Job 21 - Mam Huehuetenango New Ortography

1Xitzun ttzaq'we'n Job ex tma:

2Aju tumel mas b'a'n tu'n ttzaj kyq'uqb'a'ne nk'u'je, atzun tu'n tkub' kyb'i'ne nyole.

3Ten kypasense ok nyoline, ex nb'ajlenxi yoline, b'a'n kyxmayine wi'je qa kyajb'ile.

4Mya tuk'il xjal in chin q'ojine; kyja'tzun ma b'aj npasense.

5Chin kyke'yintze ex che elel sek'paje wi'je, ex mi'n che q'ajte.

6Qa ma chin ximane wi'jxe, in chin el sek'paje ex in tzaj lu'lun nximlale.

7¿Tiqu'n kukx kyten qe xjal mya b'a'n, in che tijin ex in chmet kyq'inumab'l?

8Nno'k kyke'yin ok in che ch'iy qe kyk'wa'l ex qe tal kychman, ax kytxlaj in che ch'iy ex b'a'n ate'.

9Tuj txub'txaj ate' tuj kyja, mi a'l jun in xob'tzan kye ex minti' in kub' kycastiw tu'n Dios.

10Qe kytor kukx in che k'wa'lin; nno'k ten kyal qe ttxu kywakẍ ex minti' in kub' kyal na'nxtoq tjapun tq'ijlalil.

11In che schan qe kyk'wa'l ex in che lipan ik tza'n qe tal ẍne'l.

12In che b'itzan tuk'il tzalajb'il ex in che t'ikpaj ti'j t-sonil chnab' arpa, tuk'ix tampor ex xux.

13Tuj tzalajb'il in pon b'aj kychwinqlal ex tuj cheb'a in che kyim.

14Che chi te Dios: Pa'nmil tib'a qi'je, mi'n qajb'ile tu'n qb'inteye aju in tma'na tu'n tb'ant qu'ne.

15¿Ti toklen Dios aju at tipumal tu'n tb'ant tkyaqil tu'n? ¿Ilpetzun ti'j tu'n qajb'en te? ¿Ti qganar ti'j tu'n qkub'san twitz? Che chi.

16Tkyaqilju at kye qe xjal mya b'a'n, mya kyu'nx in knet. Mi'n waje tu'n nximane ik tza'n kye.

17Mi jun maj in kub' yupj kyspik'un qe xjal mya b'a'n. Mi jun maj in tzaj mya b'a'n kyib'aj. Mi jun maj in jaw q'ojl Dios kyuk'il ex mi jun maj in che k'ixb'isanjtz tu'n.

18Mi jun maj in che el sputj ik tza'n in xi iqan ttxa triw tu'n xkyaqinpaẍ.

19Ma kymaye, kb'el tq'o'n Dios kycastiw qe k'wa'l tu'n tlaj ju mya b'a'n o kyb'incha kyman, che chiye. Pero ax te xjal mya b'a'n kxel chjonte ju mya b'a'n o tb'incha, tu'ntzun tel tnik' ti'j.

20Ok ttzaj tq'oj Qman aju at tipumal tu'n tb'ant tkyaqil tu'n, axte xjal mya b'a'n ok k'molte castiw tu'n.

21Ok tkyim, ¿ti toklen ti'j aju kb'ajel kyxol qeju ate' tuj tja?

22(Ex, ¿alkye jun jaku txi tq'o'n xnaq'tzb'il te Dios, aju Dios in che ok tq'o'n tuj xjel qeju ma' kyoklen?)

23At junjun xjal in che kyim atx nim kyipun, in che tzalaj ex txub'txaj ate',

24nimku at kye ex b'a'n ta' kyximlal.

25Ex at junjuntl, puro tuj k'ixk'oj in che kyim ex minti' otoq che ten ch'in tuj txub'txaj.

26Maske ikju, pero kykyaqil che pol tuj muqb'il; kykyaqil che b'ajel chyo'n kyu'n ẍuq'.

27B'a'n wu'ne alkye in kub' kyximane wi'je ex alkye nab'l mya b'a'n q'i'n kyu'ne.

28In b'aj kyqanine kyxolxe: ¿Jatum ta' ja'lo tja ju xjal mya b'a'n ex puro kyuw tmod? Che chiye.

29¿Na'nxpetzun kyyoline kyuk'il qe xjal in che b'et kyuj nimku lugar? ¿Na'nxpetzun kyb'inteye qe yol in kyma'n?

30Ok in tzaj tq'oj Dios in tzaj t-sama'n jun mya b'a'n kyi'j xjal, atzunte xjal mya b'a'n minti' in b'aj ti'j, che chi.

31Mi a'l jun nno'k q'mante te tib'aj twitz alkyeju tb'inchb'en, ex mi a'l jun in kub' q'onte tcastiw ti'j tb'inchb'en.

32-33Oktzun t-xi q'i'n tuj muqb'il, kykyaqil xjal lepch qe ti'j, at qe nejni ex at qe lepchix nno'k kyxq'uqin tuj muqb'il, ax ikx ju tx'otx' puro b'unin twitz tna'n.

34Noq gan kyajb'ile tu'n tok kyq'uqb'a'ne nk'u'je. Puro nik'aj yol tkyaqilju in kyma'ne, chi Job.