1 Reyes 21 - Mam Huehuetenango New Ortography

Acab ex aju tqan uva te Nabot

1Te tib'ajxi jlu, at jun xinaq aj Jezreel Nabot tb'i at jun piẍ tqan t-uva tkub' tuj tnam Jezreel, niqayin ttxlaj tja Acab aju rey te Samaria.

2Pon jun q'ij xi tma'n Acab te Nabot:

—Q'ontza ju tx'otx' te weye, aju awa'n tqan uva tuj tu'na, tu'n tok wawa'ne itzaj tuj, tu'nju ax tkub' ttxlaj njaye; ex jaku txi nq'o'ne juntl piẍ tx'otx' te t-xel at tqan uva mas tb'anil tuj; ex qa mas b'a'n tuj twitza jaku txi nchjo'ne tu'n pwaq.

3Atzunte Nabot xi ttzaq'we'n te Acab:

—Mlay tzaj tq'o'n Dios amb'il weye tu'n t-xi nq'o'ne teya aju wetzb'ile kyaj kyq'o'n qtzan nmane.

4Xi'tzun Acab tja in b'isun ex in q'ojin tu'n tlaj aju ttzaq'web'l Nabot, tu'n mi'n t-xi tq'o'n aju tetzb'il kyajni q'o'n tu'n qtzan tman. Pontzun ma tja ex kub' koẍe' twi twatb'il, kyja' aj tq'o'n twitz twitz ja ex minti' tajb'e tu'n twa'n.

5Pontzun laq'e' Jezabel aju t-xu'jil ttxlaj, ex xi tma'n te:

—¿Tiqu'n in b'isuna ex tk'i'ya wa'n?

6Atzunte Acab xi ttzaq'we'n:

—Ma chin yoline tuk'il Nabot aju aj Jezreel, ex ma txi nqanine aju ttx'otx' at tqan uva tuj, tu'n ttzaj tk'ayin weye ex qa mas b'a'n tuj twitz tu'n t-xi nq'o'ne jun piẍ tx'otx' awa'n tqan uva tuj te t-xel tqan t-uva. Atzunte Nabot tk'i' tzaj tq'o'n weye.

7Atzunte Jezabel aju t-xu'jil, xi ttzaq'we'n:

—¿Myapetzun aya kawil kyib'aj aj Israel? We'ktza, chux wa'na, ex mi'n b'isuna. Jaku txi nq'o'ne ttx'otx' Nabot teya, aju at tqan uva tuj, aju tkub' tuj Jezreel.

8Kub'tzun ttz'ib'an Jezabel txqan u'j ex ok ttz'ib'an tb'i Acab kyi'j ex ok tq'o'n t-sey rey kyi'j; e je'xtzun t-sama'n qe u'j lu kye qe tij xjal ex kye qe nejenel ax najlqe tuj ttanmi Nabot.

9Ex chi ju yol in tma'n kyuj qe u'j: Kymanxe kye xjal tu'n tok kychmon kyib' ex tu'n tkub' kyyo'n we'yaj tuj jun q'ij, ex kyq'on kub'e Nabot kywitz tnam xjal.

10Kyq'on kub'e twitz Nabot kab'e xjal jumajx mya b'a'n qe, tu'ntzun kymante qa ax tok otoq yolin Nabot mya b'a'n ti'j Dios ex ti'j rey. Te tib'ajxi, kyi'n exe ti'jxi tnam ex kyb'yonkuye tu'n ab'j.

11O kyb'incha qe tij xjal ex qe nejenel ate' tuj ttanmi Nabot ik tza'nx tyol Jezabel in tma'n kyuj qe tu'j pon t-sama'n kye:

12Xi kyma'n kye xjal tu'n tok kychmon kyib', ex tu'n tkub' kyyo'n we'yaj tuj jun q'ij, ex kub' kyq'o'n Nabot kywitz tnam xjal.

13E pontzun qeju kab'e xjal jumajx mya b'a'n qe tu'n kynik'an yol ti'j Nabot kywitz xjal, ex kyma qa otoq yolin Nabot mya b'a'n ti'j Dios ex ti'j rey. Extzun q'i'n Nabot ttxa'n tnam kyu'n, ok kyxo'n tu'n ab'j ex kyim.

