Isaías 10 - Mam Huehuetenango New Ortography

1Ay b'ek'b'il kywitze tu'nju in kub' kyq'o'ne qe ley mya tz'aqlxix ex kyuwxix, aju mlay tzik'x kyu'n xjal,

2minti' in xi kyb'incha'ne ti'j kyxtis qe xjal meb'a, ex nne'l kyi'ne aju at kyoklen qe meb'a ti'j, aqeye nxjalile in b'aj kyyajla'ne qe meb'a xu'j, ex in che elq'ane kyi'j qe meb'a k'wa'l.

3¿Ti kb'antel kyu'ne ok t-xi kyq'o'ne tajlal ti'j kyaq'unb'ene, ok t-xi kyke'yine najchaq aju castiw kyja' ttzaj kyib'aje? ¿Al uk'il che xe'le qanil onb'il? ¿Jatum kyjel kyq'o'ne kyq'inumab'le?

4Che b'el yut'e'ye tu'n xob'ajil ok kyxi q'i'ne pres, ex qa mi'n, che b'el tz'aqe junx kyuk'il qeju b'yo'n che b'el. Maske ikju, na'nx tchewix tq'oj Qman kyi'je; kukx tjaw ti'n tq'ab' tu'n tkub' kycastiwoye.

Ajb'en rey te Asiria tu'n Dios tu'n ttzaj castiw

5Ay b'ek'b'il twitz rey kye aj Asiria. Ik tten ik tza'n jun tq'ab' tze' in ajb'en wu'ne tu'n tkub' castiw, ex in ajb'en wu'ne ik tza'n jun var ok ttzaj nq'oje.

6In xi nsama'ne tu'n tok tzoqpaj ti'j jun nasyon minti' tchi' Dios tuj twitz, ex in xi nsama'ne ti'j jun tnam at nq'oje ti'j, tu'n ttzaj telq'a'n, tu'n tel ti'n kyq'inumab'l ex tu'n kyb'aj twab'an qe xjal ik tza'n xoq'l tuj cay.

7Atzunte rey kye aj Asiria minti' ma kub' t-ximan ikju ex mya t-ximb'etz jlu. Noq o'kx in ximan ti'j tu'n kykub' t-xitun ex tu'n kynaj nimku nasyon tu'n.

8In tma'n: Qe nejenel ate' ntxlaje ax kyoklen ik tza'n qe rey.

9Aju o b'aj ti'j tnam Calno wu'ne, axtzun o b'aj ti'j tnam Carquemis, aju o b'aj ti'j tnam Hamat, axtzun o b'aj ti'j tnam Arfad, aju o b'aj ti'j tnam Samaria, axtzun o b'aj ti'j tnam Damasco.

10O kub' kyi'j qe nasyon wu'ne, aqeju at nimxix kydios, mas nim kyilb'ilal kydios at twitz kye aj Jerusalén ex kye aj Samaria.

11Aju o nb'inchaye kyi'j aj Samaria ex kyi'j kydios, ¿mlaypetzun b'ant jlu wu'ne kyi'j aj Jerusalén ex kyi'j kydios? Chi rey kye aj Asiria.

12Ok tb'aj b'ant tkyaqil tu'n Qman aju at tu'n tb'inchante twi witz Sión ex tuj Jerusalén, kb'eltzun tq'o'n tcastiw rey kye aj Asiria tu'n tlaj tnimb'il tib', ex tu'nju ok tq'on tib' te ma'xix toklen ex o kawin kyuwxix wen.

13Aju rey kye aj Asiria in tma'n kyja': Tu'n wexe wipumal ma nb'inchaye jlu: Ma b'aj nch'expune kymojonil qe nasyon, ma che tzyet kyq'inumab'l wu'ne ex ma che naj qe rey wu'ne tu'nju kyuw nk'u'je tuj q'oj.

14Ma tz'el wi'ne kyq'inumab'l qe tnam, ma tzyet tkyaqil kytx'otx' wu'ne, mer ik tza'n jun xjal nne'tz ti'n jos tuj tq'u' jun chyu'j otoq kyaj tkolin tq'u', mi a'l jun tzaj tyukun t-xik' ex mi a'l jun jaw tk'ab'in tuj ttzi' ex mi a'l jun jaw q'ajt.

15¿Jakupe tz'ok tq'on tib' siwb'il k'uxb'il te mas ma' toklen twitz ju xjal in tx'emin? ¿Jakupe tz'ok tq'on tib' sier te mas ma' toklen twitz ju yukulte? Mya te ky'aqo'ch in jaw yukun te xjal, ate xjal in jaw yukunte ky'aqo'ch.

