Proverbios 22 - Mam Huehuetenango New Ortography

1Mas b'a'n qa in yolinjtz b'a'n ti'j jun xjal twitzju tu'n tten tq'inumab'l, ex mas b'a'n qa in che tzalaj xjal ti'j twitzju tu'n tten saq pwaq ex q'an pwaq tuk'il.

2Aju xjal q'inun ex ju meb'a junx ate', tu'nju kykab'il ma che b'ant tu'n Qman Dios.

3Aju xjal at tnab'l, ok t-xi tke'yin qa kyja' ttzaj xob'ajil tib'aj, in jyon naj tumel tu'n tex twitz; atzunju xjal minti' tnab'l, kukx in xi laq'e' tuj tb'e ex in k'ixb'i tu'nju mya b'a'n.

4Qa mans qo' ex qa in qo niman te Qman, ktzajel q'o'n qq'inumab'l, nimb'il qe ex qchwinqlal.

5Aju tb'e xjal mya b'a'n nojni tuj tu'n ch'i'x ex k'ob'il, ex aju xjal tok tkwent ti'j tchwinqlal nne'l tpa'n tib' ti'j b'e lu.

6Kyq'onxe xnaq'tzb'il kye k'wa'l tu'n kyb'et tuj b'e b'a'n, oktzun kytijin mlay tz'el kypa'n kyib' ti'j.

7Aju xjal q'inun in kawin kyib'aj qe xjal meb'a, ex qe xjal k'asb'enal qe in che kyaj tjaq' tkawb'il aju in q'onte kych'ex.

8Aju xjal in tb'incha'n mya b'a'n, ax ikx tzul mya b'a'n ti'j, ex aju tipun tu'n tb'inchante mya b'a'n knajel.

9Aju xjal in tb'incha'n xtalb'il te juntl kb'el ky'iwla'n, tu'nju in xi t-sipan twa kye qe xjal meb'a.

10Ok tex lajo'n ju xjal b'a'n xmayin, in kub' naj ju ik'j tib'il, ax ikx in b'aj twi q'oj ex yasb'il.

11Aju xjal in tzalaj tu'n tten tanmi saq ex mans yolin, nno'k te tamiw rey.

12Ate Qman in kwentin ti'j ju xjal at tnab'l, ex in b'aj ttzpet-sa'n tyol ju xjal nik'al yol.

13Aju xjal tk'i' tz'aq'nan in tma'n kyja': At b'alun tuj cay, jaku b'ant nkub' b'yo'ne tu'n, chi xjal.

14Aju ttzi' ju xu'j jawni twitz kyuk'il xinaq, ik tten ik tza'n jun jul ma' t-xe' jatum in che ku'pun tz'aq qe xjal at tq'oj Qman kyi'j.

15Qe k'wa'l noq in che ẍtik'un, ex jaku tz'el jlu ok kyxi kawit tuk'il asyal.

16Aju xjal in kub' yajlante jun xjal meb'a noq tu'n tok te q'inun, ex aju xjal in xi q'onte oyaj te jun xjal q'inun, kykab'il ok che tel tuj meb'ayil.

Qe 30 yol te xnaq'tzb'il kyu'n qe xjal at kynab'l.

17Q'onx twi'ya kyi'j kyyol qe xjal at kynab'l, ex q'onku'xa nxnaq'tzb'ile tuj tanmiya.

18Ktzalajela ti'j qa ma kyaj tk'u'na tuj tnab'la, ex tu'n ttzaj tna'na tkyaqil junx.

19Kxel nma'ne teya ja'lo, tu'ntzun tok qe' tk'u'ja ti'j Qman.

20Ma txi ntz'ib'ane 30 yol teya; aqeju yol lu in kyq'o'n consej b'a'n ex ojtzqib'l,

21tu'ntzun t-xnaq'tzanjtza kyu'n tu'n tel tnik'a ti'j yol ax tok, ex tu'ntzun t-xi tq'o'na jun tajlal tz'aqlxix teju otoq tzaj samante teya.

-1-

22Mi'n tz'elq'ana ti'j jun xjal meb'a tu'nju meb'a, ex mi'n kub' tyajla'na jun xjal minti' kolil ti'j twitz jwes,

23porke ate Qman kkolil ti'j, ex ok che b'el tyajla'n qeju otoq che b'aj yajlante te.

-2-

24Mi'n tz'ok tamiwin tib'a tuk'il ju xjal jawni q'ojl ex tx'u'j twi', ex mi'n tz'ok tuk'in tib'a tuk'il,

25mya yajku tz'el tkano'na aju kycostumr mya b'a'n, ex tu'n tokx tq'on tib'a tuj jun k'ob'il.

-3-

26Mi'n tz'ok tq'on tib'a tu'n tkyaj we'ya ti'j tk'as jun xjal,

27ex qa minti' tumel tu'n tchjet tu'na, tuk'ixpe twatb'ila jaku tz'el q'i'n ti'j.

-4-

28Mi'n b'aj tch'expu'na tmojonil tx'otx' kub' kyq'o'n qe t-xe'chela.

-5-

29Aju xjal b'a'n taq'unb'en, ktel kytxlaj qe rey, ex mlay ten kytxlaj qe xjal minti' kyoklen.