Mateo 20 - Mam Huehuetenango New Ortography

Aju techal kyi'j qe aq'nal

1Aju kawb'il in tzaj tuj kya'j ik tten ik tza'n jun patrón, te prim ex jyol majen tu'n kyaq'nan tu'n tkub' twitz uva.

2B'anttzun ti'j tu'n kyuk'il majen, jun denari pwaq twi kyk'u'j jun q'ij, e je'xtzun t-sama'n aq'nal.

3Tej tpon las nueve ex patrón juntl maj, o til junjun xjal ate' tuj plas minti' kyaq'un.

4Xi tma'n kye: Ax ikx kyeye kyxi'ye aq'nal wuk'ile, jaku chjet kyq'ije wu'ne, chi patrón. E je'xtzun qe majen aq'nal.

5Ex patrón juntl maj te chilkuq'ij ex juntl maj te las tres te qale, ax ikx o tb'incha.

6Extzun juntl maj ch'ixtoq tpon las cinco, e knet junjuntl xjal tu'n minti' kyaq'un ex xi tma'n kye: ¿Tiqu'n noq nne'x kyq'ije tzalu minti' in che aq'nane?

7Xitzun kyma'n te: Porke mi a'l jun saj q'mante qaq'une. Xitzun tma'n patrón kye: Ax ikx kyeye kyxi'ye aq'nal wuk'ile, jaku chjet twi kyk'u'je wu'ne.

8Tejtzun tqoqax, xi tma'n patrón te tmayordom: Txkontza qe majen ex q'onxa twi kyk'u'j; nej q'onxa twi kyk'u'j qeju ẍe ul te mankb'il, te mankb'iltzun q'onxa twi kyk'u'j qeju ẍe ul nej.

9Tejtzun kypon qeju e je'x aq'nal ch'ixtoq tpon las cinco, teyle junjun o tk'am jun denari pwaq.

10Tejtzun kypon qeju e je'x aq'nal nej, kub' kyximan qa mas tu'n kychjet. Ax ikx teyle junjun o kyk'am jun denari pwaq.

11Tejtzun kyk'monte twi kyk'u'j, tzaj jun kyyol ti'j patrón,

12ex xi kyma'n: Qe majen ẍe ul te mankb'il noq jun or ma che aq'nan, ex ax twi kyk'u'j ma chjet tu'na ik tza'n qeye ma qo sikte ti'j aq'untl ex ma tzik'x ta'w q'ij qu'ne enter q'ij.

13Xi ttzaq'we'n patrón ex xi tma'n te jun majen: Aya wuk'il, minti' jun mya b'a'n ma nb'inchaye teya. ¿Myapetzun b'i'x xb'ant ti'j qu'n jun denari pwaq twi tk'u'ja?

14Q'inxa twi tk'u'ja ex txi'ya. Ik tza'n ma txi nq'o'ne teya, ax ikx waje tu'n t-xi nq'o'ne te xjal lu aju sul te mankb'il.

15¿Myapetzun b'a'n tu'n nb'inchanteye alkye wajb'ile ti'j npwaqe? ¿Plojpe ma tz'el tuj twitza tu'nju b'a'n qi'ne?

16Kyja'tzun, qeju ate' te tnejel ja'lo, che okel te mankb'il, atzun qeju ate' te mankb'il ja'lo che okel te tnejel., chi Jesús, b'aj tma'n kye.

In yolin Jesús juntl maj ti'j tkamik Marcos 10.32-34; Lucas 18.31-34

17Tej kyja'toq tjax Jesús tuj Jerusalén, xi tuk'in qe t-xnaq'tzb'en tuj b'e junx kye ex xi tma'n kye:

18—Qo jawix tuj Jerusalén ex chin xel q'o'ne tuj kyq'ab' nejenel kye pal ex tuj kyq'ab' xnaq'tzal ti'j ley, ex kb'el q'o'n nsentense tu'n nkyime, aqine sk'o'maj qine tu'n Dios tu'n ntene kyuk'il xjal,

19ex chin xel q'o'ne tuj kyq'ab' stranjer xjal, chin okel xmayine kyu'n, chin b'ajel k'ixb'isa'ne, ex chin jawil q'o'ne twitz crus; ex tuj toxin q'ij chin jawil anq'ine kyxol kyimni.

