1Qe xjal najl tuj tnam Zif e pon tuk'il Saúl tuj tnam Gabaa ex xi kyma'n te kyja': Lu David in ewan twi witz Haquila, aju tkub' tuj tjawitz q'ij teju lugar minti' kynajb'il xjal tuj, che chi xjal.
2Kub'tzun b'e tu'n Saúl kyuk'ix ox mil soldad mas at kynab'l tuj q'oj kyxol aj Israel, ex e je'x jyolte David tuj lugar Zif aju minti' kynajb'il xjal tuj.
3Atzun e kub' ten ttxlaj jun b'e twi witz Haquila aju tkub' tuj tjawitz q'ij teju lugar minti' kynajb'il xjal tuj. Atzun ta'toq David tuj lugar minti' kynajb'il xjal tuj, ex el tnik' ti'j qa otoq pon Saúl jyolte te;
4kyja'tzun xi t-sama'n junjun sanjel ke'yilte jatum otoq kub' ten Saúl.
5Te tib'ajxi xi' David jatum otoq kub' ten Saúl, ex o til ju lugar jatum in che kub' tantoq Saúl tuk'ix Abner aju nejenel kye t-soldad Saúl ex tky'ajal Ner. Ax in tantoq Saúl kyxol qe t-soldad tuj campament.
6Oktzun ten David yolil tuk'il Ahimelec aju aj Heteo, ex tuk'il Abisai aju tal Sarvia ex terman Joab, ex xi tqanin kye:
—¿Alkye jun kyeye jaku txi' wuk'ile tu'n qpon max jatum ta' Saúl tuj campament kye t-soldad?
—Jaku chinx weye tuk'ila, chi Abisai xi ttzaq'we'n.
7Tujx qonik'an lu xi' David tuk'ix Abisai jatum otoq che kub' ten Saúl kyuk'ix qe t-soldad. Ax in tantoq Saúl tuj campament, ex aju tlans ax tkub' ttxlaj twi', awa'n tuj tx'otx'. Atzunte Abner ex qe txqantl soldad in che tantoq ttxlaj Saúl.
8Xitzun tma'n Abisai te David:
—Ax Dios ma tzaj q'onte aj q'oj ti'ja tuj tq'ab'a. Q'ontza amb'il weye ja'lo tu'n t-xi nxayu'ne lans tuj tk'u'j ex b'i'x kyjel q'e't tuj tx'otx', junx kxel ntzoqpi'ne ti'j, ex tu'n jlu b'i'x kymel, chi Abisai.
9Atzunte David xi ttzaq'we'n:
—Mi'n kub' tb'yo'na, porke aju ma kub' b'yonte teju rey sk'o'maj tu'n Qman kb'el tcastiw.
10Kxel nma'ne jun nyole axix tok twitz Qman; tu'nxte Qman knajel, tu'nju otoq pon or te ex qa tuj q'oj tu'n tkyim.
11Miwt taq' Qman amb'il weye tu'n tkub' nb'yo'ne aju rey jaw t-sk'o'n. Kyja'tzun o'kx q'intza tlans tkub' ttxlaj twi', tuk'ix xar tkub'il a', ex qo', chi David.
12Xitzun ti'n David aju lans tuk'ix xar tkub'il a' ex e aj meltz'aj. Mi jun o ke'yinte kye ex mi jun o b'inte; ax ikx mi jun ul tnab'l tu'nju kykyaqil in che tantoq, ex tu'nju ax Qman otoq tzaj q'onte nim watl tuj kywitz.
13Te tib'ajxi ik'x David jlajxi chq'ajlaj kyxol witz ex kub' ten twi' jun witz, ex najchaq kyxol.
14Tzajtzun sch'in David ti'j Abner ex kyi'j qe soldad ex tma:
—Aya Abner, chin ttzaq'wentza.
Atzunte Abner xi ttzaq'we'n:
—¿Alkyeya tu'nju in tzaj sch'ina ti'j rey?
