2 Crónicas 34 - Mam Huehuetenango New Ortography

Tej tkawin Josías tuj Judá 2 Reyes 22.1-2

1Toktoq Josías twi' wajxaq ab'q'i tej ttzyet tkawin ex o kawin 31 ab'q'i tuj Jerusalén.

2Qe tb'inchb'en Josías b'a'n e ela tuj twitz Qman, ok lpe' ti'j tmod David aju qtzan t-xe'chel, ex minti' el tpa'n tib' ti'j.

B'aj tb'uchin Josías kykyaqil tilb'ilal nno'k kydiosin xjal

3Tuj twajxaqin ab'q'i ttzyetlen tkawin Josías, matoq ku'xunxtoq, tzyet tu'n tniman te Dios aju Tdios David aju qtzan t-xe'chel. Ex tuj tkab'lajin ab'q'i ttzyetlen tkawin, el ti'n tuj tx'otx' Judá ex tuj Jerusalén qe tja kydios xjal mya nimal Dios qe, kyuk'ix qe tilb'ilal xu'j dios Asera, kyuk'ix txqantl tilb'ilal b'incha'maj ti'j k'uxb'il nno'kx q'o'n tuj q'aq' tu'n tkub' ulj,

4ex twitzx e kub' xitun qe altar in che ajb'en kywitz qe tilb'ilal Baal. Xi tma'n Josías tu'n kykub' b'uchit qe ẍla'k kykub' kyib'aj altar te patb'il storak. Ax ikx xi tma'n tu'n kyb'aj b'uchin qe tilb'ilal xu'j dios Asera, kyuk'ix txqantl tilb'ilal tze' ex k'uxb'il; b'i'x e ok tu'n te quq, ex aju tquqil xi tchitun tib'aj kypantyón qeju otoq che'x q'onte chojb'il kye.

5Ax ikx kub' tpatun kyb'aqil qe pal kyib'aj altar jatum otoq kub' kyq'o'n chojb'il kye qe tilb'ilal, ex kyja'tzun tten e el b'aj ti'n kykyaqil qe tilb'ilal tuj tx'otx' Judá ex tuj Jerusalén.

6Ax ikx tb'incha kyuj kytanmi aj Manasés, aj Efraín, aj Simeón ex pon b'aj kyuj kytanmi aj Neftalí, ax ikx kyuj qe lugar otoq che b'aj xitj ate' kyi'jele.

7E kub' t-xitun qe altar kyuk'ix qe tilb'ilal xu'j dios Asera ex kyuk'ix txqantl tilb'ilal; b'i'x e ok tu'n te quq ex e kub' t-xitun kykyaqil qe altar te patb'il storak tuj tkyaqil kytx'otx' aj Israel. Te tib'ajxi ajtz meltz'aj tu'n tul tuj Jerusalén.

Tej tknet libro te ley 2 Reyes 22.3—23.3

8Tuj twajxaqlajin ab'q'i ttzyetlen tkawin rey Josías, tel-lenxi ti'n qe tilb'ilal tuj tx'otx' Judá tuk'ix tuj tja Dios, xi t-sama'n qe xjal lu: Safán aju tky'ajal Azalía, Maasías aju gobernador te tnam, ex Joa aju aj tz'ib'al ex tky'ajal Joacaz, e je'x t-sama'n tu'n t-xi kyb'incha'n tja Qman aju Tdios.

9E je'xtzun qe jlu tuk'il tnejel pal Hilcías ex xi kyq'o'n pwaq te, aju otoq pon q'i'n tuj tja Dios, aju otoq jaw kychmo'n qe aj Leví aqeju in che xq'uqin ttzi tja Dios, ex aju pwaq otoq pon kyi'n aj Manasés, aj Efraín ex txqantl aj Israel, ax ikx aju pon kyi'n kykyaqil aj Judá, aj Benjamín ex qe xjal najlqe tuj Jerusalén.