Aju tqanb'etz ttxu' Jacobo ex Juan Marcos 10.35-45

20Pontzun laq'e' t-xu'jil Zebedeo kyuk'ix qe tal, kub' ẍmeje' twitz Jesús tu'n t-xi tqanin jun xtalb'il. Atzunte Jesús xi tqanin te:

21—¿Alkye taja?

Xitzun tma'n xu'j te:

—Q'ontza kyoklen qeju kab'e wale lu tu'n kykub' qe' ttxlaja ok tula tu'n tkawina, jun tuj tb'anq'ab'a ex juntl tuj tnayaja.

22Xitzun ttzaq'we'n Jesús:

—Minti' nne'l kynik'e ti'j ju in tzaj kyqanine. ¿Jakupe tzik'x kyu'ne ik tza'n weye ex tu'n t-xi kyk'a'ne aju kxel nk'a'ne?

—Jaku b'ant qu'ne, che chi.

23Xi tma'n Jesús kye:

—Ax tok k'ik'ex yajb'il kyu'ne aju weye k'ik'ex wu'ne; ex aju tu'n kykub' qe'ye tuj nb'anq'ab'e ex tuj nnayaje, mya tuj nkwente ta', b'animaj tu'n Nmane alkye qe tu'n kykub' qe' ntxlaje.

24Tej kyb'inte qeju lajtl t-xnaq'tzb'en, tzaj kyq'oj kyi'j qeju kab'e kyitz'in kyib'.

25E tzajtzun ttxko'n Jesús ex xi tma'n kye:

—B'i'n kyu'ne, qe nejenel kyxol qe nasyon, in che kawin kyib'aj xjal, ex qeju at kyoklen, in che kyaj xjal tjaq' kykawb'il.

26Atzun kyxole mya ik ttenju. Qa at jun kyxole taj tu'n tten mas toklen, e tok te ajb'el kyeye.

27Ex alkye taj tu'n tok te nejenel kyxole, e tok te kymajene.

28Ik tza'n weye, sk'o'maj qine tu'n Dios tu'n ntene kyuk'il xjal, minti' ma chin ule tu'n kyajb'en txqantl weye, noq o'kx tu'n wajb'ene kye mastl ex tu'n t-xi nq'on wib'e tu'n nkyime tu'n kykolpet nimku xjal.

Kab'e moẍ jaqet kywitz tu'n Jesús Marcos 10.46-52; Lucas 18.35-43

29Tejtzun tetz Jesús kyuk'ix t-xnaq'tzb'en tuj tnam Jericó, e ok lpe' nim xjal ti'j.

30At kab'e xjal moẍ q'uql qe ttzi b'e. Tejtzun kyb'inte kyja' ttzaj Jesús, e jaw sch'in in kyma'n:

—Aya Tat Tk'wa'l David, q'aq'antz tk'u'ja qi'je, che chi.

31Atzun kye xjal e ok ten ilil kyi'j, xi kymayo'n tu'n mi'n kyq'ajt; atzun kye moẍ mas e jaw sch'in kyuwxix, in kyma'n:

—Aya Tat Tk'wa'l David, q'aq'antz tk'u'ja qi'je.

32We'tzun Jesús, e tzaj ttxko'n ex xi tma'n kye:

—¿Alkye kyajb'ile tu'n nb'inchanteye kyeye? Chi Jesús.

33Xitzun kyma'n qe moẍ te:

—Tat, qajb'ile tu'n tjaqet qwitze.

34Tzajtzun q'aq'an tk'u'j Jesús kyi'j, ok tmako'n tb'aq' kywitz; ex jurat naj jaqet kywitz, ex e ok lpe' ti'j.