1Tuj tkyajlajin ab'q'i toklen Ezequías te rey tuj Judá, ate Senaquerib aju rey te Asiria ok tzoqpaj kyi'j kykyaqil tnam tok muro kyi'j tuj Judá, ex kub' kyi'j tu'n.
2Attoq rey tuj tnam Laquis, xi t-sama'n jun xjal ma' toklen kyuk'ix nimku soldad ke'yilte rey Ezequías tuj Jerusalén, ex e kub' ten ttxlaj tb'eyil a' in pon tuj nintz pil tjax te jawni, ttzi b'e nne'x tuj tkojb'il ju xjal tx'jol ti'j xb'alun.
3Aqeju e je'tz kanil ti'j ma chixin, atzun qe jlu: Eliacim aju tky'ajal Hilcías, ex aju mayordomtoq tuj tja rey, tuk'ix Sebna aju aj tz'ib'al te rey, ex tuk'ix Joa aju tky'ajal Asaf, ex aju mas ma' toklen tok ttxlaj rey.
4Aju xjal ma' toklen kyxol aj Asiria xi tma'n kye kyja':
—Kymanxe te Ezequías aju tqanil lu ma tzaj tma'n aju nintz rey, aju rey kye aj Asiria: ¿Al i'j ma tz'ok qe' tk'u'ja tu'nju ma jaw ti'n tib'a tu'n tq'ojina wi'je?
5Chitzuna in tma'na: At nnab'le ex at wipune tu'n nq'ojine, ex noq tu'n ttzi'ya in tma'na jlu. ¿Al i'j ma tz'ok qe' tk'u'ja tu'nju ma jaw ti'n tib'a tu'n tq'ojina wi'je?
6B'a'n wu'ne, a nno'k qe' tk'u'ja ti'j Egipto. Ex ik tten Egipto ik tza'n jun ajlaj potz'naj, ok ttzaj qtzyu'n tu'n tajb'en te qky'aqo'ch ex qa ma txi qq'o'n qalil tib'aj, in xi tz'upj tuj qq'ab'. Iktzun tten Faraón aju rey te Egipto te kye kykyaqil qeju nno'k qe' kyk'u'j ti'j.
7Ex qa ma kymaye weye: Qeye, atzun nno'k qe' qk'u'je ti'j Qmane aju Qdiose, qa che chiye, ¿myapetzun o che b'aj tq'uchin Ezequías qe lugar te k'ulb'il kyuk'ix qe altar teju Dios lu, ex o tma kye xjal ate' tuj Judá ex tuj Jerusalén o'kx tu'n kyk'ulun twitz junx altar?
8B'inchama ti'j jun tyola tuk'il npatrone aju rey te Asiria: Jaku txi nq'o'ne kab' mil chej teya, qa jaku che knet qe xjal tu'na tu'n kychejin kyib'aj.
9B'alpelo mlay tz'el oq jun nejenel kye soldad kye aj Asiria tu'na, aju mas ch'in toklen, ex ¿che knetelpetzun qe chej tu'na kyuk'ix qe xjal b'a'n che chejin tuj Egipto?
10¿Chipetzuna qa noq tu'n wexe nnik' ma chin tzaje tzalu tu'n wok tzoqpaje ti'j tnam lu tu'n tkub' nxitune? Ax tok ax Kydiose ma tzaj q'mante weye tu'n wok tzoqpaje ti'j tnam lu tu'n tkub' nxitune.
11Xitzun kytzaq'we'n Eliacim, Sebna ex Joa teju xjal ma' toklen kyxol aj Asiria:
—B'inchama xtalb'il, yolina quk'ile tuj yol arameo, ex atzun yol nne'l qnik'e ti'j. Mi'n tzaj yolina quk'ile tuj yol hebreo, ex kykyaqil xjal kyjax twi muro in che b'in ti'j.
12Atzunte ju xjal ma' toklen xi tma'n kye kyja':
—Baqa tuk'il kypatrone, ex baqa kyuk'ile ẍin tzaj sama'ne q'malte jlu tu'n rey kye aj Asiria. Kyelpe qe xjal ate'jx twi muro, ex aqe jlu ikx che telb'a ik tza'nx che telb'a kyeye, kxel kywa'n kytxa' ex kxel kyk'a'n kytz'a'l.
13Ex kub' we' aju xjal ma' toklen ex jaw tq'ajq'ajel twi' kyuwxix wen tuj yol hebreo ex tma:
—Kyb'intze aju ma tma ju nintz rey aju rey kye aj Asiria, chi in tma'n kyja':
14Mi'n txi kyq'on kyib'e tu'n kykub' sb'u'ne tu'n Ezequías; mlay che klete tu'n.
15Qa taj Ezequías tu'n tkub' ti'j kynab'le tu'n, tu'n tok qe' kyk'u'je ti'j Kydiose ex qa ma tma kyeye kyja': Ax tok ate Qman Dios klolte qe, ex mlay taq' amb'il tu'n tkub' ti'j tnam lu tu'n tipumal rey te Asiria, qa chi Ezequías,
16mi'n txi kyb'i'ne tyol. Ma chin tzaj lajo'ne tu'n rey te Asiria q'malte tu'n tb'ant ti'j jun qyol, tu'n mi'n tten q'oj qxol ex tu'n taj kyq'on kyib'e tuk'il, ex kyja'tzun teyle junjun kyeye jaku nik'b'en ti'jx twitz t-uva ex ti'jx twitz t-higo, ex jaku che k'ane a' kyujx qe kyxoche.
17Te tib'ajxitzun che xel q'i'ne tu'n tuj jun tx'otx' ik tza'nx kytanmiye, aju tx'otx' lu at triw ex at tqan uva tuj, jaku b'ant pan kyu'ne ex ta'l twitz uva te kyk'a'ye.
18Qa in tma'n Ezequías kyeye kyja': Qo kletel tu'n Qman, qa chi, mi'n txi kyq'o'ne amb'il te tu'n kykub' sb'u'ne tu'n. Baqa o che klet qe txqantl tnam kyu'n qe kydios tuj tq'ab' rey te Asiria.
19¿Jatum ate' qe kydios aj Sefarvaim? Baqa o klet tnam Samaria kyu'n tuj tq'ab' rey te Asiria.
20¿Alkyetzun kyxol kykyaqil qe dios ate' kyuj tnam lu ma che klet qe tnam kyu'n tuj tq'ab' rey te Asiria? ¿Tiqu'n in kub' kyximane qa jaku klet tnam Jerusalén tu'n Kydiose? Chi ju xjal ma' toklen kyxol aj Asiria.
21Minti' e q'ajt qe xjal ex minti' jun yol xi kytzaq'we'n, tu'nju otoq txi q'ma'n kye tu'n rey Ezequías tu'n mi'n t-xi kytzaq'we'n jun yol.
22Tzajtzun tb'is Eliacim aju mayordom tuj tja rey, tuk'ix Sebna aju aj tz'ib'al te rey, ex tuk'ix Joa aju xjal mas ma' toklen ttxlaj rey, el kysb'it'un kyxb'alun ex e je'x tx'olb'alte jlu te Ezequías ti'j ju otoq tma ju xjal ma' toklen kyxol aj Asiria.
Who We AreWhat We EelieveWhat We Do
2025 by iamachristian.org,Inc All rights reserved.