16Kyja'tzun, ate Qman aju Tajaw Tkyaqil che kyjel tq'o'n te minti' kyipun qe xjal at-xix kyipun; ktzajel tq'o'n q'aq' tu'n tb'aj naj tkyaqil kyipun.

17Ate Dios Xjan, aju Spik'un kye aj Israel, k'okel ik tza'n tqan q'aq' ex tuj junx q'ij che b'el tpatun tkyaqil tqan ch'i'x kyuk'ix ch'i'x k'ul at tuj tx'otx', ex che najel tu'n.

18Te jumajx che najel qe tze' ex qe tqan kyawal tb'anilxix. Che kyjel ten qe ik tza'n jun xjal yab' minti' tipun.

19Ex tu'nju nik'xi tze' che kyjel ten tuj chk'ul, jaku b'ant kyajlet tu'n jun k'wa'l.

20Tuj tq'ijlalil tzul, aju ch'intl xjal aj Israel otoq che kyaj ten, aqeju tiyjil Jacob otoq che kyaj klet, mlay tz'ok qe'tl kyk'u'j kyi'j qeju otoq che b'aj k'ixb'isante kye, noq o'kx k'okel qe' kyk'u'j ti'j Qman aju Dios Xjan kye aj Israel.

21Nik'xi junjun xjal tiyjil Jacob che ajetz meltz'aj tuk'il Dios ma'xix tipumal.

22Aqeye aj Israel, maske nimxix kyajlale ik tza'n ttxa tz'a'n at ttzi mar, pero noq nik'xi junjun k'ajetz meltz'aj.

23Porke ate Qman aju Tajaw Tkyaqil, ma kub' t-ximan tu'n kynaje, ex kb'antel tu'n tuj tkyaqil kytx'otx'e.

24In tma'n Qman kyja', aju Tajaw Tkyaqil: Aqeye xjal etzan wu'ne ex najl qeye tuj tnam Sión, mi'n che xob'e kywitz aj Asiria, maske che b'aj peq'ane tu'n kyvar, ex qa ma che b'aj yajla'ne kyu'n, ik tza'n o kyb'incha aj Egipto.

25Ex ch'ix tpon tq'ijlalil tu'n tchewix nq'oje kyi'je, ex te tib'ajxi che najel aj Asiria wu'ne, chi Qman.

26Ate Qman aju Tajaw Tkyaqil che b'ajel tk'ixb'isa'n, ik tza'n tej kynaj aj Madián tu'n max twi pik Oreb, ex kxel tnuqpi'n tky'aqo'ch tib'aj mar ik tza'n o tb'incha tuj Egipto.

27Tuj q'ij lu k'elel q'i'n aju iqtz o tz'ok kyq'o'n ttzal kyi'je, tuk'ix ju yuw kub' kyq'o'n tib'aj kyqule.

Che ul laq'e' aj q'oj

Qe aj q'oj kyja' kytzaj tumlal tnam Rimón,

28che ul tuj tnam Ajat, che ik'el aj tuj tnam Migrón ex kyjel kyk'u'n kyiqatz tuj tnam Micmas,

29che ik'etz tuj xajb'il a', ax che b'el ten jun qonik'an tuj tnam Geba; qe xjal tuj tnam Ramá ktzajel t-xob'il kyi'j; che elel oq aj Gabaa aju ttanmi Saúl.

30Kyjaw sch'ine aqeye aj Galim. Kyb'inxe aqeye aj Laisa. B'ek'b'il kywitze aqeye aj Anatot.

31Qe aj Madmena che elel oq, qe xjal najl tuj tnam Gebim kxel kyewan kyib'.

32B'i'x ja'lo che web'il jun rat qe aj q'oj tuj tnam Nob; kjawil kyyek'un kyq'ab' te jun techal tu'n kyq'ojin ti'j tnam Jerusalén twi witz Sión.

33Kyke'yinxe, ate Qman aju Tajaw tkyaqil kb'ajel tjachin qe tq'ab' tze' tu'n tipumal xob'ajilxix, kjawil ttx'emin qe tze' ma'xix kywa'l, ex che b'el tz'aq twitz tx'otx'.

34Tu'n siwb'il k'uxb'il kb'ajel ttx'emin aju chk'ul pin tze' tuj, ex qe tze' tb'anilxix ate' twi witz Líbano che b'el tz'aq twitz tx'otx' tu'n tipumal.