Jueces 20 - Mam Huehuetenango New Ortography

Ok q'oj kyi'j aj Benjamín

1Kykyaqiltzun aj Israel, tzajx qe' tuj Dan ex pon b'aj max tuj Beerseba, ax ikx qe aj Galaad, ok kychmon kyib' tuj Mizpa twitz Qman, ex junxtoq kyximb'etz kykyaqil.

2Kykyaqil qe nejenel kye kyiyjil aj Israel ate'toq kyxol qe xjal etzan tu'n Dios, ex japun jun kyajlal te kyaje syent mil soldad q'i'mlex spad kyu'n, tu'n kyqan in che b'et.

3O kyb'i tiyjil Benjamín qa otoq b'aj kychmon kyib' txqantl kyiyjil aj Israel tuj Mizpa. Atzun kye aj Israel xi kyqanin te xinaq aj Leví tza'n tten kyim t-xu'jil kyu'n xjal.

4Atzunte aj Leví, aju tchmil qtzan xu'j, xi tma'n kye:

—Aqine tuk'ix nxu'jile o pone tuj tnam Gabaa, jun tnam kye tiyjil Benjamín, tu'n tex aq'b'il qu'ne ma chixin.

5Ex tujx qonik'an lu, aqeju xjal najlqe tuj tnam b'aj kytxolb'an kyib' ti'jele ja jatum in qo posadiyine, tu'n nkub' b'yo'ne kyu'n; e ok ten ti'j nxu'jile ex tu'n tlaj jlu b'i'x kyim.

6Atzun weye, tzaj wi'ne t-ximlal qtzan nxu'jile, b'aj npaẍu'ne ex xi nsama'ne jun piẍ tuj kytx'otx' teyle junjun k'loj kyiyjil aj Israel, tu'ntzun kyb'inte kykyaqil aj Israel aju b'inchb'en lu jumajx mya b'a'n.

7Atzun ja'lo, tu'nju aj Israel qeye, tuj kykwente kyjel ten tu'n kyximane ti'j ex tu'n kymanteye alkye tu'n tb'ant kyu'ne, chi aj Leví.

8Kykyaqiltzun tnam xjal junx kyximb'etz e jaw we' ex kyma:

—Mi jun qe b'a'n tu'n taj meltz'aj tuj tja xb'alun ex qa tja.

9Aju kb'antel qu'n, o'kx tu'n tjaw qi'n swert ti'j alkye qe che okel tzoqpaj ti'j tnam Gabaa.

10Kyxol kykyaqil kyiyjil aj Israel kjawil qsk'o'n jun kyxol lajchaq xinaq, ex atzun qe jlu che xe'l jyolte wab'j kye soldad; atzun qe txqantl che xe'l tuj tnam Gabaa, tu'ntzun t-xelin kyi'j aj Gabaa aju mya b'a'n ma kyb'incha kyxol aj Israel.

11Kykyaqil aj Israel ok kychmon kyib', junx kyximb'etz, tu'ntzun kyok tzoqpaj ti'j tnam.

12Xi kysama'n qe sanjel tuj tkyaqil tx'otx' kye tiyjil Benjamín, tu'ntzun t-xi kyma'n kye kyja': ¿Ti tten ma b'ant aju mya b'a'n lu kyxole? Che chi.

13Kyq'ontze qe xinaq jumajx mya b'a'n ate' tuj tnam Gabaa, tu'ntzun kykub' qb'yo'ne ex tu'ntzun kysaqset aj Israel tuj mya b'a'n.

Atzun kye tiyjil Benjamín minti' xi kyb'i'n kyyol kyerman ax aj Israel,

14noq o'kx kykyaqil tiyjil Benjamín e tzaj kyuj kykyaqil kytanmi, ok kychmon kyib' tuj tnam Gabaa tu'n kyxi' q'ojlel kyi'j txqantl aj Israel.

15Qe soldad e tzaj kyuj kykyaqil tnam kye aj Benjamín, japun jun kyajlal te 26 mil kyb'aj, ex minti' e ok te tajlal aqeju wuq syent xinaq mas at kynab'l tuj q'oj otoq che jaw sk'o'n ax tuj tnam Gabaa.

16Kyxol kykyaqil qe xinaq lu attoq wuq syent tu'n kynayaj b'a'n che aq'nan, ex mejorxix che xo'n tu'n xob'l, ax ikx jaku tza'w jun ttzmal wib'aj kyu'n tu'n jun xob'l ab'j ex mlay tz'el ti'j tu'n mi'n ta'w.

