Números 31 - Mam Huehuetenango New Ortography

Tej kynaj aj Madián

1Tzaj yolin Qman tuk'il Moisés ex tma:

2Q'on aja t-xel kyi'j aj Madián ti'j ju ma kyb'incha kyi'j aj Israel, ex te tib'ajxi jlu kymela.

3Xitzun tma'n Moisés kye tnam xjal kyja':

Kyi'ntz kymakb'ile junjun kyeye, aqeju in che ajb'en tuj q'oj, kyxi'ye ex e kyok tzoqpaje kyi'j aj Madián, tu'ntzun t-xelin kyi'j tu'n Qman.

4Teyle junjun k'loj kyiyjil aj Israel b'a'n tu'n t-xi t-sama'n jun mil xinaq tuj q'oj, chi Moisés.

5Kyja'tzun e jaw sk'et jun mil soldad kyxol teyle junjun k'loj kyiyjil aj Israel; japun kab'laj mil kyb'et, ex q'i'mlex kymakb'il tu'n kyxi' tuj q'oj.

6E je'xtzun sama'n tu'n Moisés tu'n kyxi' tuj q'oj junx tuk'il Finees aju tky'ajal pal Eleazar, ex atzunte xi q'inte qe makb'il xjan, kyuk'ix qe chun, tu'ntzun kyok q'ajtzet ok ttzyet q'oj.

7E oktzun ten q'ojlel kyi'j aj Madián ik tza'n otoq tma Qman te Moisés, ex e kub' kyb'yo'n kykyaqil xinaq aj Madián.

8Ax ikx kub' kyb'yo'n aj Israel jwe' rey kye aj Madián, ex atzun qe jlu: Evi, Requem, Zur, Hur ex Reba. Ax ikx kub' b'yo'n Balaam kyu'n, aju tky'ajal Beor.

9E tzajtzun q'i'n qe xu'j aj Madián kyu'n aj Israel, kyuk'ix qe tal k'wa'l, ex qe kyẍne'l, qe kywakẍ ex tkyaqil kyq'inumab'l.

10Ax ikx kub' kypatun kykyaqil kytanmi aj Madián ex kykyaqil aldey.

11Ex tkyaqilju otoq tz'el kyi'n, tza'nx qe xjal ex qe alumaj,

12xi kyi'n tuk'il Moisés, tuk'il pal Eleazar ex kyuk'il tnam xjal aj Israel, tuj campament tuj tchq'ajlajil tx'otx' Moab ttzi nima Jordán, tumlal twitz tnam Jericó.

13Atzunte Moisés tuk'ix pal Eleazar ex kykyaqil nejenel kye tnam xjal, e je'tz kanul kyi'j ti'jxi campament.

14Ex tzaj tq'oj Moisés kyi'j qe nejenel kye jun milchaq ex jun syentchaq soldad otoq che'x aj tuj q'oj,

15ex xi tma'n kye kyja':

—¿Tiqu'n minti' ma kub' kyb'yo'ne qe xu'j?

16Kyu'nlpe qe xu'j lu jaw kyi'n kyib' aj Israel ti'j Qman ex e k'ulun twitz tilb'ilal Baal-peor, noq tu'n tconsej Balaam. Kyja'tzun tzaj t-sama'n Qman tx'u'j yab'il tib'aj tnam etzan tu'n.

17Ja'lo kyb'yon kub'e kykyaqil tal q'a ex kykyaqil xu'j o kyilxi xinaq.

18Atzun qe txin na'nx kylonte xinaq, b'a'n tu'n kykyaj anq'in ex tu'n kykyaj ten kyuk'ile.

19Ex kykyaqil qeju ma che kub' b'yonte jun xjal ex qa ma tz'ok tmako'n t-ximlal jun kyimni, il ti'j tu'n kykyaj ten wuq q'ij ti'jxi campament. Tuj toxin q'ij ex tuj twuqin, kysaqsan b'aj kyib'e, tza'nxix aqeye ax ikx qeju ma che tzaj kyi'ne pres.

20Ax ikx kysaqsan b'aje kykyaqil xb'alun, kykyaqil makb'il tz'u'm, kykyaqil xb'alun ttzmal chip ex qe makb'il tze', chi Moisés kye.

21Atzunte pal Eleazar xi tma'n kye kykyaqil soldad otoq che'x aj tuj q'oj:

—Atzun ley lu tzaj tma'n Qman te Moisés:

22Qe makb'il q'an pwaq, saq pwaq, q'an k'uxb'il, k'uxb'il, k'uxb'il estaño ex plom,

23kykyaqil qeju mlay che naj tu'n q'aq', il ti'j tu'n kysaqset tu'n q'aq', ex te tib'ajxi tu'n kyb'aj tx'jet tu'n a' te saqsab'l; atzun qeju in che naj tu'n q'aq', b'a'n tu'n kysaqset o'kx tu'n a'.

