Judas 1 - Mam Huehuetenango New Ortography

Jun q'olb'eb'l tu'n Judas

1Aqine Judas tmajen Jesucrist qine ex titz'in Jacobo qine. In xi ntz'ib'ane jlu kyeye, aqeye ma che txkonjtze tu'n Qman Dios, ex k'ujla'n qeye tu'n, ex kwentin qeye tu'n Jesucrist.

2Awt Qman Dios tzaj q'aq'an tk'u'j kyi'je ex tu'n tqe'xix kyk'u'je, ex tu'n tten kyk'ujlalile nimxix.

Aju xnaq'tzb'il mya ax tok in kyq'o'n xjal nik'al yol 2 Pedro 2.1-17

3Aqeye erman at nk'u'je kyi'je, nimxix o wajb'eye tu'n t-xi ntz'ib'ane kyeye ti'j ju kolb'il qe qkyaqil; pero ja'lo ilxix ti'j tu'n t-xi ntz'ib'ane kyeye ex tu'n t-xi nq'o'ne kynab'le tu'n tok tililxix kyu'ne tu'n mi'n tnaj qokslab'l; aju yol ma qoksla, te jumajx ma tzaj toqxenan Dios qe, aqeqo' okslal qo'.

4Porke at junjun xjal sb'ul ma tz'okx kyq'on kyib' kyxol okslal; b'i'x kyaj b'ant ti'j ojtxi tu'n tkub' kysentens xjal lu, porke mya nimal Dios qe, in kyaj kykolin t-xtalb'il Qdios, ex in xi kyq'on kyib' tu'n kyb'inchante tkyaqilju kyajb'il, minti' kyjuk'b'il kyib' ex minti' kyaj ti'j tu'n kyten tjaq' tkawb'il Dios o'kxte Dios Tajaw Tkyaqil, ex minti' kyaj ti'j tu'n kyten tjaq' tkawb'il Qajaw Jesucrist.

5Kyja'tzun wajb'ile tu'n ttzaj nna'ntle juntl maj kyeye, maske b'i'majtl tkyaqil jlu kyu'ne, e naj qe xjal aj Israel tu'n Qman, aqeju minti' xi kyniman tyol, ex otoq che klet tu'n nej tej kyetz ti'n tuj tx'otx' Egipto.

6Ax ikx jun k'loj anjel kyaj kyq'o'n kyoklen ex kyaj kykolin kyex kynajb'il, kyja'tzun presin qe tu'n Dios, ex k'alo'n qe tu'n caden tuj qlolj te jumajx, tzyu'n qe tu'n tkub' kycastiw tuj tq'ijlalil jwisi tuj jun q'ij ma' toklen.

7Ik tza'n qe xjal tuj tnam Sodoma ex tuj tnam Gomorra kyuk'ix qe txqantl tnam ti'jele, e yaẍin ex xi kyq'on kyib' tuj achb'il aju elni ti'j kwent, ex tzaj jun castiw kyib'aj, e naj tu'n q'aq' te jumajx, tu'n kyok te jun yek'b'il kye kykyaqil xjal, ik tza'n o b'aj kyi'j jun k'loj anjel tzaj jun castiw kyib'aj.

8Ikxtzun kyten qe xjal lu, mer ik tza'n in che witzky'an, in b'aj kytz'ilsa'n kychib'jal; kyk'i' tu'n kykub' kawin tu'n Qman, ex in che yasun kyi'j qeju at mas kyoklen tuj kya'j.

9Pero mya ik tten tmod Miguel aju nejenel kye anjel, porke tej tq'ojin Miguel tuk'il tajaw il e jaw kub' tuk'il yol ti'j t-ximlal Moisés, minti' ok tnimarin tib' Miguel tu'n tok ten yasul ti'j tajaw il, ex minti' kub' t-sentens tu'n, noq o'kx tma: Awt Qman mayonte teya.

10Atzun qe xjal lu in che yolin mya b'a'n ti'j ju minti' ojtzqi'n kyu'n; ex atzunju kyachb'il ojtzqi'nxix kyu'n kytzajlenx, mas in che naj tu'n ik tza'n qe jil minti' kynab'l.

11B'ek'b'il kywitz porke in kyb'incha'n ik tza'n te Caín o tb'incha. Ex ma che el txalpuj ik tza'n te Balaam, noq tu'n tknet kykamb'ab'l; ex ma che naj tu'nju in che q'ojin ti'j Dios ik tza'n te Coré.

