1E oktzun tchmo'n Salomón qe tij xjal kyxol aj Israel tu'n kyul tuk'il tuj Jerusalén, kyuk'ix kykyaqil qe nejenel kyxol kykyaqil k'loj kyiyjil aj Israel, ex kyuk'ix qe nejenel kyxol kykyaqil k'loj aj Israel at kyxilen kyxolx, tu'n t-xi q'ib'aj ju kax k'ub'l tley Dios tuj Sión aju tok tb'i Ttanmi David.
2Tej tul kanun ju ninq'ij ma' t-xilen tuj xjaw Etanim tb'i, aju twuqin xjaw te ab'q'i, atzun q'ij ok kychmon kyib' kykyaqil aj Israel tuk'il rey Salomón.
3E pon kykyaqil kytijil xjal kyxol aj Israel, ex aqe pal e tzaj q'inte kax,
4ex ik' kyi'n aju kax, tuk'ix ja xb'alun te mojb'ab'l tib'il tuk'il Dios, kyuk'ix kykyaqil qe makb'il xjansa'maj at tuj, tu'n tpon kyi'n twitz tja Dios, ex aqe pal kyuk'ix qe aj Leví e tzaj q'inte kye.
5Ate rey Salomón, kyuk'ix kykyaqil tnam xjal aj Israel otoq tz'ok kychmon kyib' tuk'il, e kub' ten twitz kax ex e kub' kyb'yo'n qe ẍne'l ex qe wakẍ, tu'n t-xi kyq'o'n te oyaj te Dios. Kykyaqil alumaj lu minti' b'ant kyajlanjtz tu'nju nimxix.
6Te tib'ajxitzun jlu, xi kyi'n qe pal aju kax k'ub'l tley Dios, ex pon kyi'n tuj tja Dios tuj ju Lugar Mas Xjanxix, okx kyq'o'n tjaq' kyxik' qe tilb'ilal querubín.
7Qe tilb'ilal querubín lu, lik'un tten kyxik' tib'aj lugar jatum tkub' kax ex kyib'aj qe tze' tkub' te tal.
8Ex qe tze' tkub' te tal matij kywa'l qe, kyja'tzun q'ancha'l qe kytxa'n max tuj Lugar Xjan tkub' twitz ju Lugar Mas Xjanxix, maske mi'n q'ancha'l qe max ttxa'n pe'n; ex kyja'xtzun kyten ja'lo.
9Tuj kax lu, o'kx qeju kab'e tz'lom ab'j at, aqeju e ku'x tq'o'n Moisés tuj tej kyten aj Israel tuj lugar Horeb; aqeju kab'e tz'lom ab'j lu, atzun tz'ib'an ju yol kywitz, aju kyaj b'ant ti'j tu'n Qman kyuk'il aj Israel tej kyetz tuj Egipto.
10Tej kyetz qe pal tuj Lugar Xjan, kub' ten txqan muj tuj tja Dios.
11Ex tu'n tlaj muj lu, minti' e kyaj ten qe pal tu'n kyajb'en tuj tja Dios, tu'nju otoq noj tuj tja Qman tu'n t-spik'umal.
Kub' tik'sa'n Salomón tq'ijlalil tja Dios tu'n tajb'en 2 Crónicas 6.1—7.1012Atzunte Salomón tma kyja':
Aya Nman Dios, o tmaya qa atzun tu'n ttena tuj txqan q'eq muj.
13Ex ma jaw nb'incha'ne jun tjaya tb'anilxix tu'n ttena tuj, ex atzun tu'n ttena tuj te jumajx.
