Proverbios 27 - Mam Huehuetenango New Ortography

1Mi'n jaw tniman tib'a ti'j ju kb'antel tu'na nchi'j, porke minti' b'a'n tu'na alkye tzul.

2Mas b'a'n qa ma jaw nimsa'na kyu'n txqantl xjal, porke mya b'a'n tu'n tjaw tnimsan tib'a tu'nxa.

3Qe ab'j ex ju ttxa tz'a'n puro al qe, pero masxix al nne'l tq'oj ju xjal minti' tnab'l.

4Aju at tq'oj ti'j juntl mlay tzaj q'aq'an tk'u'j ti'j, ex qa ma tzaj ttx'u'jil ti'j juntl jaku naj xjal tu'n, atzunju xjal at tlo'ch tk'u'j ti'j juntl, minti' tumel tu'n tyupj naj.

5Mas b'a'n tu'n tok qma'n jun yol tib'aj twitz jun xjal, twitzju tu'n qk'ujlante te ex minti' in xi qma'n.

6Mas jaku qe' qk'u'j ti'j jun qamiw in qo k'ixb'isanjtz tu'n, twitzju tu'n tqe' qk'u'j ti'j aj q'oj qi'j qa ma qo tzaj tchle'n.

7Aju xjal nojni tk'u'j nne'l tik'un ta'l kab', atzunju xjal nne'l tk'u'j, maske k'a aju in xi' tu'n, pero chi' nne'la tuj ttzi'.

8Aju xjal in kyaj tkolin tja tman tu'n t-xi' tuj juntl lugar najchaq, ik tten ik tza'n jun chyu'j in kyaj tkolin tq'u' ex in xi' najchaq.

9Kyu'n qe perjum mejorxix in tzalaj tanmi xjal; ex kyu'n qe consej b'a'n in jaw tzalaj tanmi xjal.

10Mi'n che kyaj tkolina qe tamiwoya, ex mi qe tamiw tmana; kyja'tzun mya il ti'j tu'n t-xi'ya tja termaniya qa at jun ti'xti mya b'a'n ma tzaj ti'ja. Mas b'a'n jun tvesina niqayin ta', twitz jun termaniya najchaq ta'.

11Nk'wa'l, toka at tnab'la, tu'ntzun ntzalaje ti'ja; kyja'tzun jaku che tzaq'wet wu'ne qeju in che yolin mya b'a'n wi'je tu'n tlaja.

12Aju xjal at tnab'l, ok ttil kyja' ttzaj mya b'a'n, nne'l oq ti'j; atzunju xjal minti' tnab'l, noq kyja' in xi' laq'e' tuj tb'e ex in tzaj mya b'a'n ti'j.

13Q'i'n ela t-xb'alun aju xjal in kyaj we' ti'j tk'as juntl qa minti' ojtzqi'n tu'n, ex axtzun tzyun kyaja te jun prent.

14Aju xjal in pon q'olb'elte tamiw tuk'il tq'ajq'ajel twi kyuw ex prim wen, a jlu mer ik tza'n jun mya b'a'n in tzaj tqanin ti'j tamiw.

15Aju xu'j jawni q'ojl ik tten ik tza'n tz'uj minti' in we' tuj tq'ijlalil jb'al;

16aju xjal taj tu'n tmayet xu'j lu tu'n, junx ta' ik tza'n jun xjal tajb'il tu'n tmayet kyq'iq' tu'n, ex qa tu'n ttzyet aseyt tu'n tq'ab'.

17Aju k'uxb'il, in japun ttzi' tu'n juntl k'uxb'il, ex aju xjal nno'k tnab'l tu'n t-xnaq'tzb'il juntl xjal.

18Aju xjal kwentin tqan higo tu'n, klo'l ti'j twitz; ex aju xjal kwentin tpatrón tu'n, ok tk'ma' nimb'il te.

19Ik tza'n a' malekj qwitz ok tku'x qke'yin tuj, ikxtzun kyten qe xjal, malekj qe tuj kyximb'etz.

20Aju kynajb'il kyimni tuk'ix ju muqb'il in che pon kyimni kyuj ex minti' in che noj, iktzun tten ju xjal in pon tk'u'j ti'j nimku ex minti' in qe' tk'u'j ti'j ju at te.

21Aju q'an pwaq ex ju saq pwaq, tu'n q'aq' nne'l nik'b'aj kyi'j; atzunju xjal nne'l nik'b'aj ti'j tu'nju nimb'il te.

22Aju xjal minti' tnab'l mlayx kyaj tkolin aju tchkyinib'il maske b'aj tk'ixb'isa'na wen.

23Che tke'yin b'aja qe t-ẍne'la, ex kwentin oka qe taluna,

24ex mi jun q'inumab'l ex mi jun kyoklen xjal ktel te jumajx.

25Ok tjaw jlet ch'im tuk'ix cha'x k'ul, ex ok tjaw chmet k'ul te tjaq' k'ul te kywa alumaj,

26kyi'j qe t-ẍne'la k'elel lan tu'n tb'ant t-xb'aluna ti'j; ex kyi'j qe tchipa knetel tpwaqa tu'n tlaq'et ttx'otx'a,

27ex kyi'j qe ttxu tchipa k'elel nim lech tu'n tk'ana ti'j, kyuk'ix qe tk'wa'la ex kykyaqil qe tmajena.