24Tujtzun twuqin q'ij il ti'j tu'n tb'aj kytx'jo'ne kyxb'alune, ex che saqseteltzune. Te tib'ajxi, b'a'ntzun tu'n kyokxe tuj campament.

B'aj sipet aju otoq tz'el kyi'n soldad tuj q'oj

25Tzaj tma'n Qman te Moisés:

26Aya tuk'ix pal Eleazar ex qe nejenel kye junjun k'loj kyiyjil aj Israel, kyajlan kub'e jte' xjal ex jte' alumaj ma tz'el kyi'n soldad tuj q'oj;

27te kab'e tz'el tu'na, ex sipanxa mij kye soldad ma che'x aj tuj q'oj, ex atzun mijtl sipanxa kyxol tnam xjal minti' ma che'x aj tuj q'oj.

28Ti'j mij kb'el t-sipana kyxol soldad, q'i'n ela ch'in weye, tza'nx kyi'j xjal ax ikx kyi'j wakẍ, bur ex ẍne'l. Jun k'elel ti'na ti'j jwe' syentchaq,

29ex kxel tq'o'na te pal Eleazar ik tza'n jun oyaj te weye.

30Ax ikx kyi'j mijtl kb'el t-sipana kyxol txqantl aj Israel, tza'nx kyi'j xjal ax ikx kyi'j wakẍ, bur ex ẍne'l, ex qa kyi'j kykyaqil alumaj, q'i'n ela ch'in kyi'j, jun kyi'j sincuentchaq, ex kxel tq'o'na kye aj Leví, aqeju in che kwentin ti'j njaye, chi Qman.

31Atzunte Moisés ex Eleazar o kyb'incha ik tza'nx otoq tma Qman te Moisés.

32Tkyaqilju otoq tz'el q'i'n kye aj q'oj ex minti' e ok te tajlal aju kye soldad otoq b'aj kyu'n, japun tajlal te 675,000 ẍne'l,

33ex 72,000 wakẍ,

34ex 61,000 bur,

35ex 32,000 q'apoj na'nxtoq tkyil xinaq.

36Aju mij xi q'o'n kye soldad, japun jun tajlal te 337,500 ẍne'l,

37ex aju xi q'ot te Qman, japun jun tajlal te 675 ẍne'l,

38ex ti'j 36,000 wakẍ, xi q'ot 72 te Qman,

39ex ti'j 30,500 bur, xi q'ot 61 te Qman,

40ex ti'j 16,000 q'apoj, xi q'ot 32 te Qman.

41Aju xi q'ot te Qman, xi tq'o'n Moisés te pal Eleazar ik tza'nx otoq tma Qman te Moisés.

42Atzun mijtl el tpa'n Moisés ti'j ju xi tq'o'n kye soldad otoq che'x aj tuj q'oj, xi tq'o'n kye txqantl aj Israel,

43ex ax tajlal o japun kyja': 337,500 ẍne'l,

44ex 36,000 wakẍ,

45ex 30,500 bur,

46ex 16,000 q'apoj na'nxtoq tkyil xinaq.

47Ti'jtzun mij lu el ti'n Moisés jun ti'j sincuentchaq, tza'nx kyi'j xjal ax ikx qe alumaj, ex xi tq'o'n kye aj Leví, aqeju in che ajb'entoq tuj tja Qman, ik tza'nx otoq tma Qman te.

48Atzun kye nejenel kye jun milchaq ex jun syentchaq soldad e pon tuk'il Moisés,

49ex xi kyma'n te: Ma jaw jun tajlal qu'ne, aqo'ye ajb'el teya, kyi'j qe soldad e ten tuj qkwente, ex minti' jun atx taj.

50Kyja'tzun ma tzaj qi'ne qe ti'xti q'an pwaq ma che knet qu'ne: Lu qe tqul q'ab'aj, qe caden in che kub' ten tqul q'ab'aj, qe xmulq'ab'aj, qe tuj ẍkyinb'aj, ex txqantl adorn, ma tzaj qi'ne te oyaj te Qman, tu'ntzun tkub' tnajsa'n qpaltile, che chi qe nejenel kye soldad.

51Atzunte Moisés tuk'ix pal Eleazar xi kyk'mo'n tkyaqil ti'xti q'an pwaq lu tok tilb'ilal kyi'j.

52Aju q'an pwaq xi q'o'n te oyaj te Qman kyu'n qe nejenel kye jun milchaq ex jun syentchaq soldad, mas te kyaje quintal el talil.

53Teyle junjun soldad otoq tzaj ti'n ch'in ti'xti kyi'j aj q'oj tu'n tajb'en te kye.

54Xitzun kyk'mo'n Moisés ex pal Eleazar aju q'an pwaq pon kyi'n qe nejenel kye soldad, ex xi kyi'n tuj ja xb'alun te mojb'ab'l tib'il tu'ntzun kytzaj na'n aj Israel tu'n Qman.