Isaías 49 - Mam Huehuetenango New Ortography

Aju tmajen Qman spik'un kye nasyon

1Chin kyb'intze aqeye tnam tkub'sa'n ttzi mar; kyq'ontz kywi'ye ti'j nyole aqeye nasyon najchaq ate'ye: Ate Qman jaw sk'on weye tej na'nxtoq wul itz'je, ok tq'o'n nb'iye atxix tej atinxe tuj talb'il ntxu'ye.

2Ok tq'o'n ntzi'ye ik tza'n jun spad b'anin ttzi', ex ewan qine tuj tq'ab' tu'n nklete; ma chin ok tq'o'n ik tza'n jun plech tz'u'p twi' ex ma chin ku'x tq'o'n tuj tkub'il.

3Tzaj tma'n weye kyja': Aqeye aj Israel nmajene qeye, kyi'je kjawil nimsa'n nb'iye.

4Atzun weye otoq kub' nximane kyja': Noqx gan ma chin aq'nane ex noqx gan ma b'aj nnajsa'ne wipune, pero ax tok ate Qman kkolil wi'je, ex aju twi nk'u'je tuk'il Dios ta'.

5Ma nk'ame jun woklene tuk'il Qman aju Ndiose, ex ma tzaj tq'o'n wipumale. Ate Qman o poq'sante weye max tuj talb'il ntxu'ye tu'ntzun woke te tmajen, ex tu'n tajtz kyi'j qe aj Israel aqeju tiyjil Jacob, ex tu'n tok kychmon kyib' tuk'il Qman.

6Chi Qman weye kyja': Mya noq o'kx tu'n toka te nmajene, ex mya noq o'kx tu'n tok juntl maj kyoklen qe tiyjil Jacob tu'na ex tu'n kyul meltz'aj aj Israel aqeju e kyaj klet; ax ikx k'okela te spik'un wu'ne kye txqantl nasyon, tu'n t-xi tma'na tuj tkyaqil twitz tx'otx' aju kolb'il wu'ne, chi Qman.

7Ate Qman aju kolpil qe, aju Dios Xjan kye aj Israel, in tma'n teju tnam ik'un kyu'n txqantl tnam ex o txi tzyu'n tu'n tok te kymajen qe txqantl rey: Ok kyke'yinjtze kyu'n qe rey ex kyu'n qe nejenel, che jawil we' ex che b'el ẍmeje' kywitze, porke aqine Kymane aju Dios Xjan kye aj Israel o chin jaw sk'onte kyeye, ex in japun ju nyole tziyimaj wu'ne kyeye.

Tqanil tu'n tjaw b'inchet juntl maj tnam Jerusalén

8Chi Qman kyja': Tuj tq'ijlalil xtalb'il nb'iye tyola: Tuj tq'ijlalil kolb'il tzaj nq'o'ne onb'il teya. Kwentina wu'ne tu'n tkyaj b'ant ti'j jun nyole kyuk'il tnam noq tu'na, tu'n kyjaw b'inchet juntl maj qe kytanmi aj Israel, tu'ntzun kyok juntl maj te tajwil tx'otx' aju otoq naj,

9ex tu'n t-xi q'met kye qe pres: B'a'n tu'n kyetze; ex tu'n t-xi q'met kye qe najl tuj qlolj: B'a'n tu'n kyetze tuj qlolj tu'ntzun kytene tuj spik'un. Tuj tkyaqil part te kyb'e ok kyaj meltz'aj knetel kywa, ex noq alkye part twi witz tz'la'j kyi'j knetel kywa, ik tza'n in knet kywa alumaj.

10Mlay tzaj we'yaj kyi'j mi txqetle'n, ex mlay che naj tu'n ta'w q'ij ex mi tu'n ta'w kyaq, porke k'ujla'n qe wu'ne ex ẍaqlu'n qe, ex che xel wi'ne jatum in jatz jlet kywi a'.

11Kjaqetel jun b'e wu'ne kyxol qe witz, ex che okel qe b'e te chq'ajlaj wu'ne.

12Kyke'yinxe, lu qe che ul, najchaq ma che tzaj, txqan ma che tzaj tuj tx'otx' tuj tb'anq'ab' q'ij ex txqantl tuj telex q'ij ex junjuntl ma che tzaj tuj tx'otx' Sinim.

