Deuteronomio 33 - Mam Huehuetenango New Ortography

Kub' tky'iwla'n Moisés kykyaqil k'loj kyiyjil aj Israel

1Tej ch'ixtoq tkyim Moisés aju t-sanjel Dios, e kub' tky'iwla'n qe aj Israel,

2chi kyja':

Max twi witz Sinaí tzaj Qman, ex max tuj tiwitz tx'otx' Seir tzaj tq'o'n spik'un kye. Max twi witz Parán tzaj qoptz'aj, ex tej ttzaj, etz kyxol ela mil anjel xjan, tuj tb'anq'ab' q'i'n ley tu'n ik tza'n q'aq' in k'ant.

3In tk'ujla'n Qman qe xjal etzan tu'n, in tklo'n qeju nne'l kypa'n kyib' tu'n kyajb'en te, aqeju in che kub' ten t-xe tqan ex in xi kyb'i'n alkye in tma'n kye.

4Tzaj tq'o'n Moisés aju ley te qe, te jun etzb'il kye kykyaqil tiyjil Jacob.

5Ax te Qman ok te rey kyxol aj Israel tej tb'aj kychmon kyib' qe nejenel kye, kyuk'ix kykyaqil k'loj kyiyjil aj Israel.

6Atzun yol lu xi tma'n ti'j Rubén:

Kukxwit tz'el tq'ij Rubén ex miwt kyim, chmet-xwit nim kyb'aj qe tiyjil.

7Atzun yol lu xi tma'n ti'j Judá:

Nman, b'intza tq'ajq'ajel twi Judá; ẍaqlunxa tu'n tjunin tib' kyuk'il t-xjalil; tu'nx tib' e tklonte tib'; oninxa tu'n mi'n tkub' ti'j kyu'n qe aj q'oj ti'j.

8Atzun yol lu xi tma'n ti'j Leví:

Nman, teya aju Tumim ex Urim, teya ex teju xinaq k'ujla'n tu'na aju ok tq'o'na tuj malb'il tuj Masah, aju tzaj tq'oja ti'j tuj Meriba jatum tzaj tq'o'na a' te qk'a'ye,

9aju o tma ti'j tman ex ti'j ttxu' kyja': Na'nx twile kywitz; ax ikx o tma kyi'j terman: Minti' ojtzqi'n qe wu'ne, ex xi tma'n kyi'j tk'wa'l: Minti' b'a'n wu'ne alkye qe. Qe aj Leví o japun tyola kyu'n, o kyaq' kyib' tu'n tjapun kyu'n aju yol kyaj b'ant ti'j tu'na kyuk'il.

10Aqe in che q'onte xnaq'tzb'il kyi'j qe tkawb'ila ex qe tleya kye tiyjil Jacob aqeju aj Israel; aqe in che q'onte storak twitza, ex aqe in che kub' patunte alumaj te chojb'il tib'aj t-altara.

11Nman, ky'iwlama aju in kyb'incha'n, ex k'monxa tuk'il tzalajb'il aju taq'unb'en kyq'ab'. Toqin kub'a ttzal kyi'j qe aj q'oj kyi'j ex qeju in che ik'un kye, tu'ntzun mi'n kyjaw we'tl.

12Atzun yol lu xi tma'n ti'j Benjamín:

Txub'txaj k'anq'il aju k'ujla'n tu'n Qman, ex niqa' ta' Dios ti'j, kwentin tu'n tuj tkyaqil tanq'ib'l, ex ax knajal Dios tuk'il te klol te.

13Atzun yol lu xi tma'n ti'j José:

Awt Qman kub' ky'iwlante ttx'otx' tu'n tq'ab' che'w tb'anilxix in tzaj twitz kya'j, tuk'ix a' in jatz jlet tjaq' tx'otx';

14mejorxwit tz'ok twitz tawal tu'n q'ij, tb'anilxixwit kyaj twitz tawal tu'n xjaw,

15mejorxwit tz'ok twitz awal kywi' qe ojtxi witz tuj ttx'otx', ex tb'anilxixwit kyaj tkyaqil kyi'jele qe witz ate' te jumajx,

16tzajxwit q'o'n nimxix te; ex tb'anilxixwit tz'ok twitz tawal tuj ttx'otx', ex tzajxwit xtalin tu'n Dios aju kub' tyek'un tib' kyxol qe tq'ab' ch'i'x in che k'anttoq. Tzajxwit q'o'n tkyaqil ky'iwb'il lu tib'aj José aju jaw sk'o'n tu'n tok te nejenel kyxol qe terman.

