1A Dios kolol qi'j ex q'ol qipumal; a onil qe tuj q'ij ok ttzaj yajb'il qi'j.
2Kyja'tzun mlay qo xob' maske b'aj yukch tx'otx', ex maske kyja' kyxi' b'aj qe witz tuj mar tu'n kyku'pun max t-xe',
3maske julin mar wen ex maske pulin wen, ex maske che lu'lun qe witz tu'n kytx'u'jil.
4At jun nima in ttzalajsa'n qe xjal ate' tuj tnam kub' tb'incha'n Dios, aju tnam lu mas xjanxix ex tok te tnajb'il Dios, aju Dios Tajaw Tkyaqil.
5Tuj tnam lu atzun ta' Dios, kyja'tzun mlay yukch; ex ax Dios onil te ok tkub' spik'e'.
6In che tzanun qe nasyon ex in che lu'lun qe kawb'il, ex in kub' ulj tx'otx' ok ttzaj q'ajt Dios.
7Ate Qman aju Tajaw Tkyaqil at quk'il. Ate Dios kolol qi'j, aju Tdios Jacob.
8Kytzaje ex kyke'yinxe aju xob'ajilxix ma tb'incha Qman twitz tx'otx'.
9Ma we' tkyaqil q'oj tu'n tuj tkyaqil twitz tx'otx', ma che kub' ttoqan qe xob'l plech kyuk'ix qe lans, ex ma tz'ok tq'o'n kyq'aq'al qe carwaj in che ajb'en tuj q'oj.
10Chi Dios: Kykolinxe tu'n kyq'ojine, tz'elx kynik'e wi'je qa aqine Dios. Aqine nejenel kyib'aj kykyaqil nasyon. Ex aqine nejenel kyib'aj kykyaqil xjal ate' twitz tx'otx'.
11Ate Qman aju Tajaw Tkyaqil at quk'il. A Dios kolol qi'j, aju Tdios Jacob.
Who We AreWhat We EelieveWhat We Do
2025 by iamachristian.org,Inc All rights reserved.