15Xitzun tma'n David te:
—¿Myapetzun xinaqa? ¿Alkye juntl jaku pon ik tza'n teya kyxol kykyaqil aj Israel? ¿Tiqu'ntzun minti' nno'k tkwentina tpatrona aju rey? At jun xjal ma tz'okx aj kyxole ex ma tajb'e tu'n tkub' b'yo'n tpatrona tu'n, aju rey.
16Mya b'a'n aju ma tb'inchaya. Kxel nma'ne jun nyole axix tok twitz Qman, mas b'a'n tu'n kykyime porke minti' nno'k kykwentine aju kyreye sk'o'maj tu'n Qman. Jyoma aju tlans rey ex aju xar tkub'il a', aqeju tkub'toq ttxlaj twi', chi David.
17Tejtzun tel tnik' Saúl ti'j qa a David in yolintoq, tma:
—¿Apeya in yolin wuk'ile, nky'ajal David?
Atzunte David xi ttzaq'we'n:
—Aqine in chin yoline Tat Rey.
18Pero Tat Rey, ¿tiqu'n nno'k lpe'ya wi'je tu'n nkub' tb'yo'na aqine ajb'el teya? ¿Ti o nb'inchaye? ¿Alkye mya b'a'n o b'ant wu'ne?
19In chin kub'sane teya Tat Rey tu'n t-xi tb'i'na qe nyole aqine ajb'el teya: Qa tu'n Qman ma tz'ok q'o'na te aj q'oj wi'je, kuchiwt txi tk'mo'n Qman jun oyaj kxel nq'o'ne te; qatzun kyu'n xjal in kyma'n teya tu'n tok tena q'ojlel wi'je, kuchiwt tzaj jun mya b'a'n kyib'aj tu'n Qman. Porke ma chin etz kylajo'n tuj tx'otx' etzan tu'n Qman, ex kyaj tu'n wajb'ene kye junxitl dios.
20Mi'n waje tu'n nkyime tuj junxitl tx'otx' mya ttx'otx' Qman, ex aya Tat Rey ma tz'etza jyolte weye; aqine ik ntene ik tza'n jun ky'aq, ex ma tz'ok lpe'ya wi'je kywi' qe witz ik tza'n ti'j jun tz'uchin, chi David.
21Xitzun ttzaq'we'n Saúl:
—Aya nky'ajal David, b'a'n wu'ne ma chin b'inchane il. Ik ntene ik tza'n jun xjal minti' tnab'l ex jumajx ma tzpet nnab'le. Pero tajtz meltz'aja, ex ya mi'n tz'ok nb'incha'ne jun mya b'a'n ti'ja tu'nju ma tzaj q'aq'an tk'u'ja juntl maj wi'je ex minti' ma chin kub' tb'yo'na, chi Saúl.
22Atzunte David xi ttzaq'we'n:
—Lu tlansa lu, aya Tat Rey. E ttzaj jun tmajena q'ilte te,
23ex awt Qman q'onte t-xel teyle junjun ik tza'nx tb'inchb'en. Maske a Qman ma tzaj q'onte teya tuj nq'ab'e ja'lo, pero minti' xwajb'eye tu'n tkub' nb'yo'ne, aya rey sk'o'maj tu'n.
24Ik tza'n weye Tat Rey, ma' toklen tchwinqlala ma tz'e'la tuj nwitze, ikxwittzun tz'e'la ju weye nchwinqlal tuj twitz Qman, ex tz'elxwit ti'n tkyaqil b'is wi'je, chi David.
25Xitzun tma'ntl Saúl kyja':
—Awt Dios ky'iwla'n teya nky'ajal David. Tkyaqilju kb'antel tu'na puro b'a'n k'elel.
Tb'ajlenxi jlu aj meltz'aj Saúl tja, atzunte David xi tlajo'ntl tb'e.
Who We AreWhat We EelieveWhat We Do
2025 by iamachristian.org,Inc All rights reserved.
