2 Timoteo 2 - Mam Huehuetenango New Ortography

Jun b'a'n soldad te Jesucrist

1Aya nk'wa'l, kyuwsam tib'a tu'nju t-xtalb'il Dios in tzaj tq'o'n qe tu'nju at qmojb'ab'l qib' tuk'il Jesucrist.

2Aju tb'iya weye kywitz nimku testiw, atzunju oqxenanxa kye xjal in japunxix kyu'n ex at kynab'l tu'n kyq'onte xnaq'tzb'il kye txqantl.

3Tzik'xku tu'na tuj aq'untl; tz'okxa jun b'a'n soldad te Jesucrist.

4Mi jun soldad jaku b'aj t-sakun tib' tu'n t-xi tjyo'n juntl taq'un, ex atzun taj tu'n ttzalaj ju xjal ti'j, aju o q'mante te tu'n tok te soldad.

5Jun ku'xun nno'kx tq'on tib' tuj jun saqchb'il, mlay tk'am jun oyaj qa mya tuj tumel nno'k tilil tu'n tuj saqchb'il.

6Aju xjal in aq'nan tuj kojb'il ex in sikt ti'j aq'untl, atzunte nej tu'n tk'monte twitz awal.

7Ximanxa ti'j aju ma txi nma'ne teya; porke ate Qajaw kq'olte tnab'la tuj tkyaqil.

8Na'ntza Jesucrist, atzun tzaj ti'j tiyjil David ex jaw anq'in kyxol kyimni ik tza'nxju tqanil kolb'il in xi npakb'a'ne.

9Tu'n tlaj ju yol lu in xi npakb'a'ne, nimku nnik'x wu'ne, ex ma'lpe chin oktz q'o'ne tuj pres, ma chin ok q'o'ne ik tza'n jun b'yol xjal; pero aju tyol Dios mya presin.

10Kyja'tzun nnik'x tkyaqil jlu wu'ne tu'nju at nk'ujlalile kyi'j qeju sk'o'maj tu'n Dios, tu'ntzun ikx kye tu'n kyk'monte jun kolb'il tb'anilxix ex te jumajx, aju in tzaj tq'o'n Dios tu'nju at qmojb'ab'l qib' tuk'il Jesucrist.

11Axix tok ju yol lu:

Qa ma qo kyim junx tuk'il Crist, ax ikx qo anq'il junx tuk'il.

12Qa ma tzik'x qu'n, ax ikx qo kawil junx tuk'il. Qa ma kub' qewan qa minti' ojtzqi'n qu'n, ax ikx te kb'el tewan qa minti' ojtzqi'n qo' tu'n.

13Qa ma kyaj qkolin qokslab'l, atzunte Crist kukx in japun tyol; ex mlay b'aj tch'expu'n tyol.

Jun aq'nal minti' tpaltil

14Na'ntza jlu kye okslal, ex q'onxa kynab'l twitz Qajaw; q'manxa kye tu'n mi'n kyjaw q'ojl ti'j ju yol noqx gan, porke noqx gan jlu, ex a jlu in xitunte kynab'l qeju in che b'in ti'j.

15Q'o'nka tilil tu'n tyek'unte tib'a twitz Dios minti' tpaltila, ik tza'n jun aq'nal minti' in ch'ixwi ti'j taq'un, tu'n t-xi tpakb'a'na ju yol axix tok tujxix tumel.

16Pa'nmil tib'a kyi'j qe xjal mya nimal Dios qe ex noqx gan kyyol, porke aqeju xjal lu mas in che'x tuj il.

17Aju kyyol xjal lu in leq'eq'en tel ik tza'n jun yab'il in q'ay kychib'jal xjal tu'n; ajun Himeneo kyxol jlu tuk'ix Fileto.

18Ma che el tzpet ti'j ju yol axix tok, in kyma'n qa o che jaw anq'in qe okslal kyxol kyimni, tu'n jlu nne'l tzpet kynab'l junjun tuj kyokslab'l.

19Ex aju simyent kub' tq'o'n Dios mlay yukch, tok ju sey lu ti'j, in tma'n: Ojtzqi'n tu'n Qajaw alkye qeju tekuxix; ax ikx in tma'n: Kykyaqil qeju in kyma'n qa okslal qe ti'j Crist, kypa'nmil kyib' ti'j mya b'a'n, chi ju tz'ib'an.

20Tuj jun nintz ja at junxilchaq makb'il in che ajb'en; at makb'il q'an pwaq, ex at makb'il saq pwaq, ax ikx at makb'il tze' ex at makb'il tx'otx'; at junjun makb'il tb'anilxix, ex at junjun myaxix tb'anil, part kyajb'en.

21Kyja'tzun, qa at jun tpa'n tib' ti'j ju mya b'a'n lu ex minti' in tz'ilix tu'n, k'okel te jun makb'il tb'anilxix, tekuxix Qajaw ex at tajb'en te Qajaw, ex b'anin tten tu'n tajb'en tuj tkyaqil aq'untl b'a'n.

22Tel oqa ti'j kyachb'il ku'xun, tz'ok tililx tu'na tu'n tb'inchanteya aju tz'aqlxix ex tu'n tten tokslab'la ex tu'n tten tk'ujlalila ex tu'n tten tmojb'ab'l tib'a kyuk'il txqantl, junx kyuk'il qeju in che kub'san twitz Qajaw, aqeju saq tuj kyanmi.

23Mi'n tz'ok tmojtza'na kyyol xjal minti' kynab'l ex minti' ch'in b'a'n kyu'n; porke b'a'n tu'na, tu'n jlu in tzaj kyq'oj xjal.

24Porke aju tmajen Qajaw mya b'a'n tu'n tq'ojin, noq o'kx tu'n tok mans kyuk'il kykyaqil ex tu'n tten tnab'l tu'n tq'onte xnaq'tzb'il, ex tu'n tten tpasens.

25Ex mans tyol tu'n t-xi tka'win qeju in che q'ojin ti'j, mya yajku tz'ajtz ti'j kyanmi tu'n Dios tu'n tel kynik' ti'j ju yol axix tok,

26tu'ntzun tjaw kyke'yin kywitz ex tu'n kytzoqpet tuj tk'ob'il tajaw il jatum tzyu'n qe tu'n kyb'inchante alkyeju tajb'il tajaw il.