14Ajtzun meltz'aj twitz rey kyuk'il kykyaqil xjal aj Israel aqeju wa'lqe'toq, ex xi tqanin te Dios tu'n kykub' ky'iwla'n,
15ex chi kyja': Nimanxwit tb'i Qman aju Kydios aj Israel, porke ma japun tyol aju tzaj ttziyan te David aju qtzan nmane, tej ttzaj tma'n kyja':
16Atxix tej kyetz wi'ne qe aj Israel tuj Egipto, aqeju etzan wu'ne, mi jun tnam otoq jaw nsk'o'ne kyxol kykyaqil k'loj kyiyjil aj Israel tu'n tjaw b'inchet jun njaye jatum tu'n ttzaj na'n nb'iye tuj, ex a David jaw nsk'o'ne tu'n tkawin kyib'aj qe xjal aj Israel, aqeju etzan wu'ne, chi Dios.
17A qtzan nmane David o tajb'e tu'n tjaw tb'incha'n jun ja te nimb'il tb'i Qman aju Kydios aj Israel.
18Atzunte Qman tzaj tma'n te: Aju t-ximb'etza tu'n tjaw tb'incha'na jun njaye, b'a'n jlu;
19ex mya aya kjawil b'inchante; aju tky'ajala tzul itz'j, atzunju kjawil b'inchante njaye, chi Dios.
20Ex matzun japun tyol Qman aju tzaj ttziyan, ik tza'nx o tma. Ma chin oke te rey te t-xel David aju qtzan nmane, in chin kawine kyib'aj aj Israel, ex ma jaw nb'incha'ne tja Qman aju Kydios aj Israel, tu'n tajb'en te nimb'il tb'i.
21Ax ikx ma tz'el npa'ne jun lugar tuj ja lu jatum tu'n tten kax k'ub'l tley Dios, aju kyaj b'ant ti'j tu'n kyuk'il qxe'chel atxix tej kyetz ti'n tuj Egipto, chi Salomón.
22Kub'tzun ten Salomón twitz altar te Qman, ex kywitz kykyaqil xjal aj Israel jaw tq'o'n tq'ab' twitz kya'j,
23ex tma: Aya Qman aju Kydios aj Israel: Minti' juntl Dios at tuj kya'j ex mi twitz tx'otx' jaku pon ik tza'n teya, in japun tyola aju in tzaj ttziyana, ex in tzaj tq'o'na t-xtalb'ila kye qe xjal in che ajb'en teya tu'n tkyaqil kyk'u'j;
24porke ma japun tu'na aju tzaj ttziyana te tmajena David aju qtzan nmane, aya o q'mante ju yol lu, ex tu'nxa ma b'inchet ik tza'n ma b'ant tuj q'ij lu.
25Kyja'tzun Nman, aya Kydios aj Israel, ax ikx b'a'n tu'n tjapun tu'na aju tzaj ttziyana te tmajena David aju qtzan nmane, chitzuna te: Qe tiyjila kukx che okel te rey tu'n kykawin kyib'aj aj Israel qa ma che b'et tuj tumelxix nwitze, ik tza'n teya ma b'eta b'a'n, chiya te.
26Kyja'tzun, aya Kydios aj Israel, japunx tu'na aju yol tzaj ttziyana te qtzan nmane David, aju ajb'el teya.
27¿Axpelo tok jaku najan Dios twitz tx'otx'? Ik tza'n ju kya'j ma'xix wen ex minti' in kanun tu'n tten Dios tuj, pyortzun teju ja lu, aju ma jaw nb'incha'ne, mlaylo kanun tu'n tten Dios tuj.
28Kyja'tzun Nman Dios, tzaq'wentza aju nkub'sb'ile ex aju nqanb'etze, aqine tmajena, ex b'intza tq'ajq'ajel nwi'ye ex qe nyole in xi nma'ne teya ja'lo.
29Kukx ke'yintza aju ja lu q'ijl ex qonik'an, aju o tmaya ax tu'n ttena tuj. B'intza nkub'sb'ile aju in xi nqanine teya tuj lugar lu, aqine tmajena.
30B'intza qe nqanb'etze ex qe kyqanb'etz xjal aj Israel ok ttzaj qna'ne tb'iya tuj lugar lu. B'intza max tuj kya'j jatum najliya, ex najsama qile.
