2 Reyes 14 - Mam Huehuetenango New Ortography

Tej tkawin Amasías tuj Judá 2 Crónicas 25.1-28

1Otoq b'ant kab' ab'q'i ttzyetlen tkawin Joás aju tky'ajal Joacaz aju rey kye aj Israel, tej ttzyet tkawin Amasías aju tky'ajal Joás tuj Judá.

2Otoq japun Amasías twi' 25 ab'q'i tej ttzyet tkawin, ex 29 ab'q'i o kawin tuj Jerusalén. Aju ttxu' Amasías Joadán tb'i ex aj Jerusalén.

3B'a'n e ela qe tb'inchb'en Amasías tuj twitz Qman, maske minti' o pon ik tza'n te David aju qtzan t-xe'chel, ex b'a'n o tb'incha ik tza'n o tb'incha Joás aju qtzan tman.

4Minti' e je'l ti'n qe ja in che ajb'en te kyk'ulb'il xjal kywi' qe witz, jatum kukx xi kyq'o'n qe chojb'il ex jatum kub' kypatun storak.

5Tejtzun tokxix tipun Amasías tuj tkawb'il, e kub' tb'yo'n qe xjal at kyoklen aqeju otoq che kub' b'yonte qtzan tman.

6Ex minti' e kub' tb'yo'n qe kyky'ajal qe xjal otoq che kub' b'yonte qtzan tman, porke iktzun in tma'n tuj tley Moisés aju tzaj tma'n Qman kyja': Qe mamb'aj mlay che kub' b'yo'n tu'n tlaj il otoq kyb'incha kyk'wa'l, ex mi qe k'wa'lb'aj mlay che kub' b'yo'n tu'n tlaj kyil kyman; noq o'kx teyle junjun knajel tu'n tlaj tex til.

7Ate Amasías aju kub' b'yonte laj mil aj Edom tuj chq'ajlaj tok tb'i Chq'ajlaj te Atz'an, ex tzyet tnam Sela tu'n, ok tq'o'n tb'i tnam lu Jocteel, ex axtzun tb'i toksa'n ja'lo.

8Te tib'ajxi jlu, xi t-sama'n Amasías jun tqanil te Joás aju tky'ajal Joacaz ex tal tchman Jehú, aju rey kye aj Israel, ex chi xi tma'n kyja': Tzaja ex qo q'ojin.

9Atzunte Joás xi t-sama'n ju tzaq'web'l lu: Aju tal ch'i'x k'ul xi tma'n te tze' wi'ten at twi witz Líbano: Q'ontza tme'jela te nky'ajale tu'n tok te t-xu'jil, chi ch'i'x k'ul, ex ik' jun txkup te tjaq' k'ul ma chixin ex b'aj wab'an tal ch'i'x k'ul tu'n.

10Ax tok o kub' kyi'j aj Edom tu'na, ex tu'ntzun jlu in jaw tniman tib'a. B'a'n, niman jaw tib'a; ex mas b'a'n ax tenkja tjaya. ¿Tiqu'n taja tu'n ttzaj ti'na mya b'a'n tib'aja ex kyib'aj aj Judá?

11Atzunte Amasías minti' xi tb'i'n. Kub'tzun b'e tu'n Joás ex ok tzoqpaj ti'j Amasías max tuj tnam Bet-semes, aju tkub'sa'n tuj kytx'otx' aj Judá.

12Ex aqe aj Judá kub' kyi'j kyu'n aj Israel, ex teyle junjun xi oq tja.

13Okx presin Amasías aju rey kye aj Judá tuj Bet-semes, tu'n Joás aju rey kye aj Israel. Ex xi'tzun Joás tuj Jerusalén, atzun okx tk'ob'in jun toy' muro te wajxaq ech twitz, tzajx qe' jatum ta' Tlamel te Efraín tb'i ex pon b'aj max jatum ta' Tlamel te Eskyin tb'i.

14Ax ikx etz ti'n tkyaqil q'an pwaq tuk'ix saq pwaq, kyuk'ix kykyaqil qe makb'il ate' tuj tja Qman, ex kyuk'ix qe q'inumab'l ate' tuj tja rey. Te tib'ajxi, tej kytzyetlen junjun xjal ma' kyoklen tu'n, e je'x ti'n tuk'il ex ajtzun meltz'aj juntl maj tuj tnam Samaria.

