2 Crónicas 17 - Mam Huehuetenango New Ortography

Tej tkawin Josafat tuj Judá

1Ok Josafat te rey te t-xel Asa aju qtzan tman, ex ok tipun Josafat tu'n tq'ojin kyi'j aj Israel.

2Ex e kub' tq'o'n qe soldad kyuj kykyaqil tnam tok muro kyi'j tuj Judá, ex tuj tkyaqil tx'otx' Judá, ex kyuj qe tnam kye aj Efraín, aqeju otoq kub' kyi'j tu'n Asa aju qtzan tman.

3O onin Qman ti'j Josafat porke o tb'incha ik tza'n o tb'incha David t-xe tnejel, aju qtzan t-xe'chel, ex minti' ok ten k'ulul kywitz qe tilb'ilal Baal,

4noq o'kx ajb'en te Dios aju Tdios qtzan tman, ex e japun qe tmandamyent tu'n, ex minti' ok lpe' ti'j kyb'inchb'en aj Israel.

5Kyja'tzun tzaj tq'o'n Qman tipun tkawb'il, ex kykyaqil aj Judá pon kyi'n oyaj te. Ten nim tq'inumab'l ex nimb'il te.

6Nim tgan tu'n tb'et tuj tb'e Qman, ex e el ti'n qe lugar tuj Judá jatum in che k'ulun qe xjal kywi' qe witz, kyuk'ix qe tilb'ilal xu'j dios Asera.

7Tej otoq b'ant ox ab'q'i ttzyetlen tkawin Josafat, e je'x t-sama'n qe xjal ma' kyoklen ttxlaj, ex atzun qe jlu: Ben-hail, Abdías, Zacarías, Natanael, ex Micaías, tu'n t-xi kyq'o'n xnaq'tzb'il kye qe xjal kyuj qe tnam at tuj Judá,

8ex kyuk'il qe jlu e je'x qe aj Leví lu: Semaías, Netanías, Zebadías, Asael, Semiramot, Jonatán, Adonías, Tobías ex Tobadonías, ex kyuk'ix qe pal Elisama ex Joram e je'x kyuk'il.

9E je'x t-sama'n ex q'i'ntoq aju libro kyu'n jatum tz'ib'an tley Qman tuj, tu'ntzun t-xi kyq'o'n xnaq'tzb'il kye aj Judá, ex b'aj kyb'etin kyuj kykyaqil tnam at tuj Judá, in kyq'o'ntoq xnaq'tzb'il kye tnam xjal.

10Kykyaqil qeju in che kawin kyuj qe nasyon ate' ti'jele Judá tzaj nim kyxob'il twitz Qman ex minti' e ok ten q'ojlel ti'j Josafat.

11Noqpe at junjun kyxol aj Filisteo pon kyi'n oyaj te Josafat ex pon kyi'n saq pwaq te chojenj, ax ikx qe aj Arabia pon kyi'n wuq mil tuk'il wuq syent tman ẍne'l, ex wuq mil tuk' wuq syent tman chip.

12Noq kyja' o ch'iy tipumal tkawb'il Josafat. E jaw tb'incha'n qe ja ma' kywa'l te xq'uqb'il kye tnam at tuj Judá, ax ikx e jaw tb'incha'n qe tnam jatum tu'n t-xi k'u't twitz awal kyuj.

13Ex o ten nim tq'inumab'l kyuj qe tnam at tuj Judá, ax ikx tuj Jerusalén e ten nim t-soldad kyuw kyk'u'j tuj q'oj,

14ex atzun kyajlal jlu ik tza'nx junjun k'loj kyiyjil:

Kyxol tiyjil Judá, aju comandant kye qe nejenel at jun milchaq soldad tuj kykwent, atzun Adnas, ex attoq ox syent mil soldad tuj tkwent, kyuw kyk'u'j tuj q'oj.

15Aju tkab'in comandant, atzun Johanán; ate Johanán at kab' syent tuk'il 80 mil soldad tuj tkwent,

16aju toxin comandant, atzun Amasías aju tky'ajal Zicri; ate xjal lu tu'n tex tgan otoq txi tq'on tib' tu'n tajb'en te Qman, ex at kab' syent mil soldad tuj tkwent, kyuwxix kyk'u'j tuj q'oj.

17Kyxol qe tiyjil Benjamín, aju comandant atzun Eliada; aju xjal lu kyuw tk'u'j tuj q'oj ex attoq kab' syent mil soldad tuj tkwent, b'anin kyten tuk'il xob'l kyplech ex kymaqb'il,

18atzun juntl comandant, atzun Jozabad, ex attoq jun syent tuk'il 80 mil soldad tuj tkwent, b'anin kyten tu'n kyxi' tuj q'oj.

19Atzun qe jlu in che ajb'en te rey ex minti' e ok te tajlal aqeju otoq che kub' tq'o'n rey kyuj kykyaqil tnam tok muro kyi'j at tuj Judá.