17Tb'anilxix ke'yin José ik tza'n tnejel tk'wa'l jun tor, at nim tipum ik tza'n jun wakẍ te tjaq' k'ul, ex che b'ajel t-ẍu'yin kykyaqil tnam max ttxa'npun tx'otx'. Iktzun kyten qe tiyjil Efraín nimxix kyb'aj; ex iktzun kyten qe tiyjil Manasés nim kyajlal.

18Atzun yol lu xi tman ti'j Zabulón ex Isacar:

Tzalajxwit Zabulón ok t-xi' kyuj tb'e; ax ikx Isacar, tzalajxwit kyuj tja xb'alun.

19Aqe che tzajel txkonte kykyaqil kyxjalil tu'n kypon twi witz, ex atzun che xel kyq'o'n qe chojb'il tz'aqlxix. Che tzalajel ti'j q'inumab'l kjawitz kyi'n tuj mar, ex ti'j q'inumab'l ewan ttzi mar.

20Atzun yol lu xi tma'n ti'j Gad:

Nimanxwit tb'i Dios aju in tzaj q'onte nim ttx'otx'. Ik tten Gad ik tza'n jun ttxu b'alun in ewan tu'n t-xi wut'paj tu'n ttzyet tkanb', ex nne'l ttx'a'n tq'ab' ex twi' tkanb'.

21Jaw t-sk'o'n Gad aju tx'otx' mas tb'anil, ex tzaj q'o'n te aju pa'nmaj te nejenel. A kub' nej kywitz xjal; japun aju tajb'il Qman tu'n, ex tz'aqlxix aju b'ant tu'n kyxol aj Israel.

22Atzun yol lu xi tma'n ti'j Dan:

Ik tten Dan ik tza'n jun tal b'alun in tzaj t'ikpaj max tuj tx'otx' Basán.

23Atzun yol lu xi tma'n ti'j Neftalí:

In tk'mo'n Neftalí nim t-xtalb'il Qman ex nim tky'iwb'il Dios tkub' tib'aj. A k'okel tajaw lagun ulni b'aj tku'tz t-xe'.

24Atzun yol lu xi tma'n ti'j Aser:

Kub'xwit ky'iwla'n Aser kyxol qe tky'ajal Jacob, ex che tzalajxwit kyi'j qe terman. Che ku'xwit tmu'n tqan tuj aseyt.

25Puro k'uxb'il ex q'an k'uxb'il qe kyuwsab'l tlamel ttanmi k'okel; tenxwit tipun noq jte' q'ij ktel twitz tx'otx'.

26Aqeye aj Israel, mi a'l juntl Dios ik tza'n kyeye Kydios, in b'et twitz kya'j iqan tu'n muj tuk'il nim tajwalil, tu'n tul onil kyeye.

27Aju Dios minti' b'ajsb'il te, atzun klol kyeye, ex qe tq'ab' minti' b'ajsb'il kye atzun tokx kyjaq'e te tzyul kyeye. Tu'n e je'l oq qe aj q'oj kywitze, ex tzaj tma'n kyeye tu'n kyb'aj naj kyu'ne.

28Tuj txub'txaj che anq'il qe aj Israel, ex tuj tzalajb'il che anq'il qe kyiyjil. Ktzajel triw tuk'ix tqan uva tuj kytx'otx', ex ktzajel tq'ab' che'w twitz kya'j tib'aj kytx'otx'.

29At tzalajb'il kyeye aqeye aj Israel. ¿Alkye juntl k'loj xjal jaku pon ik tza'n kyeye? Ax te Qman o klonte kyeye, ax te kwentil kyeye ex onil kyeye. Ate Qman ik tten ik tza'n jun spad in kub' kyi'j aj q'oj tu'n, kyja'tzun aqeju aj q'oj kyi'je, tuk'il kyxob'il k'ajetz kyq'on kyib' kyuk'ile, ex kb'el kyi'j kyu'ne.