15Aju ch'intl tx'olb'ab'en ti'j Joás ex ti'j tkyaqilju o tb'incha, ex kyi'j qe tb'inchb'en ma'xix kyxilen, tuk'ix ju q'oj ok tu'n tuk'il Amasías aju rey te Judá, atzun tz'ib'an tuj u'j jatum ta' tkyaqil tx'olb'ab'en kyi'j kyb'inchb'en rey kye aj Israel.

16Tejtzun tkyim Joás, ax ku'x maqu'n tuj Samaria jatum maqu'n qe rey kye aj Israel. Te tib'ajxi aju o kawin te t-xel, atzun Jeroboam aju tky'ajal.

17Ate Amasías aju tky'ajal Joás, aju rey te Judá, o anq'intl olaj ab'q'i te tib'ajxi tej tkyimlen Joás aju tky'ajal Joacaz, aju rey kye aj Israel.

18Aju ch'intl tx'olb'ab'en ti'j Amasías, atzun tz'ib'an tuj u'j jatum ta' tkyaqil tx'olb'ab'en kyi'j kyaq'unb'en qe rey kye aj Judá.

19B'ant ti'j kyu'n xjal tu'n tjaw kyi'n kyib' ti'j Amasías tuj Jerusalén, ex xi oq tuj tnam Laquis, ex e je'x lpe' xjal ti'j max tuj tnam lu, ex maxtzun kub' kyb'yo'n.

20Jaxtzun kyq'o'n t-ximlal tib'aj jun chej cabay tu'n t-xi kyi'n tuj Jerusalén, ex ku'x kymaqu'n kyxol qtzan t-xe'chel tuj tnam Ttanmi David tb'i.

21Kykyaqiltzun tnam xjal aj Judá tzaj q'i'n Azarías kyu'n tej otoq japun qaqlaj ab'q'i tu'n, ex ok kyq'o'n te rey te t-xel Amasías aju qtzan tman.

22Jaw tb'incha'n Azarías juntl maj ju tnam Elat tkyimlenxi qtzan tman, ex ok juntl maj te kye aj Judá.

Tej tkawin tkab'in Jeroboam kyib'aj aj Israel

23Otoq b'ant olaj ab'q'i ttzyetlen tkawin Amasías aju tky'ajal Joás, aju rey te Judá, tej ttzyet tkawin Jeroboam aju tky'ajal Joás kyib'aj aj Israel, ex 41 ab'q'i o kawin tuj Samaria.

24Ex aju tb'inchb'en Jeroboam mya b'a'n e ela tuj twitz Qman, porke minti' el tpa'n tib' ti'j il tb'incha Jeroboam aju tky'ajal Nabat, aju e b'inchan qe aj Israel il tu'n.

25Tzyet juntl maj kytx'otx' aj Israel tu'n Jeroboam, aju otoq tz'el kyi'n aj q'oj nej. Tzajx qe' jatum ta' tnam Hamat ex pon b'aj max ttzi mar at tuj chq'ajlaj Arabá, ik tza'nx otoq tma Qman aju Kydios aj Israel te Jonás aju tmajen, aju tky'ajal Amitai, aju t-sanjel Dios lu aj Gat-hefer.

26Porke o til Qman aju yajb'il kyuwxix kye aj Israel, ex mi a'ltoq jun in onin kyi'j aj Israel.

27E klettzun qe tu'n Qman noq tu'n Jeroboam aju tky'ajal Joás, tu'nju na'nxtoq tkub' t-ximan Qman tu'n kyb'aj naj aj Israel twitz tx'otx'.

28Aju ch'intl tx'olb'ab'en ti'j Jeroboam ex ti'j tkyaqilju o tb'incha, ex kyi'j qe tb'inchb'en ma'xix kyxilen, ex kyi'j qe q'oj e ok tu'n, ex ti'j tza'n tten tzyet tnam Damasco tu'n, tuk'ix tnam Hamat, tu'n tok te kye aj Israel, atzun tz'ib'an tuj u'j jatum ta' tkyaqil tx'olb'ab'en kyi'j kyaq'unb'en qe rey kye aj Israel. Aqeju tnam Damasco ex Hamat kyetoq aj Judá nej.

29Tejtzun tkyim Jeroboam, atzun ku'x kymaqu'n jatum maqu'n qe rey kye aj Israel. Te tib'ajxi aju o kawin te t-xel, atzun Zacarías aju tky'ajal.