2 Crónicas 23 - Mam Huehuetenango New Ortography

1Tujtzun twuqin ab'q'i xi tma'n Joiada tu'n kyxi txokb'aj qe capitán, aqeju at jun syentchaq soldad tuj kykwent ex atzun qe jlu: Azarías aju tky'ajal Jeroham, Ismael aju tky'ajal Johanán, Azarías aju tky'ajal Obed, Maasías aju tky'ajal Adaía ex Elisafat aju tky'ajal Zicri. Oktzun kychmon kyib' ex b'ant ti'j jun kyyol tuk'il Joiada.

2Atzun qe jlu b'aj kyb'etin tuj tkyaqil tx'otx' Judá ex e ok chmo'n qe aj Leví kyu'n; e tzaj kyuj kykyaqil tnam ate' tuj Judá, kyuk'ix qe nejenel kye junjun k'loj kyiyjil aj Israel. Kykyaqil qe jlu e tzaj tu'n kyul tuj Jerusalén.

3Kykyaqiltzun tnam xjal otoq tz'ok kychmon kyib' twitz tja Dios, b'ant ti'j jun kyyol tuk'il rey.

Ex tmatzun Joiada kye: Lu tky'ajal rey at tzalu kyxole; atzunju b'a'n tu'n tok te rey ik tza'n o tzaj ttziyan Qman kye tiyjil David.

4Atzun jlu kb'antel kyu'ne aqeye pal ex aj Leví, aqeye in che ajb'ene tuj q'ij te ojlab'l: Ox k'loj k'elel kyb'aje; jun k'loj kb'el ten kwentil ttzi tja Dios,

5ex juntl k'loj che tel tuj tja rey, atzun juntl k'loj che b'el ten ttzi tlamel tok tb'i Simyent. Ex kykyaqiltzun tnam xjal che b'el ten kyuj qe ttxa'n pe'n twitz tja Dios.

6Ex mi jun tu'n tokx tuj tja Dios, noq o'kx qe pal ex qe aj Leví, aqeju ate' tuj kyturn, o'kx aqe b'a'n tu'n kyokx tu'nju kyxjansan kyib', atzun txqantl tnam xjal, ax tu'n kykyaj ten ttxa'n pe'n ik tza'n in tma'n tley Qman.

7Ex atzun qe aj Leví kb'el kytxolb'an kyib' ti'jele rey, ex teylex te junjun q'i'mlex tmakb'il in ajb'en tuj q'oj, ex qa at jun xjal taj tz'okx tuj tja Qman, kymel. Ex che xe'le tuk'il rey noq jatum ok t-xi', chi Joiada.

8Qe aj Leví ex qe xjal aj Judá o kyb'incha tkyaqilju xi q'ma'n kye tu'n pal Joiada. Ex teylex te junjun nejenel e ok tchmo'n qe xinaq ate' tuj tkwent, tza'nx qeju in che okx tuj kyturn tuj q'ij te ojlab'l, ax ikx qeju in che etz, porke ate pal Joiada minti' xi tq'o'n amb'il kye tu'n kyaj kyja.

9Xitzun tq'o'n pal Joiada qe lans ex qe maqb'il ma tij kyuk'ix qe tal ch'in kye qe capitán aqeju at jun syentchaq soldad tuj kykwent. Aqe jlu tetoq David tnejel ex atzun ate'toq tuj tja Dios.

10Ex e kub' ttxolb'a'n kykyaqil tnam xjal tuj tkyaqil ttxa'n pe'n twitz tja Dios ti'jele altar, ex teylex te junjun q'i'mlex t-spad tu'n kykwentin ti'j rey.

11Atzunte Joiada kyuk'ix qe tky'ajal etz kyi'n tky'ajal rey, jax kyq'o'n jun coron tuj twi', xi kyq'o'n jun tu'jil tley Dios tuj tq'ab', jax kyqo'n aseyt tuj twi' ex ok kyq'o'n toklen te rey. Kykyaqiltzun e jaw sch'in in kyma'n: B'a'nwit tz'el tq'ija, aya Rey.

12Tejtzun tb'inte Atalía tq'ajq'ajel kywi xjal in che t'ikpaj tu'n tzalajb'il ex in che sch'intoq twitz rey, xi'tzun jatum ate'toq kykyaqil xjal twitz tja Dios.

13O til, lu rey wa'l tkub' t-xe tqan adorn ttxlaj ttzi tja Dios, ex lu qe nejenel ex qe q'ajtzal chnab' ate' ttxlaj. Qe xjal in che tzalaj wen, in che q'ajtzantoq chun, ex qe b'itzal q'i'mlex chnab' kyu'n in jaw nej kywi' kyi'j qe b'itz te nimb'il. Eltzun t-sb'it'un Atalía t-xb'alun ex jaw sch'in kyja':

—Ma che ok meltz'aje wi'je, ma che ok meltz'aje wi'je.

14Ex xi tma'n pal Joiada kye qe capitán kye soldad:

—Kyi'mexe kyxol xjal, ex qa at jun ma tz'ok ten kolol ti'j, kyb'yonkuye tu'n spad, chi Joiada. Tu'nju otoq txi tma'n pal kye tu'n mi'n tkub' kyb'yo'n ax tuj tja Dios.

15Tzajtzun kytzyu'n ex tejtzun kypon jatum nno'kx b'e ttzi kyja chej ttxlaj tja rey, axtzun kub' kyb'yo'n.

16Te tib'ajxi jlu, b'ant ti'j jun tyol Joiada kyuk'il kykyaqil tnam xjal, ax ikx tuk'il rey, tu'n kyok te jun tnam etzan tu'n Dios.

17E je'xtzun kykyaqil tuj tja tilb'ilal kydios xjal Baal tb'i ex b'i'x kub' kyxitun ja, ax ikx b'aj kyq'uchin qe altar ex b'aj kypaẍu'n qe tilb'ilal, atzunte Matán aju pal te Baal, kub' kyb'yo'n kywitz qe altar.

18Te tib'ajxi jlu e kub' tq'o'n Joiada qe xq'uqil tuj tja Qman, kykyajsa'n qe tjaq' kykawb'il qe pal ex qe aj Leví, aqeju otoq che b'aj pa'n tuj kyturn tu'n David tu'n kyajb'en tuj tja Qman, tu'n t-xi kyq'o'n qe chojb'il patun in che kub' te Qman, ik tza'n tz'ib'amaj tuj tley Moisés ex ik tza'n kyaj tma'n David, tu'n t-xi kyq'o'n tuk'il tzalajb'il ex b'itz.

19Ax ikx e kub' tq'o'n qe xjal xq'uqil ttzi tja Qman, tu'ntzun mi jun xjal tu'n tokx qa otoq tzik' tib'aj tley Moisés.

20Te tib'ajxitzun jlu e tzaj ttxko'n qe capitán, aqeju at jun syentchaq soldad tuj kykwent, qe xjal ma' kyoklen, qe gobernador te tnam ex kykyaqil xjal, tu'n tex kyi'n rey tuj tja Qman, tu'ntzun tpon kyi'n tuj tja rey. Atzun e okx ttzi tja rey tkub' te jawni ex okxtzun kyq'o'n tuj q'uqb'il te kawb'il.

21Ex kykyaqil tnam xjal e jaw tzalaj, ex tu'nju otoq kyim Atalía tu'n spad, kyja'tzun kykyaqil tnam xjal e kyaj ten tuj txub'txaj.