17Atzun kye txqantl aj Israel o b'aj kychmon kyib', kyaje syent mil xinaq elni qe twitz q'oj ex at kynab'l tu'n kyq'ojin.

Aju q'oj ok kyi'j tiyjil Benjamín

18Atzun kye aj Israel e je'x tuj Betel, ex atzun xi kyqanin te Dios tu'n tel kynik' ti'j alkye jun k'loj kyiyjil tu'n tok tzoqpaj tnejel kyi'j tiyjil Benjamín. Atzunte Qman tzaj ttzaq'we'n kye qa aqe tiyjil Judá tu'n kyok tzoqpaj tnejel.

19Kyja'tzun tten, primxix e jaw we' aj Israel ex e kub' ten tumlal twitz tnam Gabaa.

20E je'xtzun q'ojlel kyi'j tiyjil Benjamín, ex b'aj kytxolb'an kyib' twitz tnam Gabaa tuj txolin kyten.

21Atzun kye tiyjil Benjamín e etz tuj tnam, ex tuj q'ij lu kub' kybyo'n 22 mil soldad aj Israel.

22-24Kyja'tzun, e je'x aj Israel tuj Betel oq'el twitz Qman tejxi ttzaj qlolj, ex atzun xi kyqanintl te qa tu'n kyok tzoqpaj juntl maj kyi'j qe kyerman, aqeju tiyjil Benjamín. Tu'nju tzaj tma'ntl Qman tu'n kyok tzoqpaj juntl maj, kyja'tzun ok kyipuntl, ex tuj juntl q'ij e pon juntl maj q'ojlel kyi'j aj Benjamín tujx lugar jatum e kub' ten nej.

25Ex tuj tkab'inmaji'n e je'tz aj Benjamín tuj Gabaa tu'n kyok tzoqpaj kyi'j ex e kub' kyb'yo'ntl wajxaqlaj mil soldad aj Israel q'i'mlex kyspad.

26E je'xtzun kykyaqil soldad aj Israel kyuk'ix kykyaqil tnam xjal juntl maj tuj Betel tu'n kyok ten oq'el twitz Qman. Tuj enter q'ij minti' e wa'n ex xi kyq'o'n qe oyaj patun in che kub' kyuk'ix qe chojb'il te mojb'ab'l tib'il.

27-28Tuj tq'ijlalil lu aju kax k'ub'l tley Dios atzun ta'toq tuj Betel, ex aju pal in ajb'entoq twitz, atzun Finees aju tky'ajal Eleazar ex tal tchman Aarón. Xi kyqanintl aj Israel te Qman kyja': ¿Okpe qo okel tzoqpaje q'ojlel juntl maj kyi'j qe qermaniye, aqeju tiyjil Benjamín, ex qa mi'n? Atzunte Qman tzaj tma'n kye: Kyok tzoqpaje kyi'j, ex nchi'j che'x nq'o'ne tuj kyq'ab'e.

29Xi kyewan kyib' txqan soldad aj Israel ti'jele tnam Gabaa,

30akux in b'et kyxi' txqantl tu'n kyq'ojin kyi'j aj Benjamín, ex tuj toxin q'ij b'aj kytxolb'an kyib' twitz tnam Gabaa ik tza'nx otoq kyb'incha kab'e maj.

31E etz juntl maj tiyjil Benjamín tuj tnam, e je'l laq'e' ti'j tnam tu'n kyok tzoqpaj q'ojlel kyi'j aj Israel, ex kub' kyb'yo'ntl b'alo 30 aj Israel tuj tb'eyil Betel, ax ikx tuj tb'eyil Gabaa ex tuj kojb'il;

32tuj kywitz qa in che oqtoq aj Israel kywitz, ex otoq kub' kyi'j kyu'n ik tza'nx otoq che tenb'a kyu'n kab' maj. Atzun kye aj Israel noq kyja' e je'l laq'e' ti'j tnam tu'ntzun kyxi lpe' aj q'oj kyi'j kyuj qe b'e.