31Qa at jun xjal ma tb'incha jun mya b'a'n ti'j tuk'il, ex qa ma tz'ok lajwersin tu'n t-xi tma'n jun yol ax tok twitz t-altara tuj tjaya lu,
32b'intza max tuj kya'j ex b'inchanxa kyi'j qe tmajena. Q'onkuya t-sentens ju xjal at til tu'nju tb'inchb'en mya b'a'n, ex atzunju xjal minti' til, b'inchanxa ti'j tu'n tklet tu'nju minti' til.
33Qa ma kub' kyi'j aj Israel aqeju etzan tu'na, kyu'n qe aj q'oj kyi'j, tu'nju otoq che b'inchan il twitza, ex qa ma tz'ajtz ti'j kyanmi, ex qa ma jaw kynimsa'n tb'iya, ex qa ma che kub'sa'n twitza tuj ju ja lu,
34che tb'intza qe max tuj kya'j ex najsankuya kyil, ex b'inchama tu'n kyul meltz'aj juntl maj tuj tnam aju xi tq'o'na kye qe kyxe'chel.
35Qa ma tzaj jun nintz koresma, ex qa minti' ma tzaj jb'al tu'nju otoq che b'inchan xjal il twitza, ex qa ma che ok ten kub'sal twitza tuj lugar lu, ex qa ma jaw kynimsa'n tb'iya, ex qa ma tz'ajtz ti'j kyanmi tu'n tlaj kycastiw otoq tzaj tu'na,
36che tb'intza max tuj kya'j ex najsama kyil qe tmajena, aqeju xjal aj Israel etzan tu'na, ex yek'unxa aju b'e b'a'n kye tu'ntzun kyb'et tuj. B'ixtzun tzaj tq'o'na jb'al tib'aj tx'otx' aju xi tq'o'na te kyetzb'il qe xjal etzan tu'na.
37Qa ma tzaj we'yaj ex qa tx'u'j yab'il tuj tnam lu, ex qa ma che tzqij qe awal tu'n ta'w kyaq, ex qa ma naj awal tu'n soj ex qa kyu'n ẍplon; ex qa ma b'aj kytxolb'an kyib' aj q'oj ti'j qtanmiye tu'n kyok tzoqpaj qi'je, ex qa ma tzaj noq alkyex juntl ti'xti mya b'a'n, ex qa yab'il,
38b'ix tzaj tb'i'na tkyaqil ju qkub'sb'ile teya ex qqanb'etze, noq tu'n alkyex jun qeye, ex qa kyu'n kykyaqil aj Israel aqeju etzan tu'na, ok kyke'yinte aju mya b'a'n ok ttzaj kyi'j ex qa k'ixk'oj, ex ok tjaw kyi'n kyq'ab' twitz kya'j tuj ju ja lu,
39b'ix che tzaj tb'i'na max tuj kya'j tuj lugar jatum najliya, b'ix kub' tnajsana kyil, ex b'ix tb'inchaya kyi'j noq alkye b'a'n tuj twitza, ik tza'nx tb'inchb'en teyle junjun, porke o'kx aya ojtzqilte kyximb'etz ex kyanmi xjal.
40Kyja'tzun ok che nimal teya akux najl qe tzalu twitz tx'otx' tzaj tq'o'na kye qe qxe'chele.
41Ax ikx qe stranjer xjal, aqeju mya ax e itz'j kyxol qe xjal etzan tu'na, qa ma che tzaj tuj juntl tnam najchaq ok tb'injtz tqanila kyu'n,
42ok kyul na'l tb'iya tuj ja lu noq tu'nju kb'injtzel ju tb'iya ma'xix t-xilen ex ju tipumala nimxix,
43b'ix che tzaj tb'i'na max tuj kya'j max tuj lugar jatum najliya, ex b'ix tzaj tq'o'na tkyaqil aju kxel kyqanin teya, tu'ntzun tel kynik' ti'ja kykyaqil qe nasyon twitz tx'otx', ex tu'n tnimanjtza kyu'n ik tza'n in nimanjtza kyu'n aj Israel aqeju etzan tu'na, ex tu'n tel kynik' ti'j qa in na'njtz tb'iya tuj ja lu aju ma jaw nb'incha'ne.
