Éxodo 33 - Mam Huehuetenango New Ortography

Tma Qman tu'n kyik' b'et aj Israel

1Tzaj tma'n Qman te Moisés kyja': Kyik'e tzalu, aya ex qe xjal e je'tz ti'na tuj Egipto; kyxi'ye tuj tx'otx' xi ntziyane te Abraham, te Isaac ex te Jacob, tu'n t-xi nq'o'ne kye kyiyjil che ul itz'j te tib'ajxi.

2Kxel nsama'ne n-anjele tu'n tkub' nej kywitze, ex che elex nlajo'ne qe aj Canaán, qe aj Amorreo, qe aj Heteo, qe aj Ferezeo, qe aj Heveo ex qe aj Jebuseo.

3Kyxi'ye tuj tx'otx' q'inun tx'otx' ex tb'anilxix. Atzun weye mi'n chinxe kyxole; mya yajku jaku che naje wu'ne tuj b'e, tu'nju mib'an che b'ine, chi Dios.

4Tejtzun kyb'inte xjal tqanil mya b'a'n lu, tzaj nimxix kyb'is, ex mi jun b'aj tb'inchan tib' kyu'n qe ti'xti tb'anilxix,

5tu'nju otoq tzaj tma'n Qman te Moisés tu'n t-xi tma'n kye aj Israel kyja': Aqeye xjal mib'an che b'ine, qa ma chinxe kyuk'ile, te jun rat jaku che naje wu'ne. Kyi'mele b'i'x ja'lo qe ti'xti tb'anilxix nno'k kyq'o'ne kyi'je, tu'ntzun nlonteye ti kb'antel wu'ne kyi'je.

6Eltzun kyi'n aj Israel qe ti'xti tb'anilxix kyok kyi'j, tej kyik' t-xe witz Horeb.

Ja xb'alun te mojb'ab'l tib'il tuk'il Dios

7Etztzun ti'n Moisés ja xb'alun ex jaw tb'incha'n najchaq ti'jxi campament, ex Ja Xb'alun te Mojb'ab'l Tibil tb'i ok tq'o'n. Qa attoq jun tajb'il tu'n tyolin tuk'il Qman, nnu'ltoq twitz ja xb'alun aju tetz ti'jxi campament.

8Ok t-xi' Moisés tumlal ja xb'alun, kykyaqil xjal in che jaw we'toq, in che kub' we'toq ttzi kyja, ex ax in xi b'ajtoq kywitz ti'j Moisés okxi tokx b'aj tuj.

9Oktzun tokx tuj, in kub'toq muj ttzi ja xb'alun ex ax in kub' ten akux in yolintoq Qman tuk'il Moisés.

10Oktzun kyke'yinte kykyaqil xjal aju muj tkub' ttzi ja xb'alun, teyle junjun in kub' mok'e'toq ax ttzi tja, tu'n tk'ulun.

11Aku Dios in yolintoq tuk'il Moisés ik tza'n in yolin jun xjal tuk'il tamiw. Ok tb'aj yolin Moisés tuk'il Qman, nna'j meltz'ajtoq tu'n tpon tuj campament. Atzunte ku'xun Josué tky'ajal Nun, aju onil te Moisés, minti'toq nne'l laq'e' tuj ja xb'alun.

Tzaj tyek'un Qman tajwalil te Moisés

12Xi tma'n Moisés te Qman kyja':

—B'intza, in tzaj tma'na weye: Q'inxa qe xjal lu, chiya, pero na'nx ttzaj tchik'b'a'na weye alkye kxel t-sama'na wuk'ile. Ax ikx in tma'ntla kyja': Ojtzqi'na wu'ne ex b'a'n ma tz'e'la tuj nwitze, chiya weye.

13Qatzun ikju, qa b'a'n ma chin e'le tuj twitza, in chin kub'sane twitza tu'n ttzaj tyek'una tb'eya weye, tu'ntzun tel nnik'e ti'ja ex tu'n tknet t-xtalb'ila wu'ne. Ximana ti'j, qe xjal lu teya qe, chi Moisés.

14Tzajtzun tma'n Qman kyja':

—Ax qine chin xe'l tuk'ila, ex ktzajel nq'o'ne ojlab'l teya, chi Qman.

15Xitzun tma'n Moisés te kyja':

—Qatzun mya aya kxe'l quk'ile, mi'n qo ex ti'na tzalu.

16¿Tza'n tten k'elel nik'b'aj ti'ja qa b'a'n ma qo e'le tuj twitza, aqine ex qe xjal etzan tu'na? ¿Myapetzun tu'nju in b'eta quk'ile ex tu'nju pa'nmaj qo'ye tu'na kyxol qe txqantl nasyon tuj tkyaqil twitz tx'otx'? Chi Moisés.

17Tzajtzun tma'n Qman te kyja':

—Ok nb'incha'ye aju ma tmaya, tu'nju b'a'n ma tz'e'la tuj nwitze ex ojtzqi'na wu'ne, chi Dios.

18Xitzun tma'n Moisés te:

—Chin kub'sale twitza, yek'untza tajwalila weye.

19Tzaj ttzaq'we'n Qman:

—Kxel nyek'une nk'ujlalile teya ex kxel nma'ne nb'iye twitza. Qa waje tu'n ttzaj q'aq'an nk'u'je ti'j jun xjal, ktzajel q'aq'an nk'u'je ti'j; ex qa waje tu'n ttzaj tz'e'y wanmiye ti'j jun xjal, ktzajel tz'e'y wanmiye ti'j.

20Mlay tz'ok tke'yina nwitze, ex qa ma tz'ok tke'yin jun xjal nwitze mlay tz'anq'intl.

21Ax ikx tzaj tma'ntl Qman:

—Lu jun lugar at junx wuk'ile. We'kuya twi pik.

22Oktzun tik' wajwalile, kb'elex nq'o'ne tuj jun tpa'xil pik, ex kb'el ntxayine tib'aja tu'n nq'ab'e okxi wik'xe.

23Te tib'ajxi k'elel wi'n nq'ab'e tib'aja ex ok tila'ya ttzal wi'je; atzun nwitze mlay tila, chi Qman te Moisés.