Malaquías 2 - Mam Huehuetenango New Ortography

1Atzun ja'lo aqeye pal, chi Qman in tma'n kyeye kyja':

2Qa minti' ma chinx kynimane ex qa minti' ma jaw kynimsa'ne nb'iye axix tok kyu'ne, ktzajel nsama'ne mya b'a'n kyib'aje te t-xel ju ky'iwb'il o txi nq'o'ne kyeye nej, ex ya ma tzaj mya b'a'n kyib'aje wu'ne porke minti' in jaw kynimsa'ne nb'iye.

3Chin q'ojile kyi'j kyiyjile ex k'okel nxo'ne kytxa' alumaj tib'aj kywitze, aqeju in che kub' kyb'yo'ne te kyoyaje weye, ex junx che elex nxo'ne ti'jxi tuk'il kytxa' alumaj.

4Atzun k'elel kynik'e ti'j qa aqine in chin q'mante ju yol lu, tu'ntzun kukx tu'n tten tipun ju yol kyaj b'ant ti'j wu'ne kyuk'il qe tiyjil Leví, chi Qman aju Tajaw Tkyaqil.

5Aju nyole kyaj b'ant ti'j kyuk'il aj Leví, atzun jlu: Tu'n tten kychwinqlal ex tu'n kyten tuj tzalajb'il. Xi nq'o'ne qe jlu tu'ntzun tb'ant kyxob' nwitze ex tu'n kyniman weye; e niman weye ex e xob' nwitze.

6Xi kyq'o'n aj Leví xnaq'tzb'il axix tok, ex minti' jun yol mya b'a'n etz tuj kytzi'. E b'et mojl kyyol wuk'ile ex e b'et tz'aqlxix nwitze, ex nimku xjal kyaj kykolin kyb'inchb'en mya b'a'n noq kyu'n.

7Atzun kyaq'un pal, tu'n t-xi kyq'o'n xnaq'tzb'il kye xjal tu'n tel kynik' wi'je; ex kykyaqil xjal b'a'n tu'n kyul k'mol xnaq'tzb'il kyuk'il, porke nsanjele qe jlu, aqine Kymane aju Tajaw Tkyaqil.

8Pero aqeye pal ma tz'el kypa'n kyib'e ti'j b'e tb'anilxix; nimku ma che kub' tz'aq tu'n kyxnaq'tzb'ile mya b'a'n ex ma b'aj kytzaksine nyole aju kyaj b'ant ti'j wu'ne kyuk'il aj Leví.

9Kyja'tzun ok nb'incha'ye tu'n kyel ik'une kyu'n kykyaqil xjal ex tu'n kyok q'o'ne te minti' kyajb'ene tu'nju minti' in che b'ete tuj nb'eye, ex ok t-xi kyma'ne nleye kye xjal nno'k kyke'yine aju kyxilen, chi Qman aju Tajaw Tkyaqil.

Mi'n kyaj kykoline kyxu'jile, chi Dios

10¿Baqa mya junx Qman qkyaqil? ¿Baqa mya a Dios o b'inchante qe qkyaqil? ¿Tiqu'n in b'aj qsb'un qib' qxolx ex in nno'k qq'o'n te minti' tajb'en aju yol kyaj b'ant ti'j tu'n Dios kyuk'il qxe'chel?

11Minti' ma japun kyu'n aj Judá aju yol xi kytziyan te Dios tu'n kyajb'en te, ex tuj Jerusalén ex kyxol aj Israel in kyb'incha'n aju mas plojxix. Aju tja Dios k'ujla'nxix tu'n ma tz'ok kyq'o'n aj Judá te minti' tajb'en, ex qe xinaq aj Judá ma che jaw moje' kyuk'il qe xu'j in che k'ulun kye junxitl dios, aqeju mya dios qe.

12Qe xjal lu kyuk'ix qe kyiyjil che najxwit tu'n Qman, tu'ntzun mya kukx tu'n kyten qxol aqeju in kyb'incha'n mya b'a'n, noq alkyex qe ex maske tzaj kyi'n kyoyaj te Qman, aju Tajaw Tkyaqil.

13Mya noq o'kx jlu, ax ikx at juntl mya b'a'n in kyb'incha'ne. In kub' ta'l kywitze tib'aj t-altar Qman ex in che oq'e tuk'il tq'ajq'ajel kywi'ye kyuw, tu'nju minti' in xi tk'mo'n Qman kyoyaje tuk'il tzalajb'il.

14Ex kukx in kyma'ne: ¿Tiqu'n minti' in xi k'mo'n qoyaje? Porke ax te Qman testiw kyi'je tu'nju minti' ma japun kyu'ne aju yol xi kytziyane te kyxu'jile, aqeju e moje'ye kyuk'il tej ku'xunx qeye. Aqeju xu'j lu atzun kymoje, ex xi kytziyane kye tu'n kyk'ujlanteye ex tu'n kymoje'ye kyuk'il te jumajx.

15¿Myapetzun ax Dios aju b'inchante t-ximlal xjal ex t-xew, tza'nx qe xinaq ax ikx qe xu'j, tu'ntzun kyok te junx? ¿Alkyetzun taj Dios? Atzun taj Dios, tu'n kyajb'en qe kyiyjile te. Kyja'tzun, kykwentin ok kyib'e ex japunx kyu'ne aju yol xi kytziyane te kyxu'jile tej q'apojxtoq qe.

16Ate Qman aju Dios kye aj Israel chi in tma'n: Kyq'o'nke kwent kyi'je ex mi'n kub' kyximane tu'n tkyaj kykoline kyxu'jile; porke ik'un wu'ne aju xjal in kub' tpa'n tib' tuk'il t-xu'jil ex nne'l tik'un, chi Qman aju Tajaw Tkyaqil.

Aju tq'ijlalil jwisi

17Ya ma sikt Qman tu'n tb'inte kyyole, ex atzun kyeye in kyma'ne: ¿Alkyetzun qyole in xi qma'ne te tu'nju ma sikt tu'n tb'inte qyole?. Ma sikt Qman tu'nju in kyma'ne qa b'a'n tuj twitz aqeju in kyb'incha'n mya b'a'n ex in tzalaj kyi'j, ex in kyma'ntle: ¿Jatumtzun ta' qa tz'aqlxixte Dios?.