Job 41 - Mam Huehuetenango New Ortography

1Yajtzunju nintz txkup Leviatán tb'i, ¿jakupe jatz tu'na tu'n answel? ¿Jakupe k'alet taq' tu'na tu'n jun ky'jaj?

2¿Jakupe tz'ex tq'o'na jun ky'jaj tuj ttxa'n ex qa tu'n tjaw tjak'u'na tjaq' ttzi' tu'n jun answel?

3¿Jakupetzun kub'san twitza tu'n ttzaj tz'e'y tk'u'ja ti'j ex cheb'a tu'n ttzaj tma'n teya?

4¿Baqa jaku b'ant tu'na tu'n ttzaj ttziyan teya tu'n tok te tmajena te jumajx?

5¿Jakupe tz'ok tena saqchal tuk'il ik tza'n tuk'il jun chyu'j? ¿Jakupe k'alet tu'na tu'n tok te kychaq qe tal tme'jela?

6¿Jakupe che lijensin qe tzyul kyiẍ ti'j? ¿Jakupe kub' kyqesin tu'n t-xi kyk'ayin?

7¿Jakupe txi' tz'upl tplecha tuj ttz'umal ex jakupe txi' tz'upl tlansa tuj twi'?

8Noqpe qa ma pon tq'o'na tq'ab'a tib'aj, jurat k'okel tzoqpaj ti'ja; mlay tzik' tna'l tu'na ex mlay tb'inchaya juntl maj.

9Noq o'kx qa ma tz'ok ke'yin aju nintz txkup Leviatán tu'n jun xjal, jurat naj jaku kub' numj xjal tu'n t-xob'il.

10Qa at jun ma tz'okx ik'len te, in tzaj naj tq'oj ex mi a'l jun jaku tnimari tib' tuk'il.

11¿Alkye jun xjal jaku klet ex mi'n tza'w qa ma tz'ok tzoqpaj ti'j? Mi jun tuj enter twitz tx'otx'.

12Mlay tz'el ti'j tu'n nyoline ti'j t-ximlal tb'anilxix ke'yin ex ti'j tipumal nimxix.

13¿Alkye jun jaku tz'el q'inte ttz'umal tok ti'j ex qa tu'n t-xoptz'aj ttz'umal aju in ajb'en te tkolb'il tib'?

14¿Alkye jun jaku tz'el jachinte tuj ttzi' tu'n kylaj qe twitz te' txolin kyel ex xob'ajilxix che ke'yin?

15Aju ttzal ti'j mer ik tza'n maqb'il txolin kyel ti'j ex kyuw qe wen ik tza'n ab'j,

16tlatz'in tib' jun ti'j juntl; mi ju kyq'iq' mlay tz'okx tuj;

17kymojb'an kyib' ex kyq'e'tin kyib' wen, mi a'l jun jaku tz'el pa'nte kye.

18Ok in tzaj q'ajt tuj ttxa'n, mer ik tza'n tqan q'ankyoq, ex qe tb'aq' twitz in che qoptz'aj wen ik tza'n q'ij ok tjawil te prim.

19Mer ik tza'n tqan q'aq' nne'tz tuj ttzi', ex in che etz k'ech tuj.

20Nne'tz sib' tuj ttxa'n, mer ik tza'n jun k'il a' in loqin tib'aj q'aq'.

21B'i'x in k'ant xq'a'l tu'n t-xew ex nne'tz tqan q'aq' tuj ttzi'.

22Aju tqul puro kyuw wen, ex kykyaqil xjal in tzaj kyxob'il twitz ju txkup lu.

23Ax ikxpe tchib'jal kyuw wen, mer ik tza'n k'uxb'il.

24Puro kyuw tanmi, mer ik tza'n jun ab'j ex ik tza'n jun kya'.

25Ok tjaw we' txkup lu, b'i'x in che tzaj xob' qeju at nimxix kyipun ex in che el oq in che xob' wen.

26Ok taq'pon tzoqpi'n spad ti'j, ex qa lans ex qa plech ex qa lans ch'in tqan, minti' ch'in kyilwi.

27Mer ik tza'n ch'im nne'l k'uxb'il tuj twitz, ex mer ik tza'n q'u'chin tze' nne'l q'an k'uxb'il tuj twitz.

28Ok t-xi xo't plech ti'j mlay tz'el oq; ok t-xi xo't ab'j ti'j, mer ik tza'n ch'im in xi xo'n ti'j nne'l tna'n.

29Ok taq'pon tzoqpi'n jun garrot ma' tk'itz ti'j, mer ik tza'n jun ajlaj nne'l tuj twitz ex in jaw tze'n ti'j tq'ajq'ajel lans ch'in tqan ok t-xi xo't ti'j.

30Ok t-xi tjaqun tib' twitz tx'otx', b'i'x in xi julix tuj tx'otx', mer ik tza'n texlen ttzi punt.

31B'i'x in jaw pulin nintz mar ma' t-xe' tu'n, mer ik tza'n jun k'il in pulin a' tuj tib'aj q'aq', ex kyja'tl nno'k tu'n ik tza'n jun k'il tkub'il perjum in pulin tib'aj q'aq'.

32Ok in b'et tuj a' b'i'x in kyaj tik'len puro saq, in qoptz'aj ik tza'n ttzmal wib'aj puro saq wen.

33Tuj enter twitz tx'otx' minti' jun nch'isb'ene in pon ik tza'n te, minti' ch'in in xob'.

34Ok in che'x tke'yin kykyaqil txqantl txkup jawni qe, minti' nne'l xob' kyi'j, porke a rey kye, chi Dios b'aj tma'n te Job.