13Aya kya'j, sch'ina tu'n tzalajb'il. Aya tx'otx', tzalajxa nim. Aqeye witz, tjaw tq'ajq'ajel kywi'ye kyuw wen tu'n tzalajb'il. Porke tu'n Qman ma q'uqb'anjtz kyk'u'j xjal etzan tu'n, ex ma tzaj tz'e'y tk'u'j kyi'j tuj ju yajb'il kye.

14Otoq kyma aj Sión kyja': Ma qo kyaj koline tu'n Qman, ma tzik' qna'le tu'n, che chi.

15Atzunte Dios in tma'n kyja': ¿Jakupe tzik' tna'l tu'n jun txuyb'aj tu'n mi'n tk'ujlante tal? B'alo jaku tzik' tna'l tu'n, atzun weye, mlay tzik' kyna'le wu'ne.

16Porke b'i'x tz'ib'an kyb'iye wu'ne twitz nq'ab'e, ex kukx in chin ximane kyi'j qe muro toksa'n ti'j kytanmiye.

17Lu che ul naj qe xjal tu'n tjaw kyb'incha'n kytanmiye juntl maj; atzun qeju e b'aj xitun kytanmiye mi'n che tentl.

18Kyi'n jaw kywitze jawni ex kyke'yinxe kyi'jele, nib'an tb'aj kychmon kyib' kykyaqil xjal tu'n kypon juntl maj kyuk'ile.

Aqine Dios in xi nma'ne jun nyole axix tok: Kykyaqil jlu ik che okel ik tza'n jun tb'anil uwj tu'n tkub' kyq'o'ne kyqule, ik tza'n uwj in kub' tq'o'n jun q'apoj tqul te tachb'il ok tmoje'.

19Aju kytanmiye tuk'ix kytx'otx'e o che kub' xitj ex o che naj, atzun ja'lo mlay kanun kytx'otx'e tu'n kynajan xjal tuj, tu'nju tal ch'in. Qeju e kub' xitunte kytanmiye che elel laq'e' najchaq kyi'je.

20Qe kyk'wa'le otoq che naj tuj kywitze, ktzajel kyma'n kyeye kyja': Aju tx'otx' mlay kanun te qeye, kyq'ontze txqantl lugar tu'n qnajane twitz.

21Atzun kyeye ok kyma'ye tuj kyanmiye kyja': ¿Alkye ma tzul alinte qe qk'wa'l lu? Minti'toq qk'wa'l nej ex minti'toq tu'n kytzaj tu'nju otoq qo'x q'i'n pres ex otoq qo ex lajo'n. ¿Alkye xch'isan kye? Otoq qo kyaj kolin qjunalx, ¿jatum ma che tzaj qe k'wa'l lu? Che chiloye.

22Chi Qman Dios kyja': Che tzajel ntxko'ne qe nasyon tu'n nq'ab'e ex kb'el nwab'ane jun bander te jun techal kye tnam, tu'n ttzaj kypalo'n qe kyk'wa'le xinaq tuj kyq'ab' ex qe kyk'wa'le xu'j twi kysemil.

23Qe rey che okel te kymamb'ile ex qe kyme'jel rey che okel te kytxu'b'le. Che b'el ẍmeje' kywitze, max kpol takl tib'aj kywitz twitz tx'otx', kb'el kymansin kyib' kywitze ex che ajb'el kyeye. Atzun k'elel kynik'e wi'je qa aqine Dios aju Kymane, ex qe xjal q'uql kyk'u'j wi'je mlay kub' kych'ixwi.

24¿Jakupe tz'el q'i'n tuj tq'ab' jun xjal at nim tipun aju otoq tkamb'a tuj q'oj? ¿Jakupe tzoqpaj jun pres tuj tq'ab' ju xjal kyuwxix kawin?

25Chi Qman kyja': Jaku tz'el q'i'n te jun xjal at tipun tu'n tq'ojin aqeju pres otoq che tzyet tu'n tuj q'oj, ex jaku tz'el q'i'n te jun xjal kyuwxix kawin aju otoq tkamb'a tuj q'oj. Atzun kyeye, aqine chin q'ojlel kyuk'il qe xjal in che jyon q'oj kyi'je ex ax qine chin klol kye qe kyk'wa'le.

26Ok che okel njwersine qeju yajlal teya tu'n tkub' kyb'yon kyib' kyxolx, ex kchyo'l kywi' tu'nx kychk'el ik tza'n in chyo'n kywi' tu'n kyk'a vin. Atzun k'elel kynik' kykyaqil xjal wi'je qa aqine Dios aju Klol kyeye, aqine Tdios Jacob at wipumale ex ax qine kolpil kyeye.