10Ex xi kyq'o'n kye qe nejenel ti'j aq'untl ti'j tja Dios, tu'ntzun t-xi kychjo'n twi kyk'u'j qe aq'nal in che aq'nan tu'n t-xi kyb'incha'n tja Dios.

11Ax ikx xi kyq'o'n pwaq kye qe calpinter ex kye qe albañil, tu'ntzun ttzaj kylaq'o'n qe ab'j xpe'limaj kywitz ex tu'n kylaq'et qe tze', tu'n kyjax kywi' qe ja otoq che naj tuj kykwent qe rey te Judá.

12-13Qe xinaq lu in che aq'nantoq tuj tumelxix, ex aqeju nejenel kye aj Leví, atzun qe jlu: Jahat ex Abdías, tiyjil Merari qe, tuk'ix Zacarías ex Mesulam, tiyjil Coat qe. Ax ikx ax qe aj Leví kyoksa'n te nejenel kyxol qe iqal iqtz, ex nejenel qe kyxol kykyaqil qeju in che aq'nan ti'j aq'untl. Kykyaqiltoq qe aj Leví lu, b'a'n che q'ajtzan tkyaqil txkaj chnab', ex at junjun tok te aj tz'ib'al, junjun tok te caporal ex junjun tok te xq'uqil ttzi tja Dios.

14Tej tetz kyi'n pwaq, aju otoq pon q'i'n tuj tja Dios, ok noj pal Hilcías ti'j ju libro jatum tz'ib'an tley Dios, aju otoq kyaj ttz'ib'an Moisés,

15ex xi tma'n te Safán aju aj tz'ib'al: Ma knet ju libro wu'ne tuj tja Qman, jatum tz'ib'an ley tuj, chi Hilcías, ex xi tq'o'n ju libro lu te Safán.

16Xitzun ti'n Safán aju libro lu tuk'il rey, ex xi tma'n te kyja':

—Tat Rey, ma b'ant kyu'n qe ajb'el teya tkyaqil aju ma txi tq'o'na tuj kykwent.

17Ma jatz kyi'n aju pwaq at tuj tja Dios ex ma txi kyq'o'n kye qe nejenel ti'j aq'untl ex kye qe aq'nal.

18Ax ikx xi tma'ntl Safán te rey: Ma tzaj q'o'n jun libro weye tu'n pal Hilcías; ex jaw t-sch'i'n Safán twitz rey aju tz'ib'an tuj libro.

19Tej tb'inte rey aju in tma'n tuj libro te ley, el t-sb'it'un t-xb'alun tu'n tb'is.

20Txkettzun Hilcías tu'n rey, tuk'ix Ahicam aju tky'ajal Safán, tuk'ix Abdón aju tky'ajal Micaía, tuk'ix Safán aju aj tz'ib'al, ex tuk'ix Asaías aju ma' toklen ttxlaj rey, ex xi tma'n kye kyja':

21—Kyxi'ye ex kyqaninxe te Qman alkye tnab'l ju libro ma knet, ex alkye tu'n tb'ant wu'ne ex kyu'n aj Israel ex aj Judá, aqeju e kyaj ten ex minti' e je'x q'i'n tuj juntl nasyon. Nimxixlo tq'oj Qman ma tzaj qi'j tu'nju minti' xi kyq'o'n kywi' qtzan qxe'chel ti'j ju yol in tma'n tuj libro lu, ex minti' o japun kyu'n tkyaqil yol tz'ib'an tuj, chi Josías.

22Xi'tzun Hilcías kyuk'ix qeju e je'x sama'n tu'n rey te tuk'il, tu'n kypon tuk'il ju xu'j Hulda aju t-sanjel Dios. Ate Hulda t-xu'jil Salum aju tky'ajal Ticva ex tal tchman Harhas, ex ate Salum kwentilte k'ub'l xb'alun tuj tja Dios. Atzun najl Hulda tuj tkab'in pak' tnam Jerusalén, ex tej kyxi' yolin te,

23tzaj ttzaq'we'n kyja': Chi Qman aju Kydios aj Israel in tma'n: Kymanxe teju xjal saj samante kyeye wuk'ile:

24Aqine Dios in chin q'mante jlu: Ktzajel nsama'ne mya b'a'n tib'aj tnam lu ex kyib'aj qe xjal najlqe tuj, ik tza'nx tkyaqilju tz'ib'an tuj libro aju ma jaw sch'in twitz rey kye aj Judá.

