Salmos 105 - Mam Huehuetenango New Ortography

Aju b'a'n o tb'incha Dios kyi'j aj Israel

1Kyq'onxe chjonte te Qman ex che kub'sane twitz, kymanxe kye xjal ate' kyuj txqantl nasyon aju o tb'incha.

2Che b'itzane b'itz te nimb'il te. Ex che yoline kyi'j qe tb'inchb'en ma' kyxilen.

3Che tzalajxe ti'j tb'i xjan. Tzalajxwit kyanmi qeju in che jyon ti'j Qman.

4Che laq'exe tuk'il Qman tu'ntzun ttzaj tq'o'n kyipumale; che laq'exe tuk'il tkyaqil maj.

5Kyna'ntze qe tb'inchb'en ma' kyoklen ex nim kyipumal, ex kyna'ntze qe tley tzaj tma'n;

6aqeye tiyjil Abraham aju tmajen Dios ex aqeye tk'wa'l Jacob sk'o'maj qe'ye tu'n.

7Atzun Qman jlu aju Qdios ex in kawin tib'aj tkyaqil twitz tx'otx'.

8Maske ma tzik' jun mil k'loj kyiyjil xjal, ex mlay tzik' tna'l tu'n aju tyol kyaj b'ant ti'j kyuk'il,

9ex mlay tzik' tna'l tu'n aju tyol kyaj b'ant ti'j tuk'il Abraham, ex aju tyol axix tok xi ttziyan te Isaac;

10kyaj tkyuwsa'n ju yol lu te Jacob tu'n tok ik tza'n jun ley, ex kyaj tkyuwsa'n te jumajx te Israel,

11tej tmante: Teya kxel nq'o'ne aju tx'otx' Canaán tu'n tok te tetzb'ila.

12Mya nim kyb'aj tej kyten tuj kytx'otx' aj Canaán ex stranjer xjal qe,

13noq e b'etje' tuj kytx'otx' qe nasyon ex e ten tjaq' kykawb'il qe rey,

14pero minti' xi tq'o'n Dios amb'il tu'n kyyajlanjtz kyu'n txqantl xjal, noqpe xi tma'n kye rey:

15Mi'n tz'ok kyq'o'ne kyq'ab'e kyi'j qe xjal sk'o'maj wu'ne ex mi'n che ok tene yajlal kye qe nsanjele.

16Tzaj we'yaj tu'n Dios tuj tx'otx' Canaán, ex el ti'n tkyaqilju in ajb'en te kywa.

17Pero nej xi sama'n José tu'n Dios tuj tx'otx' Egipto, aju otoq txi kyk'ayin tu'n tok te kymajen xjal.

18O k'ixb'isanjtz tu'n caden ok q'o'n ti'j tqan, ex ok k'alo'n tqul tu'n k'uxb'il te presb'il te.

19Ok José tuj malb'il tu'n tyol Qman maxi tej tjapun b'aj ju yol otoq tma te tjaq'xi.

20Aju rey in kawin kyib'aj nimku xjal xi tma'n tu'n ttzoqpet José;

21ex ok tq'o'n te nejenel tuj tja tu'n tok tkwentin tkyaqilju at te,

22tu'ntzun t-xi tq'o'n xnaq'tzb'il kye qe nejenel ex kye qe tij xjal tu'n tok nim kynab'l.

23Te tib'ajxi pon Israel, aju ax Jacob tb'i, ex o najan ik tza'n jun stranjer xjal tuj tx'otx' Egipto, aju kytx'otx' tiyjil Cam.

24E chmet-xix qe tiyjil Jacob tu'n Dios, ex ok mas kyipun kywitz aj Egipto.

25Ex te tib'ajxi ch'expet kyanmi aj Egipto tu'n Dios, e ok ten yajlal kyi'j qe xjal etzan tu'n, ex e ok ten sb'ul kye qe tmajen.

26Xitzun t-sama'n Dios Moisés aju tmajen, tuk'ix Aarón aju otoq jaw t-sk'o'n,

27ex tu'n Dios kyb'incha qe techal kyuk'ix qe b'inchb'en nim kyipumal tuj tx'otx' Egipto.

28Tzaj t-sama'n Dios qlolj ex b'i'x kub' qloljix tuj tkyaqil part, ex minti' xi kyniman aj Egipto tyol Dios.

29E ok qe nima tu'n te chik', ex b'i'x e naj kykyaqil kyiẍ;

30b'aj noj tuj tx'otx' kyu'n qe ẍal, tuk'ix tuj tja rey.

31Tzaj t-sama'n Dios txqan xmisaq ex saq us, ex b'i'x b'aj noj twitz kytx'otx' aj Egipto kyu'n.

32Te t-xel jb'al tzaj t-sama'n saqb'aqun tuk'ix tqan q'ankyoq tib'aj tx'otx' Egipto.

33B'i'x e naj qe tqan uva ex qe tqan higo awa'n kyu'n; kyuk'ix qe tze' b'i'x e naj tuj Egipto.

34Tzaj t-sama'n Dios txqan ẍplon nimxix wen ex mib'an kyajlanjtz.

35B'aj kywa'n tkyaqil cha'x k'ul tuj kojb'il, tuk'ix tkyaqil awal.

36E kyim qe nej kyk'wa'l aj Egipto tu'n, tujile junjun ja xjal.

37E je'tztzun ti'n Dios qe xjal etzan tu'n q'i'n q'an pwaq tuk'ix saq pwaq kyu'n, ex mi jun o b'aj tipun kyxol junjun k'loj kyiyjil.

38B'i'x e jaw tzalaj qe aj Egipto tej kyke'yinte kub' b'e kyu'n, tu'nju otoq tzaj nim t-xob'il kyi'j.

39Kub' tlik'un Dios jun muj kyib'aj tu'n kyb'et tjaq', ex tzaj t-sama'n jun tqan q'aq' tu'n t-spik'b'ante kyib'aj te qonik'an.

40Xi kyqanin kychi' te Dios, ex tzaj t-sama'n qe tz'uchin te kychi', ex noj kyk'u'j tu'n wab'j tzaj t-sama'n Dios twitz kya'j.

41O pax pik tu'n ex etz a' tuj ex o b'et ik tza'n jun nima tuj tzqij tx'otx'.

42Tzaj tna'n aju yol xjan otoq txi ttziyan te Abraham aju tmajen.

43Kyja'tzun tten e je'tz ti'n Dios qe xjal etzan tu'n, ex qeju sk'o'maj tu'n in che b'itzan ex in che sch'in tu'n tzalajb'il.

44Xi tq'o'n tx'otx' kye, aju kytx'otx' txqantl nasyon, tuk'ix tkyaqil kyawal ex tkyaqilju kyaq'unb'en,

45tu'ntzun t-xi kyniman aju tley Qman ex tu'n kyjapun qe tmandamyent kyu'n.

Nimanxwit tb'i Qman.