Gálatas 1 - Mam Huehuetenango New Ortography

Xi ttz'ib'an Pablo jun u'j kye okslal tuj junjun tnam tuj Galacia

1Aqine Pablo apostol qine, mya kyu'n xjal ma chin oke te apostol, noq o'kx tu'n Jesucrist ex tu'n Qman Dios aju jatz anq'in Jesucrist tu'n kyxol kyimni.

2In xi ntz'ib'ane kyeye aqeye okslal tuj junjun tnam tuj tx'otx' Galacia, ex in che'x q'olb'e'ne kyu'n kykyaqil erman ate' wuk'ile.

3Awt Qman Dios tuk'ix Qajaw Jesucrist che q'onte xtalb'il kyeye ex tu'n tqe'xix kyk'u'je.

4Ate Jesucrist xi tq'on tib' tu'n tkyim tu'n tchjet qil ex tu'n qklet tu'n tuj tq'ijlalil ja'lo mya b'a'n, ik tza'nx tajb'il Qman Dios.

5Nimanxwit tb'i Dios tuj tkyaqil tab'q'iyil te jumajx. Ikxwitju.

Minti' juntl tqanil kolb'il

6Ma jaw naj nnab'le tu'nju ma tz'el kypa'n naj kyib'e ti'j Dios aju txkon kyeye noq tu'n t-xtalb'il Crist, ex ma che ok lpe'ye ti'j juntl tqanil kolb'il junxitl tten.

7Minti' juntl tqanil kolb'il, pero at junjun xjal nne'l tzpet kynab'le kyu'n, ex kyajb'il tu'n tch'expet aju tqanil kolb'il in tzaj tq'o'n Crist.

8Pero qa at jun xjal ma txi tpakb'a'n junxitl tqanil kolb'il kyeye mya ik tten ik tza'n tqanil kolb'il xi qma'ne kyeye, b'a'n tu'n tkub' t-sentens tu'n tnaj, qa aqine ex qa jun anjel in tzaj tuj kya'j.

9Ik tza'n xi nma'ne kyeye nej, ikxtzun kxel nma'ne juntl maj kyeye ja'lo: Qa at jun xjal in pakb'an ti'j tqanil jun kolb'il junxitl tten ex mya ik tten ik tza'n tqanil kolb'il ma kyb'iye, b'a'n tu'n tkub' t-sentens xjal lu tu'n tnaj.

10¿Alkye nno'k tilil wu'ne? ¿Apeloju tu'n kyyolin xjal b'a'n wi'je, ex qa aju tu'n tyolin Dios b'a'n wi'je? ¿Apetzunlo nno'k tilil wu'ne tu'n kytzalaj xjal wi'je? Mi'n, porke noqwit kukx tok tilil wu'ne tu'n kytzalaj xjal wi'je, myawtlo tmajen Crist qine.

Tza'n tten ok Pablo te apostol

11Erman, waje tu'n kyb'inteye jlu, aju tqanil kolb'il in xi npakb'a'ne, mya kyu'n xjal xb'ant.

12Porke mya kyu'n xjal tzaj kyq'o'n weye, ex minti' in xnaq'tzanjtze kyu'n xjal ti'j, noq o'kx tu'n Jesucrist tzaj tyek'un weye.

13Ex b'i'maj kyu'ne tza'n ntene ojtxi tej oksla'nxtoq kyokslab'l xjal judiy wu'ne; nimxix e kub' nyajla'ne kykyaqil okslal etzan qe tu'n Dios ex ok tilil wu'ne tu'n kynaj.

14Tej ntene tuj kyokslab'l xjal judiy, mas nejni qine kywitz nimku nxjalile junx wab'q'iyile kyuk'il, ex mas nimxix nganiye ti'j ju yol kyaj q'ma'n kyu'n nxe'chele.

15Pero ate Dios jaw sk'onte weye na'nxtoq witz'je, ex in txkonjtze tu'n noq tu'n t-xtalb'il.

16Ex b'a'n ela tuj twitz Dios tu'n ttzaj tyek'un Tk'wa'l weye, tu'ntzun t-xi npakb'a'ne tqanil kolb'il tu'n Crist kyxol qe xjal mya judiy qe. Kyja'tzun minti' xi nqanine jun consej kye xjal,

17ex minti' in jaxe tuj tnam Jerusalén kyuk'il apostol, aqeju nej e ok te apostol nwitze; noq o'kx inxe tuj tx'otx' Arabia, ex in ajtz meltz'aje juntl maj tuj Damasco.

18Tb'ajlenxitzun ox ab'q'i, in jaxe tuj Jerusalén ke'yilte Pedro, ex ax in tene olaj q'ij tuk'il.

19Pero minti' juntl apostol o wile, noq o'kx te Jacobo o wile, aju titz'in Qajaw.

20Aju yol ma txi ntz'ib'ane kyeye ax tok, in ke'yin Dios ti'j minti' in chin nik'ane yol.

21Te tib'ajxitzun, inxe tuj tx'otx' Siria ex tuj tx'otx' Cilicia.

22Ex na'nxtoq tojtzqinjtz nwitze kyu'n qe okslal etzan qe tu'n Crist ate' tuj junjun tnam tuj tx'otx' Judea.

23O'kx otoq kyb'i aju in kyma'n txqantl okslal wi'je: Aju xjal o yajlan qe ojtxi ex o q'ojin ti'j qokslab'l, atzun ja'lo in xi tpakb'a'n tqanil b'a'n ti'j qokslab'l, che chi.

24Ex xi kyq'o'n chjonte te Dios wi'je.