25Ma tzaj nq'oje kyi'j tu'nju ma tz'el kypa'n kyib' wi'je, tu'nju ma kub' kypatun storak kywitz junxitl dios, ex tu'n tlaj tkyaqilju mya b'a'n in kyb'incha'n; kyja'tzun ma tzaj nimxix ntx'u'jile ti'j tnam lu ex mlayx yupj nq'oje, chi Qman.

26Kymanxe te rey kye aj Judá, aju ma tzaj samante kyeye qanilte te Qman: Chi Qman aju Kydios aj Israel ma tma kyja': Tu'nju ma txi tq'o'n twi'ya ti'j ju ma tb'iya tuj libro,

27ex tu'nju ma tz'ajtz ti'j tanmiya ex ma kub' tmansin tib'a tej tb'inteya tqanil wu'ne tu'n kynaj qe xjal tuj tnam lu, ex tu'nju ma tz'el t-sb'it'un t-xb'aluna ex ma jaw oq'a nwitze, kyja'tzun ax ikx weye ma tzaj nb'i'ne tyola. Aqine Dios in xi nma'ne jlu teya.

28Tu'n tlaj tkyaqil jlu, tuj txub'txaj kymela ex kpola kyuk'il qtzan t-xe'chela, ex mi'n tila aju mya b'a'n ktzajel nq'o'ne tib'aj tnam lu, chi Dios.

E ajtztzun meltz'aj qe sanjel ex xi kytx'olb'an aju tqanil lu te rey.

29Xitzun tma'n rey tu'n kytzaj txket kykyaqil qe kytijil xjal aj Judá ex aj Jerusalén tu'n tok kychmon kyib'.

30Atzunte rey kyuk'ix kykyaqil xjal aj Judá, kyuk'ix qe xjal najlqe tuj Jerusalén, kyuk'ix qe pal ex qe aj Leví, kyuk'ix kykyaqil tnam xjal, tza'nx qeju ch'in kyoklen, ax ikx qeju ma' kyoklen, kykyaqil e je'x tuj tja Dios, ex atzun jaw t-sch'i'n rey tkyaqilju in tma'n tuj libro, aju otoq knet tuj tja Dios, jatum tz'ib'an ju yol otoq kyaj b'ant ti'j tu'n Dios kyuk'il aj Israel.

31Kub'tzun we' rey tuj lugar b'animaj jatum in che kub' we' rey, ex xi ttziyan te Qman tu'n tkyaqil tanmi tu'n t-xi tniman ex tu'n kyjapun qe tmandamyent tu'n, kyuk'ix qe t-xnaq'tzb'il ex qe tley, ex tu'n tjapun tu'n aju yol kyaj b'ant ti'j tu'n Dios kyuk'il aj Israel, aju tz'ib'an tuj libro.

32Ax ikx xi tma'n kye kykyaqil xjal aj Jerusalén ex aj Benjamín, aqeju ate'toq tuk'il, tu'n t-xi kytziyan tu'n tjapun kyu'n. Ex qe xjal aj Jerusalén xi kytziyan tu'n tjapun kyu'n aju yol kyaj b'ant ti'j tu'n Dios kyuk'il, aju Kydios qtzan kyxe'chel.

33El ti'n Josías kykyaqil tilb'ilal in che k'uluntoq xjal kywitz kyuj kykyaqil tnam kyxol aj Israel, ex xi tma'n kye kykyaqil aj Israel tu'n kyk'ulun twitz Qman aju Kydios. Ex tej itz'xtoq Josías, minti' el kypa'n kyib' xjal ti'j Qman aju Kydios qtzan kyxe'chel.