Ezequiel 37 - Mam Huehuetenango New Ortography

Aju chq'ajlaj nojni kyu'n qe b'aq tzqij

1O nna'ye tipumal Qman, ex in etz q'i'ne tu'n T-xew; in kub' tq'o'n tuj jun chq'ajlaj jatum attoq nim kyb'aqil kyimni.

2Ex inx ti'n tuj tkyaqil chq'ajlaj lu, nojnitoq tuj tu'n kyb'aqil kyimni, nimxix wen ex jumajx tzqij qe.

3Tmatzun Qman weye: ¿Jakupe che jaw anq'in juntl maj qe b'aq lu? Atzun weye xi ntzaq'we'ne: Nman, o'kx aya b'a'n tu'n.

4Tmatzun Qman weye: Txi yolina kye qe b'aq lu te nxele, ex q'manxa kye: Aqeye tzqij b'aq, kyb'intze aju tyol Qman:

5Chi Qman kyeye kyja': K'okex nq'o'ne juntl maj kyxewe kyuje tu'ntzun kyjaw anq'ine juntl maj.

6K'okel nq'o'ne juntl maj kyb'otx'ile, ex k'okel nq'o'ne kychib'jale; k'okel nq'o'ne kytz'umale ex ktel juntl maj kyxewe wu'ne tu'ntzun kyjaw anq'ine. Atzun k'elel kynik'e ti'j, aqine Dios, chi Qman, chikuya kye.

7O chin yoline kye ik tza'nx tzaj tma'n Qman weye. Tej matoq in chin yoline kyuk'il, o nb'iye jun tq'ajq'ajel; in che swok'in qe b'aq wen tej tok kychmon kyib' jun tuk'il juntl.

8Ex o wile otoq tz'ok kyb'otx'il ex kychib'jal tuk'ix kytz'umal, ex minti'toq kyxew.

9Tmatzun Qman weye kyja': Yolina te nxele teju xewb'aj, ex q'manxa te: Chitzun Qman kyja': Aya xewb'aj, tzaja max kyuj qe kyaje pak' ttxa'n tx'otx', ex xupinxa kyi'j qe kyimni lu tu'n kyjaw anq'in, chi Qman weye.

10In yoline te t-xel Qman ik tza'nx tzaj tma'n weye, ex okx ju xewb'aj kyuj qe kyimni ex e jaw anq'in. E jaw we' nimxix kyajlal wen.

11Tmatzun Qman weye: Ik kyten aj Israel ik tza'n qe b'aq lu. In kyma'n kyja': Qe qb'aqil ma che tzqij ex minti' jatum b'a'n tu'n tok qe' qk'u'j, ma qo naj, che chi.

12Tu'ntzun jlu, yolina kyuk'il te nxele ex q'manxa kye kyja': Atzun jlu in tma'n Qman: Aqeye xjal etzan wu'ne ik kytene ik tza'n qe kyimni otoq che ku'x maqu'n, ex che jaqetel qe kymuqb'ile wu'ne, che eletz wi'ne kyuj, ex che pol wi'ne juntl maj tuj kytx'otx' aj Israel.

13Aqeye xjal etzan wu'ne, ok kyjaqet qe kymuqb'ile wu'ne, ex ok kyetz wi'ne kyuj, k'elel kynik'e ti'j, aqine Dios.

14K'okex nq'o'ne Nxewe kyuje, ex che jawil anq'ine; che pol wi'ne tuj kytx'otx'e. K'eleltzun kynik'e ti'j qa aqine o txi nma'ne jlu, ex wu'ne o b'ant. Aqine in chin q'mante jlu.

K'okel tmojb'an tib' juntl maj tnam Judá tuk'il tnam Israel

15Tzajtzun yolin Qman wuk'ile ex tma kyja':

16Q'intza jun piẍ tze' ex tz'ib'an oka qe yol lu ti'j: Aju tnam Judá kyuk'ix qe txqantl aj Israel ate' tuk'il. Q'intza juntl piẍ tze' ex tz'ib'an oka qe yol lu ti'j: Efraín aju tiyjil José, kyuk'ix qe txqantl aj Israel ate' tuk'il.

17Te tib'ajxi, mojb'an oka tuj tq'ab'a kywi' qe kab'e tze', tu'ntzun kyok te junx.

18Oktzun kymante qe t-xjalila teya: Chik'b'antza qeye ti t-xilen jlu, qa che chi,

19q'manxa kye kyja': Atzun jlu in tma'n Qman: Ktzajel ntzyu'ne ju tze' tok tb'i José ti'j ex tok kyb'i txqantl k'loj kyiyjil aj Israel ti'j, aju tzyu'n tu'n Efraín, tu'n tok nmojb'a'ne twi' tuk'il ju tze' tok tb'i Judá ti'j, ex che okel te junx tuj nq'ab'e.

20Ax tzyun kub'a tuj tq'ab'a qeju kab'e tze' otoq tz'ok ttz'ib'ana kywitz, tu'n tok kyke'yin xjal,

21ex q'manxa kye kyja': Atzun jlu in tma'n Qman: Che tzajel wi'ne qe aj Israel kyuj qe nasyon jatum ma che pon b'aj, che ajetz nchmo'ne tuj tkyaqil part ex che ul wi'ne juntl maj tuj kytx'otx'.

22Che okel te junx nasyon wu'ne tuj ju kytx'otx' aju tiwitz tx'otx' kye aj Israel. Junx kyrey ktel. Mlay che oktl juntl maj te kab'e nasyon ex mya partchaq kawb'il kyxol.

23Mlay che k'ulun juntl maj kywitz qe tilb'ilal tu'n kyb'inchante aju mya b'a'n, ex mlay kyb'incha tkyaqil txkaj il. Che kletel wu'ne te tkyaqil mya b'a'n o kyb'incha tej tel kypa'n kyib' ti'j nleye. Che tx'jetel wu'ne tuj ju kyil. Che okel te weye ex chin okele te Kydios.

24Aju nmajene David k'okel te kyrey ex o'kx te kpastoril kye. Kxel kyb'i'n nyole ex che japunel qe nleye ex qe nxnaq'tzb'ile kyu'n.

25Che najal tuj ju tx'otx' xi nq'o'ne te nmajene Jacob, jatum e ten qe kyxe'chel. Axtzun che najal kyuk'ix qe kyk'wa'l ex kykyaqil qe kyiyjil che ul itz'j te tib'ajxi. Aju nmajene David kukx ktel te nejenel kye.

26Kyjel b'ant ti'j jun nyole kyuk'il tu'n kyanq'in tuj txub'txaj. Aju nyole kyjel b'ant ti'j kyuk'il kukx kyjel ten te jumajx. Kchmetel kyajlal wu'ne ex kukx ktel kyxol aju njaye xjan.

27Chin najale kyuk'il, aqine chin okel te Kydios ex atzun kye che okel te weye.

28Oktzun tten njaye xjan kyxol te jumajx, k'elel kynik' txqantl nasyon ti'j qa aqine in jaw sk'onte kye aj Israel tu'n kyok te jun wetzb'ile xjan.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help