Deuteronomio 12 - Mam Huehuetenango New Ortography

Junx lugar tu'n kypon k'ulul te Dios

1Atzun qe ley lu ex qe xnaq'tzb'il il ti'j tu'n kyjapun kyu'ne tkyaqil q'ij ok kytene tuj tx'otx' aju tzaj ttziyan Qman Dios kye kyxe'chele tu'n tok te kyetzb'ile.

2B'i'x che b'ajel kyxitune te jumajx kykyaqil lugar jatum in che k'ulun qe xjal kywitz kydios, aqeju k'elel kyi'ne kytx'otx' tu'n tok te kyetzb'ile: Che b'ajel kyxitune qe lugar lu kywi' qe nmaq witz, kywi' qe tal witz ex kyjaq' qe tze' nim kyxaq.

3Kyxitun kub'e qe ky-altar, kypa'n kub'e qe ab'j b'inchamaj kyu'n te kydios tu'n kyk'ulun kywitz, kypatun kub'e qe kydios b'inchamaj kyu'n ti'j tze', ex kyq'uchin b'aje qe tilb'ilal kydios; kykyaqil qe jlu b'i'x che najel kyu'ne, tu'ntzun mi'n kytzaj na'ntl kyu'n xjal.

4Mi'n che k'ulune twitz Qman Dios noq tuj alkyex lugar.

5Ax kyxol kab'laj k'loj kyiyjile, kjawil t-sk'o'n Qman jun lugar jatum tu'n tten tnajb'il ex te nab'l tb'i, ex tujtzunju lugar lu b'a'n tu'n kyxi'ye k'ulul twitz.

6Atzun kpol kyi'ne qe alumaj tu'n kykub' patit te oyaj, qe alumaj te chojb'il, qe tlaji'n, qe kyoyaje yek'un in xi' twitz Qman, qe oyaj kxel kytziyane te Qman, ex qe txqantl oyaj tu'n kyexe kygan kxel kyq'o'ne, ax ikx qe kynejel kyal kywakẍe ex qe kynejel kyal kyẍne'le.

7Atzun che wa'le twitz Qman Dios, ex che tzalajele ti'j twitz kyaq'unb'ene junx kyuk'il qeju ate' tuj kyjaye, tu'nju otoq che kub' ky'iwla'ne tu'n Qman Dios.

8Mi'n kyb'inchaye ik tza'n in qb'incha'n ja'lo, teylex te junjun in tb'incha'n aju b'a'n tuj twitz,

9tu'nju na'nx kypone tuj lugar te ojlab'l tuj kyetzb'ile, aju ktzajel tq'o'n Qman Dios kyeye.

10Ex kyik'xlenxiye tuj nima Jordán, ex ok kynajane tuj tx'otx' aju ktzajel q'o'n te kyetzb'ile tu'n Qman Dios, ok t-xi kykolin aj q'oj tu'n kyq'ojin kyi'je, aqeju txolin kyi'je kyu'n, ex ok kytene minti'tl xob'ajil kyi'je,

11kpoltzun kyi'ne tkyaqilju o txi nma'ne kyeye tuj lugar kjawil t-sk'o'n Qman Dios te nab'l tb'i: Qe alumaj patun in che kub', qe chojb'il, qe tlaji'n, qe kyoyaje yek'un in xi' twitz Qman, ex tkyaqil oyaj tb'anilxix kxel kytziyane te Qman,

12ex che tzalajeltzune twitz Qman Dios junx kyuk'il qe kyky'ajale ex qe kyme'jele, qe kymajene xinaq ex qe kymajene xu'j, kyuk'ix qe aj Leví najl kyxole, ex mi'n tzaj q'o'n jun piẍ tx'otx' te kyetzb'il qe aj Leví, ik tza'n kyeye.

13Kyq'onke kwent kyi'je tu'n mi'n tkub' kypatune alumaj te kyoyaje tuj noq alkyexku lugar;

14noq o'kx che pole q'olte kyoyaje tuj lugar kjawil t-sk'o'n Qman kyxol kab'laj k'loj kyiyjile. Atzun kb'antel kyu'ne tkyaqilju ma txi nma'ne kyeye.

15Maske ikju, ex b'a'n tkub' kyb'yo'ne alumaj ex b'a'n t-xi kychyo'ne noq tuj alkyex lugar jatum najl qeye, noq alkyex q'ij kyajb'ile ex noq alkyex ktzajel q'o'n kyeye tu'n Qman Dios. Qa tz'il qeye ex qa saq qeye ik tza'n in tma'n ley, b'a'n tu'n t-xi kychyo'ne, ik tza'n in xi chyo't tchib'jal masat.

16Atzunju tchk'el mi'n txi kychyo'ne, ax kb'el kyqo'ne twitz tx'otx' ik tza'n a'.

