Éxodo 5 - Mam Huehuetenango New Ortography

E pon Moisés ex Aarón yolil tuk'il Faraón

1E okxtzun Moisés ex Aarón twitz Faraón ex xi kyma'n te kyja':

—Ate Qmane ex Qdiose, aqo'ye aj Israel, in tma'n teya kyja': Che ttzoqpintza qe xjal etzan wu'ne, tu'n kyik'san ninq'ij te nimb'il weye tuj tzqij tx'otx'.

2Xi ttzaq'we'n Faraón kyja':

—¿Alkyeju nno'k kyq'o'ne te Kymane, ex kyaje tu'n t-xi nb'i'ne tyol tu'n kyex ntzoqpi'ne qe aj Israel? Minti' ojtzqi'n Kymane wu'ne, ex mlayx che ex ntzoqpi'ne qe aj Israel tu'n kyex, chi Faraón.

3Xitzun kyma'n te kyja':

—Aju Qmane ex Qdiose, aqo'ye aj Hebreo, o kub' tyek'un tib' qwitze. Qo xe'ltzune ja'lo tuj tzqij tx'otx' ox q'ij qb'eye, ex kxel qq'o'ne chojb'il te, tu'n mi'n ttzaj tq'o'n tx'u'j yab'il ex qa q'oj qib'aje, che chi.

4Xitzun tma'n rey te Egipto kye Moisés ex Aarón kyja':

—¿Tiqu'n in che el kypa'ne qe xjal ti'j kyaq'un? Kyxi'tle aq'nal, chi rey.

5Ax ikx xi tma'ntl Faraón: Ma chmet nimxix kyajlal aj Israel tzalu, atzun kyeye kyaje tu'n kyel kypa'ne qe ti'j kyaq'un, chi Faraón.

6Tujx q'ij lu xi tma'n Faraón kye caporal ex kye tmayordom kyja':

7—Texju ja'lo mi'n txi kyq'o'ntle tqan triw kye aj Israel tu'n tb'ant loq' ik tza'n in b'ant ja'lo. Kyu'nx e ttzaj kyjyo'n tqan triw,

8ex kyq'onkuye kytarey ax ik tza'n ja'lo; mi'n tz'ajtz kylaq'b'a'ne. Aqe jlu ky'aj qe, ex tu'ntzun jlu in jaw tq'ajq'ajel kywi' ex in kyma'n: Qo'qe, ex qq'onx chojb'il te Qdios, che chi.

9E tkub' mas nim aq'untl kyib'aj tu'ntzun kyaq'nan ti'j, ex mya tu'n t-xi kyb'i'n nik'aj yol, chi Faraón.

10E je'tztzun qe caporal ex qe mayordom, ex xi kyma'n kye xjal kyja': Ma tma Faraón tu'n mi'n t-xi qq'o'ne tqan triw kyeye.

11Ax qeye che xe'l jyolte noq jatum knetel kyu'ne, ex ax tajlal kytareye kb'antel ik tza'n nej, che chi.

12B'ajtzun kysipan kyib' aj Israel tuj tkyaqil tx'otx' Egipto, ex tzaj kyi'n tlok' triw tu'n tajb'en te t-xel tqan triw.

13Atzun kye mayordom e ok kylajo'n qe xjal ti'j aq'untl, ex xi kyma'n kye kyja': Kyb'inchame tajlal kytareye teyle junjun q'ij ik tza'n in b'anttoq kyu'ne tej kukxtoq t-xi q'ot tqan triw kyeye, che chi.

14E b'aj asyalin qe caporal aj Israel kyu'n qe tmayordom Faraón, ex xi kyma'ntl kye kyja': ¿Tiqu'n minti' ma b'ant tajlal loq' ik tza'n nej, mi ew ex mi ja'lo? Che chi.

15E ultzun qe caporal aj Israel twitz Faraón ex xi kyma'n te kyja':

—¿Tiqu'n in tb'incha'na qi'je ikju, aqo'ye tmajena?

16Minti' in tzaj q'o'n tqan triw qeye. Nno'k q'o'n il qi'je tu'n tb'ant tajlal loq' ik tza'n nej, ex in qo b'aj asyaline. B'ix aqe t-xjalila at kylaj, che chi.

17Xitzun ttzaq'we'n Faraón:

—Ky'aj qeye. Ax tok ky'aj qeye. Tu'ntzun jlu in kyma'ne: Qo'qe ex qq'onx chojb'il te Qman, che chiye.

18Kyxi'ye ex che aq'nantle. Mi'n txi q'ot tqan triw kyeye, ex ax tajlal loq' kb'antel kyu'ne ik tza'n nej, chi Faraón.

19Atzun kye caporal aj Israel b'i'x e b'isun tej ttzaj q'ma'n kye kyja': Mi'n tz'ajtz laq'e' tajlal loq' in b'ant teyle junjun q'ij.

20Tej kyetz qe caporal yolil twitz Faraón, ok kyk'ulb'an kyib' tuk'il Moisés ex Aarón, aqeju in che ayontoq kyi'j.

21Xi kyma'n qe caporal kye kyja':

—Jaku til Qman kyi'je, ex ate kb'el q'onte kycastiwoye. Tu'n kylaje ma qo el ik'une tu'n Faraón ex kyu'n qe tmayordom. Mer ik tza'n jun spad o txi kyq'o'ne tuj kyq'ab' tu'n qkub' b'yo'ne kyu'n, che chi caporal.

Aju tna'j Dios Moisés ex aju tzaq'web'l te

22O yolin Moisés juntl maj tuk'il Qman, ex chi kyja':

—Nman, ¿tiqu'n in che kub' tk'ixb'isa'na qe xjal lu? ¿Ti wile in tzaj t-sama'na?

23Atxix tej wule yolil tuk'il Faraón te t-xela, mas ma che kub' tk'ixb'isa'n qe xjal etzan tu'na, ex na'nx kyklet tu'na, chi Moisés.