Joel 3 - Mam Huehuetenango New Ortography

1Ok tul kanun aju q'ij lu, chi Qman, che tzoqpetel qe xjal aj Judá ex qe aj Jerusalén ex kxel nq'o'ne kyoklen juntl maj.

2Che okel nchmo'ne kykyaqil nasyon, che xel wi'ne tuj chq'ajlaj Josafat ex atzun che okel tuj xjel wu'ne ti'j alkye ma kyb'incha kyi'j qe xjal etzan wu'ne, aqe aj Israel, tu'nju e b'aj sputj kyu'n tuj tkyaqil twitz tx'otx' ex b'aj kysipan aju tx'otx' etzan wu'ne.

3E ok ten q'il swert ti'j alkyechaq tu'n t-xi q'inte kye qe xjal etzan wu'ne, ex xi kyk'ayin qe tal q'a ex qe tal txin, atzunju pwaq kywi' b'aj kynajsa'n twi kyk'a vin ex kyuk'il qe xu'j jawni kywitz kyuk'il xinaq.

Tzul jwisi tu'n Qman kyib'aj nasyon

4¿Ti kyaje weye, aqeye aj Tiro, aj Sidón ex aj Filisteo? ¿Atpe wile tuj kywitze tu'nju kyaje tu'n kyok tzoqpaje wi'je? ¿Kyajpeye tu'n t-xelin kyu'ne wi'je? Qa ik tten kyu'ne, jurat naj kb'el nq'o'ne castiw kyib'ajxe tu'n tlaj kyb'inchb'ene mya b'a'n.

5Aqeye e je'x elq'ante npwaqe aju saq pwaq ex q'an pwaq, ex xi kyi'ne nq'inumab'le kyuj kyja kydiose.

6Najchaq ma che pon kyi'ne qe aj Judá kyuk'ix qe aj Jerusalén, ex ma che'x kyk'ayine te kymajen qe xjal Griego.

7Atzun ja'lo che ajetz wi'ne qe xjal lu jatum ma che pon kyk'ayine, ikxtzun ktemb'il kyi'je wu'ne ik tza'nx ma kyb'inchaye kyi'j.

8Che xel nk'ayine qe kyky'ajale ex qe kyme'jele kye xjal aj Judá, atzun qe jlu kxel kyk'ayin kye aj Sabeo; aqe xjal lu najchaq ta' kytanmi. Aqine Dios in chin q'mante jlu.

9Kymanxe jlu kye nasyon: Kyb'incham kytene tu'n kyq'ojine, kytxkontze qe xjal kyuw kyk'u'j tuj q'oj; e kytzaj kykyaqil qe soldad tu'n ttzyet q'oj kyu'n.

10Kyb'incham kyspadiye ti'j kych'oke ex kyb'incham kylanse ti'j kyjob'le triw; ex aju xjal minti' tipun, b'a'n tu'n tmante: At nim wipune.

11Kykyaqile aqeye nasyon niqayin ate'ye, kytzaj ojqeline tu'n tok kychmon kyib'e ma chixin. Nman Dios, q'intza qe t-soldadiya kyuw kyk'u'j tuj q'oj.

12Chi Qman in tma'n kyja': E tb'ant kyten qe nasyon ex e kytzaj tu'n kyul tuj chq'ajlaj Josafat, ex atzun chin b'el qe'ye tu'n tkub' kysentens kykyaqil nasyon niqayin ate'.

13Tu'nju jumajx mya b'a'n qe, che kyjo'n jawe ik tza'n in jaw jo't triw ok tq'anax, porke ma pon tyemp tu'n tjaw chmet twitz awal. Che kypatz'un kub'e ik tza'n nne'l patz'ut ta'l twitz uva, porke ma noj aju putz'b'il twitz uva, ex ma che b'aj noj qe tkub'il tu'n ta'l twitz.

14At nimxix txqan xjal ma che ul tuj chq'ajlaj jatum kb'antel ti'j tu'n tkub' kysentens tu'n Qman, porke ma tzul kanun tq'ijlalil jwisi tu'n Qman.

15K'okel qlolj twitz q'ij, ax ikx twitz xjaw, ex mlay che qoptz'aj qe che'w.

16Ok tjaw tq'ajq'ajel twi Qman kyuw wen twi witz Sión tuj Jerusalén, b'i'x che tzajel lu'lun kya'j ex tx'otx'. Ex ate Qman k'okel te kykolb'il kyib' qe aj Israel, aqeju etzan tu'n.

Aju kolpib'l tzul te tnam Judá

17Chi Dios: K'elel kynik'e ti'j, ax tok aqine Dios aju Kymane; atzun najl qine twi witz Sión, aju witz xjan etzan wu'ne. Aju tnam Jerusalén k'okel te jun tnam xjan; mlayx kub' ti'j juntl maj kyu'n xjal kyuj txqantl nasyon.

18Tuj tq'ijlalil tzul che poq'tel tqan uva kywi' nmaq witz, ex che chmetel qe wakẍ kywi' qe tal witz, ex nim a' ktel kyuj qe tq'ab' xaq tuj kytx'otx' aj Judá. Kjawil jlet jun twi a' tuj njaye ex kb'ajel a'lin ju chq'ajlaj Sitim tu'n.

19Atzunju tnam Egipto kb'el xitj, ex ju tnam Edom k'okel te tzqij tx'otx' tu'n tlaj e ok tzoqpaj ti'j tnam Judá ex kub' kyb'yo'n qe xjal minti' kyil tujx kytanmi.

20-21Che kymel wu'ne tu'n t-xelin kyb'inchb'en, ex mlay kub' nnajsa'ne til aju xjal at til. Atzun ju tx'otx' Judá ex aju tnam Jerusalén kukx che najal xjal kyuj, ex atzun weye aqine Kymane ok chin najale twi witz Sión, chi Dios.