17Mi'n txi kywa'ne kyuj qe kytanmiye aju tlaji'n ti'j twitz kytriwoye, mi'n txi kyk'a'ne aju tlaji'n ti'j ta'l twitz ky-uvaye, ex mi'n txi kychyo'ne aju tlaji'n ti'j kychi'ye aseyt, mi qe kynejel kyal kywakẍe, mi qe kynejel kyal kyẍne'le, mi qe oyaj in che'x kytziyane te Qman, mi qe txqantl oyaj tu'n kyexe kygan in che'x kyq'o'ne.

18Che nik'b'ele kyi'j jlu twitz Qman Dios tuj lugar kjawil t-sk'o'n kyxole. Kykyaqile che wa'le, che k'a'le ex che chyo'le kyi'j, kyuk'il qe kyky'ajale, qe kyme'jele, qe kymajene xinaq, qe kymajene xu'j ex qe aj Leví najl qe kyxole. Junx che tzalajele kykyaqile twitz Qman Dios ti'j kyaq'unb'ene.

19Noq jte'x q'ij che tele twitz tx'otx', mi'n tzik' kyna'l qe aj Leví kyu'ne.

20Oktzun tel laq'e' kytx'otx'e tu'n Qman Dios ik tza'nx o tzaj ttziyan kyeye, qa ma tzaj tqanin kyk'u'je chib'j, b'a'n t-xi kychyo'ne noq alkyex q'ij kyajb'ile.

21Qatzun najchaq ate'ye ti'j lugar otoq jaw t-sk'o'n Qman Dios te nab'l tb'i, b'a'n tu'n tkub' kyb'yo'ne wakẍ te kychi'ye ex qa ẍne'l aju o tzaj tq'o'n kyeye, ex b'a'n tu'n kychyo'ne ti'j tkyaqil noq alkye kyajb'ile tuj lugar jatum najl qeye, ik tza'nx ma txi nma'ne kyeye.

22Ik tza'n in xi kychyo'ne tchib'jal masat, ax ikx b'a'n tu'n kychyo'ne kychib'jal alumaj, qa tz'il qeye ex qa saq qeye ik tza'n in tma'n ley.

23Ex kyq'onke kwent kyi'je tu'n mi'n t-xi kychyo'ne chik', porke tuj tchk'el alumaj ta' tchwinqlal; kyja'tzun mi'n txi kychyo'ne tchwinqlal alumaj junx tuk'il tchib'jal.

24Mi'n txi kychyo'ne chik', kukx kb'el kyqo'ne twitz tx'otx' ik tza'n a'.

25Mi'n txi kychyo'ne, tu'ntzun kytene b'a'n kyuk'ix qe kyk'wa'le che ul itz'j te tib'ajxi; che tele b'a'n qa ma b'ant kyu'ne aju b'a'n tuj twitz Qman.

26Atzun qe kyoyaje pa'maj kyu'ne tu'n kyxi kyq'o'ne te Qman, ex aqeju otoq che'x kytziyane tu'n kyxi kyq'o'ne te, atzun che pol kyi'ne tuj lugar kjawil t-sk'o'n Qman,

27ex atzun tib'aj t-altar Qman Dios che xel kyq'o'ne qe kyoyaje patun in che kub' tuk'ix kychk'el. Atzun kychk'el txqantl chojb'il in xi kyq'o'ne, k'okel kyqo'ne ti'jele t-altar, ex atzun tchib'jal b'a'n tu'n t-xi kychyo'ne.

28Kyb'inxe ex japunx kyu'ne aju ma txi nma'ne kyeye, tu'ntzun kytene b'a'n te jumajx kyuk'ix qe kyk'wa'le che ul itz'j te tib'ajxi; che tele b'a'n qa ma b'ant kyu'ne aju in tzalaj Qman Dios ti'j ex aju b'a'n tuj twitz.

Tma Dios tu'n mi'n kyk'ulun kywitz tilb'ilal

29Ok kyb'aj naj qe nasyon tu'n Qman Dios kywitze jatum che pole tu'n kyoke tajwil kytx'otx', ok tel kyetzane kytx'otx' ex ok kynajane tuj,

30ten kykwente kyi'je tu'n mi'n kyok lpe'ye kyi'j kyb'inchb'en qe nasyon lu tkub'lenxi kyi'j kyu'ne, ex mi'n kub' kyximane tu'n kyxi'ye k'ulul kywitz kydios ik tza'n kye in b'ant kyu'n.

31Mi'n che k'ulune twitz Qman Dios ik tza'n kye in kyb'incha'n kywitz kydios, porke ik'b'ilxix tuj twitz Qman aju kye in kyb'incha'n kywitz kydios; ajunlpe kyky'ajal ex kyme'jel in kub' kypatun te kyoyaj kywitz kydios.

32Tz'ok tililxix kyu'ne tu'n tjapun tkyaqilju ma txi nma'ne kyeye; mi'n tz'ok kyq'o'ne juntl yol ti'j, ex mi'n tz'el kyi'ne jun yol ti'j.