14Xitzun kysama'n tqanil te Jezabel qa otoq b'aj xo'n Nabot tu'n ab'j, ex ya otoq kyim.

15Tejtzun tb'inte Jezabel jlu, xi tma'n te Acab:

—Bet-xtzuna ja'lo ex toka te tajwil tqan t-uva Nabot aju aj Jezreel, aju minti' o tkuya tu'n ttzaj tk'ayin teya. Ate Nabot mya itz'x, ya ma kyim.

16Tejtzun tb'inte Acab qa otoq kyim Nabot, xi'tzun ex ok te tajwil ttx'otx' qtzan Nabot, aju at tqan uva tuj.

17Tzajtzun yolin Qman te Elías aju aj Tisbe, ex tma:

18Q'onkuya b'e ex txi'ya tuk'il Acab aju rey kye aj Israel, aju najl tuj tnam Samaria. Lu Acab ta' ja'lo tuj ttx'otx' qtzan Nabot, aju at tqan uva tuj, porke ma tz'el tetzan.

19Q'manxa te: Chitzun Qman ma tma: Tu'nju ma kub' tb'yo'na Nabot ex ma tz'el ti'na ju tetzb'il, kyja'tzun tujx ju lugar jatum ma txi kyleq'an tx'yan tchk'el Nabot, axtzun lugar che leq'al qe tx'yan ti'j teya tchk'el, chikuya te.

20Atzunte Acab xi tma'n te Elías:

—¿Mapetzun chin knete tu'na, aya aj q'oj wi'je?

—Ax tok ma kneta wu'ne porke ma txi tq'on tib'a tu'n tb'inchanteya mya b'a'n twitz Qman.

21Tu'ntzun jlu ma tma Qman kyja': Tzul nsama'ne mya b'a'n tib'aja, che b'ajel naj kykyaqil tiyjila wu'ne, ex che najel kykyaqil qe tiyjila xinaq kyxol aj Israel, tza'nx qe xjal majen ex qe mya majen.

22Ex qeju ate' tuj tjaya ik che telb'a wu'ne ik tza'n e tenb'a qeju ate'toq tuj tja Jeroboam aju tky'ajal Nabat, ex ik che telb'a ik tza'n e tenb'a qeju ate'toq tuj tja Baasa aju tky'ajal Ahías, tu'n tlaj ma chin oktz tik'le'na tu'n ttzaj nq'oje; ex tu'na ma che b'inchan qe aj Israel il, chi Qman in tma'n teya.

23Ax ikx ma tma Qman alkye kb'ajel ti'j Jezabel: Che chyo'l qe tx'yan ti'j t-ximlal Jezabel ttxlaj muro te tnam Jezreel.

24Ex atzun qe txqantl tiyjila, aqeju che kymel tuj tnam, tx'yan kxel chyo'nte kyximlal, ex atzun qeju che kymel tuj kojb'il, k'utz kxel chyo'nte kyximlal, chi Elías te Acab.

25(Mi a'l juntl xjal o pon tb'inchb'en mya b'a'n ik tza'n te Acab, ex xi tq'on tib' tu'n tb'inchante mya b'a'n twitz Qman, porke a Jezabel aju t-xu'jil ok tenxix q'malte te tu'n tb'inchante mya b'a'n.

26Ik'b'ilxix aju tb'incha twitz Qman, ex ok ten k'ulul kywitz qe tilb'ilal ik tza'n in kyb'incha'n aj Amorreo, aqeju otoq che ik' tlajo'n Qman kywitz aj Israel.)

27Tejtzun tb'aj tb'i'n Acab tkyaqil yol lu, el t-sb'it'un t-xb'alun ti'j, ok tq'o'n t-xb'alun ch'i'x twitz ex kub' tyo'n we'yaj. Tuk'ix t-xb'alun ch'i'x twitz tok ti'j ok tkub' tan, ex ok tb'et in b'isun twitz.

28Tzajtzun yolin Qman tuk'il Elías aju aj Tisbe, ex chi kyja':

29—¿Mape tila Acab ma kub' tmansin tib' nwitze? Tu'nju ma kub' tmansin tib' nwitze, ja'lo mlay tzaj nq'o'ne castiw kyib'aj qeju ate' tuj tja akux itz'x Acab, maxi tzul nsama'ne castiw tuj tq'ijlalil ok tkawin tky'ajal.