2 Corinto 3 - Mam Huehuetenango New Ortography

Aju ak'aj yol kyaj b'ant ti'j tu'n Dios quk'il

1¿Okpetzun qo okel tene juntl maj yolil qi'je tu'n qk'mete kyu'ne? ¿Maj il ti'j tu'n t-xi qi'ne jun u'j tu'n qk'mete kyu'ne ex qa tu'n ttzaj kyq'o'ne jun u'j te oqxenb'il qeye, ik tza'n in kyb'incha'n junjuntl xjal?

2Mi'n, ex ax qeye jun qu'je tz'ib'an tuj qanmiye, in jaw kysch'i'n kykyaqil xjal ex ojtzqi'n kyu'n; mya il ti'j juntl u'j te oqxenb'il qeye.

3Q'ancha'lxix ta' jlu, tu'j Crist qeye, ate Crist o tz'ib'ante noq tu'n qaq'unb'ene. Ate u'j lu mya tu'n tint tz'ib'an, noq o'kx tu'n T-xew Dios, aju Dios itz'; ex mya twitz tz'lom ab'j tz'ib'an, atzun tz'ib'an tuj qanmiye.

4Kyja'tzun, tu'n jlu in qe' qk'u'je ti'j Dios noq tu'n Crist.

5Minti' ch'in qoklene qu'nx qib'xe, ex mlay qo ximane ti'j qa at ch'in jaku b'ant qu'ne qu'nx qib'e; o'kx ate Dios in tzaj q'onte qoklene ex qnab'le.

6Ex axte Dios ok q'onte qoklene tu'n qoke ajb'el ti'j ju ak'aj yol kyaj b'ant ti'j tu'n Dios quk'il. Aju yol lu mya jun ley tz'ib'an, noq o'kx tu'n tipumal T-xew Dios; porke aju ley tz'ib'an, in kub' kysentens xjal tu'n tu'n kykyim, atzunju Xewb'aj Xjan in tq'o'n chwinqlal.

7Aju ley tzaj tq'o'n Dios te Moisés tz'ib'an twitz ab'j, ex tzaj tyek'un Dios t-spik'umal tej ttzaj q'o'n. Qe aj Israel minti' o kyipa tu'n tok kyke'yin twitz Moisés tu'n tlaj in qoptz'aj twitz wen, maske noq te kab' q'ij tu'n tqoptz'aj twitz. Aju ojtxi ley, maske in tma'n tu'n kykyim xjal, pero tzaj tyek'un Dios t-spik'umal ti'j.

8Qa ik tten jlu, yajtzun ju yol in tzaj tq'o'n Xewb'aj Xjan ¿myapetzun mas tb'anilxix?

9Ex qa in qoptz'aj twitz Moisés tej ttzaj q'o'n ju ley, aju in kub' kysentens xjal tu'n tu'n tlaj kyil, yajtzun ju yol aju in tma'n tu'n qok tz'aqlxix tu'n Dios, ¿myapetzun mas tb'anilxix?

10Porke aju ojtxi ley, maske tb'anilxix nej, ya ja'lo mya tb'anilxix, tu'nju at juntl yol ma tzaj q'o'n mas tb'anilxix.

11Maske kyja'toq tnaj aju ojtxi ley, pero tzaj tyek'un Dios t-spik'umal ti'j, yajtzun ju ak'aj yol, ¿myapelo mas tb'anilxix? Porke kyjel ten te jumajx.

12Q'uql qk'u'je ti'j jlu, kyja'tzun in qo yoline clarxix.

13Mya ik qtene ik tza'n Moisés, xi tewan twitz tu'n jun xb'alun tu'n mi'n tok kyke'yin aj Israel ok tkub' yupj ju spik'un in qoptz'aj twitz, aju spik'un lu kyja'toq tnaj.

14Ex qe aj Israel jpet tuj kynab'l ex kukx kyten ja'lo, ex ok in jaw kysch'i'n ju yol kyaj b'ant ti'j tu'n Dios kyuk'il ojtxi, minti' nne'l kynik' ti'j, ex ax tok ju xb'alun maqolte kywitz; aju xb'alun lu o'kx tu'n Crist nne'l ti'n.

15Ex kukx kyten ja'lo ok in jaw kysch'i'n tuj tley Moisés, ax tok ju xb'alun maqolte twitz kyanmi tu'n mi'n tel kynik' ti'j.

16Ex ok kyajtz meltz'aj xjal tuk'il Qajaw k'elel q'i'n ju xb'alun.

17Aju Qajaw axte Xewb'aj; ex jatum ta' T-xew Qajaw atzun at tzoqpib'l qe.

18Kyja'tzun, qkyaqil in qqoptz'a'n t-spik'umal Qajaw ik tza'n tuj jun espej, porke mya maqsi'n qwitz tu'n xb'alun; kyja'tzun in qo ch'expet tu'n qok ik tza'n tilb'ilal Crist, ex mas in qoptz'aj t-spik'umal Crist qi'j junjun q'ij; atzun in tb'incha'n Qajaw, axju Xewb'aj.