Deuteronomio 21 - Mam Huehuetenango New Ortography

Aju kb'antel ti'j jun xjal minti' otoq ilwajtz al u'n otoq kub' b'yo'n

1Qa ma knet t-ximlal jun kyimni kyu'ne tuj kojb'il tuj tx'otx' ktzajel tq'o'n Qman Dios te kyetzb'ile, ex qa minti' otoq ilwajtz al u'n otoq kub' b'yo'n,

2atzun kye tij xjal kyuk'ix qe jwes kxel kyechan t-xol lugar jatum tkub'sa'n t-ximlal kyimni kyuk'il qe tnam niqayin ate'.

3Atzun kye tij xjal ate' tuj tnam mas niqayin ta', ktzajel kyi'n jun tal vac na'nxtoq tok ti'j aq'untl ex na'nxtoq tokx tjaq' yuw,

4kb'elex kyi'n tuj jun tq'ab' xaq in b'et a' tuj, jatum na'nx tb'aj ch'ok'an tx'otx' ex na'nx tkub' aj awal tuj, atzun kjawil kytoqin ti'j tqul tal vac.

5Te tib'ajxitzun che pol laq'e' qe pal aj Leví, porke atzun qe o che jaw t-sk'o'n Qman tu'n kyajb'en te ex tu'n kykub' ky'iwla'n xjal kyu'n tuj tb'i Qman; noq tu'n kyyol jaku b'ant kyi'j xjal, qa at q'oj ex qa at jun ma k'ixb'i tu'n juntl.

6Kykyaqil qe tij xjal tuj tnam mas niqayin ta' jatum otoq kyim xjal, k'elel kytx'jo'n kyq'ab' tib'aj tal vac otoq jaw toqin ti'j tqul ttzi a',

7ex kxel kyma'n: Mya qu'ne kub' qb'yo'ne xinaq lu, ex minti' o qile tza'n tten kub' b'yo'n.

8Qman, najsama qile aqo'ye aj Israel ex tu'na o qo kolpete, mi'n tz'ok tq'o'na te qile aju tkamik xjal lu, che chi, kxel kyma'n. Kyja'tzun mlay che oke tuj xjel ti'j tkamik xjal lu.

9Ex mlaytzun tz'ok q'o'n tkamik xjal lu kyi'je qa ma kyb'inchaye aju in tma'n Qman.

Aju ley kyi'j qe xu'j che tzyetel tuj q'oj

10Oktzun kyexe q'ojlel kyi'j aj q'oj kyi'je, qa ma che tzaj tq'o'n Qman Dios tuj kyq'ab'e tu'n kytzaj kypresine qe,

11qa at jun kyeye ma til jun xu'j tb'anilxix ke'yin kyxol, ex qa ma t-xo' tgan ti'j ex ma tzaj ti'n tu'n tok te t-xu'jil,

12kxe'ltzun ti'n aju xu'j lu max tja. Atzunte xu'j lu, k'elel ti'n tkyaqil ttzmal twi', che elel ti'n qe twi t-xky'aq,

13k'elel ti'n t-xb'alun toksa'ntoq tej ttzaj q'i'n pres, ex axtzun kyjel ten tja xinaq. Kjawiltzun oq' xu'j kyi'j tman kykyaqil q'ij tuj enter jun xjaw. Tb'ajlenxitzun jlu, b'a'ntzun tu'n tkub' tmojb'an tib' xinaq aj Israel tuk'il; k'okeltzun te tchmil xu'j lu, atzunte xu'j k'okel te t-xu'jil.

14Qatzun te tib'ajxi mya b'a'n ma tz'ela xu'j tuj twitz, b'a'n tu'n tkyaj ttzoqpi'n; ex mi'n txi tk'ayin tu'n pwaq ex mi'n tz'ok tq'o'n te majen, tu'nju otoq kub' tan tuk'il xu'j lu.

Aju at kyoklen nej kyky'ajal aj Israel ti'j

15Qa at jun xinaq at kab'e t-xu'jil, ex qa mas k'ujla'nxix jun tu'n, atzun juntl myaxix k'ujla'n tu'n, ex qa kykab'il xu'j lu q'a tnejel kyal, ex qa aju tnejel tky'ajal atzun tal aju xu'j myaxix k'ujla'n tu'n,

16oktzun tpon tq'ijlalil tu'n tkub' tpa'n tq'inumab'l kyxol qe tky'ajal, mlay tz'ok tq'o'n te nej tky'ajal aju tal ju xu'j k'ujla'nxix tu'n te t-xel ju tnejel tky'ajal ti'j ju xu'j myaxix k'ujla'n tu'n, aju axix tok tnejel tky'ajal.

17Il ti'j tu'n tok tq'o'n te tnejel tky'ajal, ex mas nim tq'inumab'l ktzajel tq'o'n twitzju kxel tq'o'n kye txqantl tky'ajal, ex atzun tnejel tky'ajal tej matoq q'i'n tipun, ex tetzun k'wa'lb'aj lu tkyaqilju oklenb'aj te nej k'wa'lb'aj xinaq.

Aju kykastiw qe k'wa'lb'aj mib'an che niman

18Qa at jun kyxole at jun tk'wa'l mib'an niman, tx'u'j twi' ex minti' in xi tniman aju in kyma'n tman te, ex maske kub' q'o'n tcastiw ex minti' in xi tniman,

19kxe'ltzun q'i'n kyu'n tman ttzi tlamel ttanmi kywitz qe tij xjal te tnam,

20ex kxel kyma'n kye tij xjal kyja': Aju qk'wa'le lu mib'an niman, tx'u'j twi', minti' in qo'x nimane tu'n; jumajx mya b'a'n ex puro k'al q'e'n.

21Kykyaqiltzun qe xinaq ate' tuj tnam k'okel kyxo'n k'wa'lb'aj lu tu'n ab'j tu'n tkyim. Kyja'tzun k'elel kyi'ne mya b'a'n at kyxole tuj tnam, ex ok kyb'inte kykyaqil aj Israel jlu, ktzajel kyxob'il.

Txqantl ley

22Qa at jun xjal ma kub' t-sentens tu'n tkyim ex qa ma jaw yob'it ti'j tze' tu'n tlaj otoq tb'incha jun il ma'xix,

23mlay kyaj ten t-ximlal ti'j tze' tuj enter qonik'an; il ti'j tu'n tku'x maqut ax q'ij lu, porke aju xjal in jaw yob'in ti'j jun tze' tkub' t-sentens tu'n Dios. Mi'n b'aj kytz'ilsa'ne tx'otx' aju ktzajel tq'o'n Qman Dios te kyetzb'ile.