12Aqe jlu ik kyten ik tza'n jun tz'il kyxole, in tzaj kych'ixwiye kyu'n ok nno'k nintz wa'n kyu'ne; in che wa'n kyuk'ile minti' in tzaj ch'in kych'ixwi, ik kyten jlu ik tza'n qe pastor ẍne'l minti' in che ok kykwentin qe kyẍne'l, ex o'kx in che ximan kyi'jx tu'n tok kyk'a'chan kyib'. Ik kyten jlu ik tza'n muj minti' a' tuj, noq jachaq in pon q'i'n tu'n kyq'iq'; ik kyten ik tza'n jun tze' tzqij minti' t-xaq ex minti' twitz; kyimni qe te jumajx ex b'aqo'nmaj qe.

13Ik kyten ik tza'n mar in xtulq'in in q'ojl wen ex in kyaj tq'o'n spum, ik tten kyb'inchb'en xjal lu ik tza'n t-spumil mar puro ch'ixb'ajil kyb'inchb'en. Ik kyten ik tza'n qe che'w in che txalpuje'; b'animaj jun lugar kye xjal lu tu'n kyxi q'o'n tuj qlolj puro qxopin te jumajx.

14O yolin Enoc kyi'j xjal lu, ax Dios tzaj q'mante te. Ate Enoc tal tchman Adán, tiyjil twuqin k'loj xjal. Chi Enoc tma kyja': Lu tzul Qman kyuk'ix qe t-anjel xjan nimxix kyajlal.

15Tzul Qman q'ol jwisi kyib'aj kykyaqil ex tu'n tel tuj q'ancha'l kyb'inchb'en xjal mya nimal Dios qe ex mya b'a'n kyb'inchb'en, ex tu'n tel tuj q'ancha'l kyyol qe aj il mya nimal Dios qe, aqeju ma che yolin kyuw ti'j Qman, chi Enoc.

16Qe xjal lu noq in che wululun ti'j ju in b'aj, ex minti' jun b'a'n nne'la tuj kywitz, o'kx at kygan ti'j kyex kyajb'il. Nim in che yolin ti'j kynimb'il kyib', mejor che xmoxin kyi'j xjal tu'n tkub' kyi'j xjal kyu'n tu'ntzun kykamb'ante jun ti'xti.

In tq'o'n Judas kynab'l okslal

17Atzun kyeye erman at nk'u'je kyi'je, kyna'ntze qe yol kyaj kyma'n qe apostol te Qajaw Jesucrist ojtxi.

18Porke che chi apostol o kyma kyeye: Tuj mankb'il tq'ijlalil che ul qe xmayil in kyb'incha'n kyex kyajb'il mya b'a'n, che chi apostol.

19Atzun qe jlu in che kub' q'onte pab'l tib' kyxol xjal; o'kx tok kyximb'etz ti'j ju te twitz tx'otx', minti' T-xew Dios tuj kyanmi.

20Atzun kyeye erman at nk'u'je kyi'je, kykyuwsam kyib'e tuj kyokslab'le, aju kyokslab'le xjan, ex che na'ne Dios ik tza'n in tma'n Xewb'aj Xjan.

21Ax che tenkje tuj tk'ujlalil Dios; che ayone ti'j Qajaw Jesucrist, tu'n ttzaj q'aq'an tk'u'j kyi'je tu'n ttzaj tq'o'n kychwinqlale te jumajx.

22At junjun in jawje' kyk'u'j; kykyuwsame kynab'l.

23Ex kyi'metze junjuntl tuj q'aq' tu'n kyklet; ex q'aq'anx kyk'u'je kyi'j junjuntl, pero atwit kyxob'ile, ex atwit kykwente ti'j tu'n mi'n kytz'ilixe tu'n tajb'il kychib'jal xjal lu; ik tten jlu ik tza'n jun xb'alun puro tz'il.

In jaw nimsa'n tb'i Dios

24Ate Dios at tipumal tu'n kyok kwentine tu'n, tu'n mi'n kykub' tz'aqe, ex at tipumal tu'n kyxi q'i'ne tu'n, tu'n kytene twitz tuj t-spik'umal tuk'il nim tzalajb'il ex minti' kypaltile.

25O'kxte Dios at tnab'l, atzun Klol qeju; nimanxwit ju tb'i ex tu'n tten tchiylal tuj kywitz kykyaqil, ex awt tu'n tkawin tib'aj tkyaqil, ex tenwt tipumal tib'aj tkyaqil, noq tu'n Qajaw Jesucrist, ojtxi ex ja'lo ex tuj tkyaqil tab'q'iyil te jumajx. Ikxwitju.