1Nman, ti'ja ma tz'ok nklon wib'e; mi'n taq'a amb'il tu'n tkub' nch'ixwiye.
2Chin tonintza ex chin tkloma porke aya tz'aqlxix. Chin tb'intza ex chin tkloma.
3Tz'okwita te weye ik tza'n jun pik tu'n tok nklon wib'e ti'j; tz'okxwita te jun lugar kyuw tten te kolb'il wib'e ex kolol weye. Aya ik ttena te weye ik tza'n jun pik ex jun lugar kyuw tten.
4Nman Dios, chin tkloma tuj tq'ab' ju xjal mya b'a'n, tuj tq'ab' ju b'yol xjal ex tuj tq'ab' aju jawni twitz tu'n tq'ojin,
5porke ti'ja Nman Dios in chin ayone, ex ti'ja q'uql nk'u'je atxix tuj nku'xumale.
6Tej atinxtoqe tuj talb'il ntxu'ye otoq tz'ok qe' nk'u'je ti'ja. Tu'na in ul itz'je. Kukx kjawil nnimsa'ne.
7Ma che jaw lab'in nimku xjal wi'je, ex aya kolb'il weye.
8Tkyaqil q'ij in chin yoline ti'j tajwalila ex in jaw nnimsa'ne tb'iya;
9mi'n chin el tik'una ok ntijine; mi'n chin kyaj tkolina ok minti'tl wipune.
10Qe aj q'oj wi'je kyaj tu'n nkub' kyb'yo'n, ma tz'ok kyjunin kyib' ex in b'aj kyximan tu'n kyb'inchante mya b'a'n wi'je.
11In kyma'n kyja': Che lpexe ti'j ex kytzyuntze, ma kyaj kolin tu'n Dios ex mi a'l jun jaku klonte te.
12Mi'n tz'el laq'e'ya wi'je Nman Dios; tzaj naja onil weye.
13Tzajxwit kych'ixwi ex che najxwit qe aj q'oj wi'je. Tzpet-xwit kynab'l ex tz'elxwit kych'ixwi qeju kyajb'il tu'n ttzaj mya b'a'n wi'je.
14Atzun weye kukx chin ayole ti'ja, ex kukx kjawil nnimsa'na;
15tkyaqil q'ij kxel nchik'b'a'ne aju ttena tz'aqlxix ex aju kolb'il tu'na. Ma'xixte jlu, mlay tz'el nnik'e ti'j.
16Chin okel tene q'malte qe b'inchb'en nim kyipumal o che b'ant tu'na Nman; kxel nma'ne qa o'kxku aya tz'aqlxix.
17Nman Dios, aya o tzaj xnaq'tzante weye atxix tuj nku'xumale, ex kukx in chin yoline kyi'j qe tb'inchb'ena ma'xix.
18Nman Dios, mi'n chin kyaj tkolina ok ntijine ex ok t-saqix nwi'ye, tu'ntzun nyoline ti'j ju tipumala ma'xix kye qe xjal ate' ja'lo ex kye qeju che ul itz'j te tib'ajxi.
19Nman Dios, aju ttena tz'aqlxix japun pon max twitz kya'j; tu'na o che b'ant qe ti'xti ma'xix kyxilen; mi a'l juntl ik tza'n teya.
20Maske ma taq'a amb'il tu'n twile nimku mya b'a'n ex b'is, pero chin anq'ile tu'na juntl maj; chin kjawitz ti'na max t-xe'pun tx'otx',
21ktzajel tq'o'na mastl woklene ex ktzajel tq'uqb'a'na nk'u'je juntl maj.
22Nman Dios, che xel nb'itzane qe b'itz ex kjawil nnimsa'ne tb'iya tuk'il tq'ajq'ajel twi chnab' arpa ex kitar, tu'nju in japun tu'na tkyaqilju in tzaj ttziyana, aya Xjan kye aj Israel.
23Chin tzalajele ok kyxi nb'itzane qe b'itz teya, ax ikx ktzalajel wanmiye aju ma klet tu'na.
24Ax ikx kxel nma'ne tkyaqil q'ij qa aya puro tz'aqlxix, porke ma kub' kych'ixwi qeju kyaj tu'n ttzaj mya b'a'n wi'je.
Who We AreWhat We EelieveWhat We Do
2025 by iamachristian.org,Inc All rights reserved.