44Ok kyex qe xjal q'ojlel, aqeju etzan tu'na, tu'n kyq'ojin kyi'j qe aj q'oj kyi'j noq jatum che xel t-sama'na, ex qa ma tzaj kyna'n tb'iya tumlal ju tnam aju ma jaw t-sk'o'na ex tumlal ju ja ma jaw nb'incha'ne te nimb'il teya,
45b'ix tzaj tb'i'na max tuj kya'j, aju kyna'j Dios ex ju kykub'sb'il, ex b'ix txi tb'incha'na kyi'j.
46Ex qa ma che b'inchan il twitza, ex mi a'l jun xjal minti' in b'inchan il, ex qa ma tzaj tq'oja kyi'j, ex qa ma che'x tq'o'na tuj kyq'ab' qe aj q'oj kyi'j tu'n kyxi q'i'n pres, ex qa ma che'x tzyu'n tu'n kypon tuj kytanmi qe aj q'oj, qa najchaq ma che pon q'i'n ex qa niqayin,
47ex qa ma tz'ajtz ti'j kyanmi jatum otoq che pon q'i'n, ex qa ma che ok ten kub'sal kywitz teya, ex qa ma tz'el kynik' ti'j qa otoq che b'inchan il ex otoq che b'inchan mya b'a'n,
48ex qa ma che ajtz meltz'aj tuk'ila tu'n tkyaqil kyanmi ex tu'n tkyaqil kyk'u'j tuj kytanmi qe aj q'oj kyi'j, jatum otoq che pon q'i'n, ex qa ma che kub'san twitza tumlal ju tx'otx' lu aju xi tq'o'na kye kyxe'chel, ex tumlal ju tnam aju ma jaw t-sk'o'na, ex tumlal ju ja ma jaw nb'incha'ne te nimb'il teya,
49b'ix tzaj tb'i'na max tuj kya'j tuj lugar jatum najliya aju kyna'j Dios ex ju kyqanb'etz, ex b'ix txi tb'inchana kyi'j,
50b'ix kub' tnajsana kyil qe xjal etzan tu'na, aju otoq kyb'incha twitza, tu'nju mib'an che niman. B'ix yolina tuj kyanmi qe aj q'oj tu'n ttzaj q'aq'an kyk'u'j kyi'j aj Israel, aqeju otoq che'x q'i'n pres.
51Porke qe xjal lu etzan qe tu'na ex tuj tkwenta ate'; aya etz q'inte kye tuj Egipto jatum in che yajlanjtztoq wen, mer ik tza'n tuj jun jorni jatum nno'kx q'ot k'uxb'il tu'n tkub' ulj.
52Nman Dios, b'intza nkub'sb'ile aju ma txi nqanine teya, aqine tmajena, ex b'intza kyqanb'etz qe xjal etzan tu'na. Aya Dios, qo tb'intza ok tjaw tq'ajq'ajel qwi'ye.
53Porke aya Nman Dios el tpa'na qe xjal lu tu'n kyok te jun tnam etzan tu'na kyxol kykyaqil tnam twitz tx'otx'; ik tza'n o tmaya te Moisés aju ajb'el teya, tej kyetz ti'na qe qxe'chele tuj Egipto, chi Salomón.
54Tej in na'ntoq Salomón Dios, ẍmejl tten twitz altar ex kyjaw qe tq'ab' twitz kya'j. Tejtzun tb'aj twi tna'j Dios ex ju tqanb'etz te Qman,
55jawtzun we' ex e kub' tky'iwla'n kykyaqil xjal aj Israel, jaw tq'ajq'ajel twi' kyuw ex tma:
56Nimanxwit tb'i Qman tu'nju ma che ten aj Israel tuj txub'txaj tu'n, aqeju etzan tu'n, ik tza'nx tkyaqil tzaj ttziyan; tkyaqil tyol ma japun aju tzaj ttziyan kye aj Israel, aju tzaj tma'n te Moisés aju tmajen.
