2 Samuel 6 - Mam Huehuetenango New Ortography

O tajb'e David tu'n tik' ti'n kax k'ub'l tley Qman 1 Crónicas 13.5-14

1Oktzun tchmo'n David juntl maj qe soldad sk'o'maj qe kyxol aj Israel, ex 30 mil japun kyb'et;

2etztzun tuj tnam Baala tuj Judá, kyuk'ix kykyaqil qe soldad ate' tuk'il, ex kub' kyximan tu'n tik' kylaq'b'a'n ju kax k'ub'l tley Dios jatum in kub' tyek'un tib' Qman, aju Tajaw Tkyaqil, aju tkub' tq'uqb'il kyib'aj qe querubín.

3-4Jaxtzun kyq'o'n ju kax tib'aj jun carret ak'aj ex ik' kyi'n tuj tja Abinadab, aju tkub'toq ttxa'n twi' jun tal witz. Aqeju tky'ajal Abinadab, Uza tuk'ix Ahío, nejni qe twitz carret tjax kax k'ub'l tley Dios tib'aj, ex ate Ahío nejni twitz kax.

5Atzunte David ex kykyaqil aj Israel in che b'itzan ex in che b'ixun tuk'il tkyaqil kyipun te nimb'il te Qman, tuk'il t-sonil chnab' arpa, ex qe kitar, ex tal tampor, ex qe tzo'k, ex qe laq k'uxb'il in che q'ajt wen ok tok q'ajtza'n jun ti'j juntl.

6Tejtzun kypon tuj lugar jatum nne'l tb'aq' triw teju xjal Nacón tb'i, e kub' mejtz'aj qe wakẍ, kyja'tzun xi tnuqpi'n Uza tq'ab' ti'j tkax Qman tu'n mi'n tex tz'aq.

7Atzunte Qman tzaj tq'oj ti'j Uza tu'nju mya xo'n ju kax tu'n, ex ax kyim Uza tu'n Qman, axtzun kub' tz'aq ttxlaj kax k'ub'l tley Dios.

8Mya b'a'n e'la tuj twitz David tu'nju otoq kyim Uza tu'n Qman, kyja'tzun ok tq'o'n tb'i ju lugar lu Pérez-uza, ex axtzun tb'i toksa'n ja'lo.

9Tujx q'ij lu tzaj nim t-xob'il David twitz Dios ex tma: ¿Ti tten tu'n t-xi wi'ne kax k'ub'l tley Qman tuj njaye?

10Tu'n jlu minti' o tajb'e tu'n t-xi ti'n ju kax tuj tnam toksa'n tb'i Ttanmi David, ex xi tma'n tu'n t-xi q'i'n tuj tja Obed-edom, aju xjal aj Gat.

11Ox xjaw o ten kax k'ub'l tley Qman tuj tja Obed-edom, atzunte Qman kub' ky'iwlante te kyuk'ix kykyaqil qeju ate' tuj tja.

Pon ti'n David kax k'ub'l tley Dios tuj Jerusalén 1 Crónicas 15.1—16.6

12Tej tb'inte rey David qa tu'n tlaj kax k'ub'l tley Qman otoq che kub' ky'iwla'n qeju ate' tuj tja Obed-edom tuk'ix tkyaqilju at te, xi' tuk'il nim tzalajb'il ex etz ti'n kax k'ub'l tley Dios tuj tja Obed-edom tu'n tpon tuj tnam toksa'n tb'i Ttanmi David.

13Tej otoq txi' qaq t-xol kyqan qe xjal iqalte kax k'ub'l tley Qman, kub' tb'yo'n David jun tor te chojb'il, tuk'ix jun ẍne'l ulni tnab'l.

14Toktoq jun tkapiẍay David tb'anilxix ex in b'ixun tu'n tkyaqil tipun te nimb'il te Qman;

15tza'nx te David, ax ikx qe aj Israel q'i'n tkax Qman kyu'n, in che sch'in tuk'il tzalajb'il ex in che q'ajtza'n kyi'j chun.

16Tejtzun tpon q'i'n kax k'ub'l tley Qman tuj tnam toksa'n tb'i Ttanmi David, ate Mical aju t-xu'jil David ex tme'jel Saúl etz tke'yin ttzi ventan, lu rey David in t'ikpaj ex in b'ixun te nimb'il te Qman; ex tzaj jun ik'b'il tuj tanmi Mical ti'j David.

17Aju kax k'ub'l tley Qman xi q'i'n ex kub' q'o'n tuj tlugaril tuj jun ja xb'alun otoq b'aj tb'incha'n David tu'n tajb'en te. Te tib'ajxi kub' tb'yo'n David qe wakẍ te chojb'il te Qman, ax ikx xi tq'o'n qe chojb'il te mojb'ab'l tib' tuk'il Qman,

18ex t-xilenxitzun tq'o'n qe chojb'il, e kub' tky'iwla'n David qe tnam xjal tuj tb'i Qman aju Tajaw Tkyaqil.

19Ex kye kykyaqil aj Israel aqeju ax ate'toq, tza'nx qe xu'j ax ikx qe xinaq, xi tq'o'n jun pan te teyle junjun, ex jun piẍ kychi' ex jun kylo' twitz uva tzqij. Tb'ajlenxi jlu e ajtz kykyaqil qe xjal kyja.

20Ax ikx te David aj tja tu'n kykub' tky'iwla'n kykyaqil qeju ate' tuj tja. Atzunte Mical aju tme'jel Saúl etz kanol ti'j ex tma:

—Kye'yex te rey kye aj Israel ma tb'incha ja'lo, ma tz'el ti'n t-xb'alun kywitz qe kykryad qe tmajen xinaq, ik tza'n noq alkye xjal minti' ch'in tch'ixwi.

21Atzunte David xi ttzaq'we'n:

—Ax tok ma chin b'ixune, ex te nimb'il te Qman ma chin b'ixune, aju jaw sk'onte weye te t-xel tmana ex te kyxel kykyaqil qeju ate' tuj tjaya, tu'n woke te nejenel kye aj Israel aqeju etzan tu'n, iktzun in chin b'ixune twitz.

22Ax ikx mas kb'el nmansin wib'e twitz ja'lo; ex chin okele ik tza'n minti' woklene tuj twitza, ex chin jawil nimsa'ne kyu'n qeju majen txin lu, aqeju in tma'na, chi David.

23Atzunte Mical aju tme'jel Saúl, minti' tal o tzaj tuj tkyaqil tanq'ib'l.