kjawil nnimsa'ne tu'n tkyaqil wanmiye, ex kxel nma'ne kye kykyaqil xjal qe tb'inchb'ena in che b'ant ma'xix kyxilen.
2Aya Nman ma'xix toklena, chin jawil sch'ine tu'n tzalajb'il ti'ja; che xel nb'itzane qe b'itz ti'j tb'iya.
3Qe aj q'oj wi'je in che el oq twitza; in che kub' tz'aq ex in che kyim.
4Aya jwes tz'aqlxix ma kub' qe'ya tuj tq'uqb'ila tu'n ttzaj tb'incha'na wi'je.
5Ma che'x tkawina qe txqantl nasyon, ma che naj tu'na qe xjal b'inchal mya b'a'n. Ma naj kyb'i tu'na, tu'n mi'n kytzaj na'ntl.
6Ma che kyim qe aj q'oj, ex kyuk'ix qe kytanmi ma che naj junx kyuk'il; tu'na ma kub' t-xituna qe jlu, ex minti' jun ma kyaj ten tu'n ttzaj na'n ti'j.
7Kukx ktel Qman te rey te jumajx; ma tkyuwsa tq'uqb'il tu'n kyok qe xjal tuj xjel tu'n.
8Che okel qe nasyon tuj xjel tu'n tuj tumelxix, ex kb'el tq'o'n kysentens qe tnam tuj tumelxix.
9In kolin Qman kyi'j qeju in che b'aj yajla'n; in kolin kyi'j tuj tq'ijlalil yajb'il kye.
10Aya Nman, aqeju ojtzqi'na kyu'n, q'uql kyk'u'j ti'ja ex minti' in che kyaj tkolina qeju in che qanin onb'il teya.
11Che b'itzane b'itz te nimb'il te Qman aju in kawin tuj tnam Sión; kyq'manxe kyuj qe tnam aju o tb'incha.
12Kukx in tzaj tna'n Dios qeju in che b'isun ex minti' nnik' tna'l kyoq'el tu'n; ex in kub' tq'o'n kycastiw qeju in che yajlan kye.
13Aya Nman, q'aq'antz tk'u'ja wi'je, ke'yintza, lu qine in chin yajlanjtze kyu'n qeju in che ik'un wi'je, chin tkloma te kamik,
14tu'ntzun t-xi nma'ne kye xjal ttzi tlamel tnam Jerusalén qa aya at toklena tu'n tjaw nimsa'na, ex in chin tzalaje ex tu'na ma chin klete.
15Qe txqantl nasyon tuj kyex kyk'ob'il in che kub' tz'aq; ex in kyaj q'e't kyqan tuj k'ob'il in kyaj kyq'o'n tuj ewaj.
16Ate Qman ma txi tyek'un tib' tej xkub' tq'o'n kysentens qe xjal mya b'a'n. Ma che kub' tz'aq qe xjal mya b'a'n tujx kyb'inchb'en.
17Qe xjal mya b'a'n, ex qeju mya okslal ti'j Dios, ex qeju nnik' tna'l Dios kyu'n, che pol b'aj tuj kynajb'il kyimni.
18Mya te jumajx k'ik'el kyna'njtz qe xjal meb'a, ex mya te jumajx mi'n japun aju onb'il in che ayon ti'j.
19We'ktza Nman, mi'n txi tq'o'na amb'il kye xjal tu'n tkub' ti'ja kyu'n, q'on kub'a kysentens qe txqantl nasyon.
20Nman, tzajwit kyxob'il tu'na. Tz'elwit kynik' tnam xjal ti'j qa noq elajx jun xjal qe.
Who We AreWhat We EelieveWhat We Do
2025 by iamachristian.org,Inc All rights reserved.