57Atzun ja'lo, awt Qman aju Qdios ten quk'il ik tza'n o ten kyuk'il qe qxe'chel. Miwt qo kyaj tkolin, ex miwt qo kyaj tq'o'n;
58noq o'kx tu'n ttzaj tq'o'n qgan tu'n qajb'en te, kukx tu'n qb'inchante aju tajb'il ex tu'n kyjapun qe tmandamyent qu'n, ex qe tley ex qe t-xnaq'tzb'il, aqeju e tzaj tma'n kye qxe'chel tu'n tjapun kyu'n.
59Aju nqanb'etze ma txi nqanine te Qman, kukxwit tzaj tna'n q'ijl ex qonik'an, tu'n tkolin wi'je tuj tkyaqil mya b'a'n, ax ikx kyi'j aj Israel aqeju etzan tu'n, tu'n tjapun tu'n noq alkye il ti'j tuj junjun q'ij,
60tu'ntzun tel kynik' kykyaqil nasyon twitz tx'otx' ti'j, qa ate Qman ax tok Dios te, ex minti' juntl.
61Kyja'tzun o'kx kyq'o'nke kyk'u'je axix tok ti'j Qman, ex che japunx qe tley kyu'ne ex qe tmandamyent, ik tza'n in b'ant ja'lo, chi Salomón b'aj tma'n.
62Te tib'ajxi jlu, ate rey kyuk'ix kykyaqil aj Israel kub' kypatun alumaj te chojb'il te Qman.
63Xi tq'o'n Salomón 22 mil wakẍ, tuk'ix jun syent tuk' winqin mil ẍne'l, te jun chojb'il te mojb'ab'l tib'il.
Atzun jlu o b'ant tu'n rey kyuk'ix kykyaqil aj Israel tej tik'set tq'ijlal tja Qman.
64Ax q'ij lu b'aj t-xjansa'n rey aju tmij ttxa'n pe'n, aju tkub' twitz tja Qman, ex atzun e kub' tpatun qe alumaj ex qe oyaj twitz awal, ex ju kysebyil qe alumaj otoq che kub' b'yo'n te chojb'il te mojb'ab'l tib'il, porke mya matij aju altar q'an k'uxb'il ttx'otx'il aju tkub' niqayin twitz tja Qman, ex minti' kanun tu'n kykub' patit qe alumaj tib'aj, ex qe oyaj twitz awal ex ju kysebyil qe alumaj otoq che kub' b'yo'n te chojb'il te mojb'ab'l tib'il.
65Tuj tq'ijlalil lu, ate Salomón kyuk'ix kykyaqil aj Israel, kub' kyik'sa'n ju ninq'ij kyq'ijlalil qe tal ja t-xaq tze'yin kywi', te nimb'il te Qman, ax ikx juntl ninq'ij te wuq q'ij; tu'n tkyaqil jlu japun kyajlaj q'ij ik'sb'il q'ij, ex kykyaqil xjal e ul b'aj, tza'nx qe xjal xi'yni tuj tumlal tb'anq'ab' q'ij jatum ponin b'aj kytx'otx' aj Israel ti'j tnam Hamat, ax ikx qe xjal xi'yni tuj tumlal tnayaj q'ij, max ponin b'aj ti'j nima te Egipto.
66Tuj juntl q'ij b'aj tq'olb'en tib' Salomón kyuk'il xjal, ax ikx kye xjal xi kyq'o'n chjonte te rey, ex e aj kyja in che tzalaj wen tu'n tkyaqilju b'a'n otoq tb'incha Qman te David, aju ajb'el te, ex kye kykyaqil aj Israel aqeju etzan tu'n.
Who We AreWhat We EelieveWhat We Do
2025 by iamachristian.org,Inc All rights reserved.
