Jeremías 18 - Mam Huehuetenango New Ortography

Jun techal ti'j b'inchal xar ex ju xkab' tx'otx'

1Tzaj yolin Qman wuk'ile ex tma:

2Tku'xa ma tja ju b'inchal xar, ex atzun kxel nma'ne jun tqanil teya.

3In ku'xtzune ex knet ju b'inchal xar wu'ne in aq'nan ti'j xkab' tx'otx' tib'aj jun tal rwed in sutin,

4ex aju xar in b'anttoq tu'n mya b'a'n ela b'inchb'en te. Ex ok ten b'inchal juntl xar ti'jx xoq'l lu, tejxi tb'ant ik tza'nx tajb'il.

5Tzajtzun tma'n Qman weye kyja':

6Aqeye aj Israel, ¿baqa mlay b'ant wu'ne kyi'je ik tza'n in b'ant tu'n b'inchal xar ti'j xkab' tx'otx'? Aqeye ik kytene tuj nq'ab'e ik tza'n xkab' tx'otx' tuj tq'ab' b'inchal xar. Aqine Kymane in chin q'mante jlu.

7Ok tkub' nximane tu'n tkub' nxitune jun nasyon ex qa jun kawb'il tu'n tnaj wu'ne,

8qatzun ma tz'el tpa'n tib' nasyon lu ti'j mya b'a'n, mlaytzun tzaj nq'o'ne castiw tib'aj, aju b'animaj ti'j wu'ne tu'n ttzaj nq'o'ne.

9Ax ikx qa ma kub' nximane tu'n tjaw nb'incha'ne jun nasyon ex qa jun kawb'il tu'n tch'iy wu'ne,

10ex qa aju nasyon lu ma tb'incha mya b'a'n ex minti' ma txi tniman aju kxel nma'ne te, mlaytzun tzaj nq'o'ne xtalb'il b'animaj ti'j wu'ne.

11Atzun ja'lo q'manxa kye aj Judá ex kye qe xjal najl tuj Jerusalén qa aqine Dios in chin q'mante jlu: Niban tb'aj b'ant jun mya b'a'n wu'ne tu'n ttzaj nsama'ne kyib'aje; in chin ximane ti'j tu'n tkub' kycastiwoye. Ja'lo kykolin kyaje aju b'e mya b'a'n q'i'n kyu'ne, kych'expume kymodiye ex kyb'inchb'ene.

12Atzun kye xjal ok kyma' teya: Mi'n b'aj tnajsa'n tq'ija qi'je, porke qeye b'a'n tu'n qtene ik tza'nx qajb'ile, ex kukx kb'antel qu'ne aju mya b'a'n in tma'n qanmiye, che chilo.

13Tu'ntzun jlu in tma'n Qman: Kyqaninxe kye qe nasyon qa at jatum o b'aj jun ti'xti ik tza'n jlu. Jumajx mya b'a'n ma kyb'incha aj Israel.

14¿Atpe maj in kub' naj ttxa che'w kywi' qe nmaq pik ate' twi witz Líbano? ¿Tzinpe in che aj tzqij qe a' in che tzaj tuj tx'otx' najchaq?

15Atzun qe xjal etzan wu'ne ma tzik' nna'njtze kyu'n ex in kub' kypatun storak kywitz qe dios minti' kyajb'en. Ma che el tzpet ti'j b'e b'a'n aju in che b'et tuj ojtxi, ex in che b'et kyuj qe tq'ab' b'e minti' ojtzqi'n kyu'n.

16Kyja'tzun b'i'x ma kub' xitj kytanmi ex te jumajx ma tz'ok te kyxmayb'il xjal. Kykyaqil qeju che ik'el tuj lugar lu che sek'pajtel ti'j ex kxel kyyukun kywi' tu'n tlaj.

17Che b'ajel nsputune aj Israel ik tza'n tu'n kyq'iq' in tzaj tuj tjawitz q'ij, ex wu'ne che elel oq kywitz qe aj q'oj kyi'j. Ok tpon tq'ijlalil tu'n tkub' kycastiw, noq ttzal wi'je k'ajel nq'o'ne kywitz ex mya nwitze.

Kub' kyximan xjal tu'n kyb'inchante mya b'a'n ti'j Jeremías

18Che chi xjal: Qo ximan ti'j tu'n tb'ant jun mya b'a'n qu'n ti'j Jeremías ex ¿baqa minti' pal tu'n ttzaj kyq'o'n xnaq'tzb'il qe, baqa minti' xjal at kynab'l tu'n ttzaj kyq'o'n qconsej, ex baqa minti' t-sanjel Dios ate' tu'n ttzaj kyma'n tyol Dios qe? E tjaw qnik'an yol ti'j ex mi'n txi qniman aju in tma'n qe, che chi xjal.

Aju tna'j Dios Jeremías

19Aya Nman, q'ontz twi'ya wi'je. B'intza aju in kyma'n qe aj q'oj wi'je.

20¿B'a'npe tu'n tajtz kyq'o'n mya b'a'n te t-xel xtalb'il? Porke lu qe xjal ma b'aj kyb'incha'n jun jul tu'n nku'x tz'aqe tuj. Na'ntza tej nkub'sane twitza kyi'j ex tej t-xi nma'ne teya tu'n twe' ttx'u'jila kyi'j.

21Atzun ja'lo, e kyb'aj kyim qe kyk'wa'l tu'n we'yaj ex e kykub' b'yo'n qe xinaq tu'n spad; e kykyaj ten xu'j minti' kychmil ex minti' kyal, e kyb'aj kyim qe xinaq tu'n tx'u'j yab'il, atzun qe ku'xun e kykyim tuj q'oj,

22ex e kyjaw sch'in tuj kyja tu'n kyxob'il ok kypon t-samana aj q'oj kyi'j noq minab'en, porke ma b'aj kylaku'n jun jul tu'n nku'x tz'aqe tuj ex ma kub' kyq'o'n k'ob'il tuj nb'eye.

23Ex b'a'n tu'na, Nman, tkyaqil mya b'a'n ma b'aj kyb'incha'n wi'je tu'n nkyime. Mi'n kub' tnajsa'na kyb'inchb'en mya b'a'n, ex mi'n kub' tnajsa'na kyil. E tkub' kyi'j tu'na ex q'onkuya kycastiw tuk'il ttx'u'jila.