33Atzun kye aj Israel jurat e je'tz jatum ate'toq ex b'aj kytxolb'an kyib' tuj q'oj tuj Baal-tamar; ax ikx qeju kyewantoq kyib' tuj chq'ajlaj ti'jtzi tnam Gabaa e je'tz jatoq kyewan kyib',

34ex e ok tzoqpaj ti'j tnam. Laj mil kyb'aj aj Israel, aqeju at-xix kyipun tuj q'oj e ok tzoqpaj ti'j tnam Gabaa. Kyuwxix q'oj ok, ex atzun qe tiyjil Benjamín minti'toq b'a'n kyu'n qa kyja'toq tu'n kynaj.

35Ate Qman tzaj q'onte kye aj Benjamín tuj kyq'ab' aj Israel, ex tuj q'ij lu e kub' kyb'yo'n aj Israel 25 mil tuk' jun syent soldad tiyjil Benjamín q'i'mlex kyspad.

36Eltzun kynik' qe tiyjil Benjamín ti'j qa otoq kub' kyi'j.

Qe aj Israel noq kyja' e je'l oq kywitz aj Benjamín, ex q'uqltoq kyk'u'j kyi'j qe xinaq otoq txi kyewan kyib' tu'n kyok tzoqpaj ti'j tnam Gabaa.

37Aqe jlu noq minab'en e ok tzoqpaj ti'j tnam Gabaa ex e kub' kyb'yo'n tu'n spad kykyaqil qe xjal ate' tuj.

38Aqeju otoq txi kyewan kyib' tu'n kyok tzoqpaj ti'j tnam, otoq b'ant ti'j kyu'n kyuk'il txqantl aj Israel, qa ma jaw b'uqin txqan sib', atzun jun techal qa otoq tzyet tnam kyu'n.

39O kyb'incha aj Israel mer ik tza'n otoq che el oq, ex tej kyke'yinte txqan sib' in b'uqin tjaw, e ajtzun meltz'aj tu'n kyok tzoqpaj kyi'j tiyjil Benjamín.

Qe tiyjil Benjamín kub' kyb'yo'n 30 aj Israel, ex tu'ntzun jlu o qe' kyk'u'j, tuj kywitz qa otoq kub' kyi'j aj Israel kyu'n, ik tza'nx tuj tnejel q'oj otoq tz'ok kyu'n;

40ex tejtzun tjaw t-sib'el tnam, ex tej taj kyke'yin aj Benjamín kyi'jxi, lu tq'aq'al ex t-sib'el tnam otoq japun twitz kya'j.

41E ajtztzun meltz'aj aj Israel tu'n kyok tzoqpaj kyi'j tiyjil Benjamín, ex atzun kye aj Benjamín tzaj nim kyxob'il tej tel kynik' ti'j mya b'a'n otoq tzaj kyi'j.

42E je'ltzun oq kywitz aj Israel tuj b'e in xi' tuj tzqij tx'otx'; minti'toq tumel tu'n kyklet, ex e je'tz aj Israel kyuj tnam, in che tzyet-xi tiyjil Benjamín kyu'n ex in che kub'xi kyb'yo'n.

43B'aj kytxolb'an kyib' aj Israel kyi'jele tiyjil Benjamín, e ok lpe' kyi'j ex e kub' kyb'yo'n, xi'x qe' tu'n kyb'yet tuj lugar Menúha ex pon b'aj max tuj tjawitz q'ij te tnam Gabaa.

44Kyja'tzun e kyim wajxaqlaj mil soldad tiyjil Benjamín; kykyaqil qe jlu kyuw kyk'u'j tuj q'oj.

45Atzun qe txqantl e aj meltz'aj ex e je'x oq tuj tzqij tx'otx' tumlal pik Rimón tb'i, ex e kub' b'yo'n jwe' mil tuj b'e. Atzun kye aj Israel kukx e je'x lpe' kyi'j, ex kub' kyb'yo'ntl kab'e mil xinaq.

46E kyim 25 mil soldad tu'n tkyaqilx tuj q'ij lu, tiyjil Benjamín qe, kykyaqil qe jlu kyuw kyk'u'j tuj q'oj.

47Ex at qaq syent tiyjil Benjamín e je'x oq tuj tzqij tx'otx' ex axtzun e kyaj ten kyaje xjaw tuj pik Rimón tb'i.

48Atzun kye aj Israel e ok tzoqpaj kyi'j txqantl tiyjil Benjamín tuj teyle junjun tnam, e kub' kyb'yo'n kykyaqil tu'n spad, kyuk'ix qe alumaj tuk'ix tkyaqilju o knet kyu'n, ex ok kyq'o'n kyq'aq'al tnam.