1 Samuel 4 - Mam Huehuetenango New Ortography

Xi kyi'n aj Filisteo ju kax k'ub'l tley Dios

1Tujtzun tq'ijlalil lu b'aj kychmon kyib' aj Filisteo tu'n kyq'ojin kyi'j aj Israel; tu'ntzun jlu e je'tz aj Israel q'ojlel kyi'j aj Filisteo, ex atzun e kub' ten tuj lugar Eben-ezer. Atzun kye aj Filisteo, atzun e kub' ten tuj lugar Afec,

2ex b'aj kytxolb'an kyib' tu'n kyq'ojin kyi'j aj Israel. Tej kyq'ojin, aqe aj Israel kub' kyi'j kyu'n aj Filisteo, b'alo kyaje mil aj Israel e kub' tuj q'oj.

3Tejtzun kyul meltz'aj qe soldad aj Israel tuj kycampament, kymatzun qe kytijil xjal aj Israel: ¿Tiqu'n ma taq' Qman amb'il tu'n tkub' qi'j kyu'n aj Filisteo? Qo' tuj Silo q'ilte kax k'ub'l tley Dios tu'ntzun tb'et Qman qxol, ex tu'n qklet tu'n tuj kyq'ab' qe aj q'oj qi'j.

4Xitzun kysama'n aj Israel jun k'loj sanjel tuj Silo, ex tzaj kyi'n ju kax k'ub'l tley Dios aju Tajaw Tkyaqil, aju tkub' tq'uqb'il kyib'aj qe querubín. Ajun Ofni tuk'ix Finees aqeju tky'ajal Elí q'ilte kax k'ub'l tley Dios.

5Tejtzun tpon kax k'ub'l tley Dios tuj kycampament aj Israel, e jaw sch'in tuk'il nim tzalajb'il, ex b'i'x tzaj yukch tx'otx' kyu'n.

6Tejtzun kyb'inte aj Filisteo aju tq'ajq'ajel kywi' aj Israel, kyma: ¿Ti t-xilen ju tq'ajq'ajel wib'aj in jaw kyxol aj Hebreo? Che chi. Tejtzun kyb'inte qa aju kax k'ub'l tley Dios otoq pon tuj kycampament aj Israel,

7tzaj kyxob'il ex kyma: Ma tzul Dios kyxol aj Israel. Ay b'ek'b'il qwitz, na'nx tb'ant jun maj ikju.

8Ay b'ek'b'il qwitz. ¿Alkye b'a'n tklonte qe teju Dios lu, aju at nim tipumal? Tu'n e b'aj naj qe aj Egipto tuj ju lugar tzqij tx'otx' tej ttzaj tq'o'n tkyaqil txkaj k'ixb'isab'l kyi'j.

9Kyb'incham kytene ex tenx kyipumale, aqeye soldad aj Filisteo, qo q'ojin ex qo okx xinaq, tu'ntzun mi'n qok te kymajen aj Hebreo, ik tza'n kye ma che ok te qmajen, che chi.

10Tejtzun kyok tzoqpaj aj Filisteo kyi'j aj Israel, kub' kyi'j aj Israel kyu'n, ex qeju minti' e kyim e aj oq kyja. Nimxix xjal e kub' kyu'n aj Filisteo, ex kyxol qe soldad kye aj Israel aqeju in che b'et tu'n kyqan, e kub' 30 mil xinaq.

11Ax ikx xi kyi'n ju kax k'ub'l tley Dios, ex e kub' b'yo'n Ofni tuk'ix Finees, aqeju kab'e tky'ajal Elí.

12Attoq jun soldad tiyjil Benjamín o kolpaj tuj q'oj, ex xi qelan tu'n tpon tuj Silo ax q'ij lu. Otoq b'aj t-sb'it'un t-xb'alun ex otoq jax tq'o'n tx'otx' tuj twi' te jun techal ti'j tb'is.

13Tejtzun tpon ju xinaq lu, lu te Elí q'uqltoq twi' jun siy in xq'uqin ttzi b'e, tu'nju in b'ajtoq tk'u'j ti'j kax k'ub'l tley Dios. Tejtzun tokx ju xinaq tuj tnam ex tej t-xi tma'n tqanil ti'j q'oj, kykyaqil qeju ate'toq tuj tnam e jaw sch'in tu'n kyxob'il.

14Tejtzun tb'inte Elí tq'ajq'ajel kywi' xjal, xi tqanin:

—¿Tiqu'n ma che jaw tilj xjal?

Atzunte xinaq ok tilil tu'n tu'n tpon tqanil tuk'il Elí.

15Otoq japun Elí twi' 98 ab'q'i ex jumajx otoq che moẍix qe tb'aq' twitz.

16Xitzun tma'n xinaq te Elí:

—Tzajnix qine jatum nno'k q'oj ex ja'lo ma chin kolpaje tuj q'oj.

Atzunte Elí tma:

—¿Ti ma b'aj, nky'ajal?

17—Qe aj Israel ma che el oq kywitz aj Filisteo, ax ikx nim xjal ma che kub', ex ma che kub' qe kab'e tky'ajala Ofni tuk'ix Finees, ex aju kax k'ub'l tley Dios ma txi kyi'n aj Filisteo, chi ju sanjel.

18Tejtzun t-xi tma'n ju sanjel tqanil ti'j kax k'ub'l tley Dios, aj pak'txaj Elí twi t-siy ttxlaj ttzi ja, ex tu'nju otoq tijin ex altoq, b'i'x toqj ti'j tqul ex b'i'x kyim. 40 ab'q'i otoq ten te nejenel kye aj Israel.

19Aju tlib' Elí, t-xu'jil Finees yab' xjaltoq ta', ch'ixtoq tpon tq'ijlalil tu'n tul itz'j tal; tejtzun tb'inte tqanil qa otoq txi q'i'n ju kax k'ub'l tley Dios ex otoq kyim ju tlib' tuk'ix tchmil, tzajtzun ta'w tyab'il, jaw t-xqu'tz'in tib' ex ul itz'j tal.

20Tejtzun kyke'yinte qe xu'j in che ajb'en te ya ch'ixtoq tkyim, kymatzun: Mi'n xob'a porke ma tzul itz'j jun tala xinaq, che chi. Atzun te minti' xi ttzaq'we'n ex minti' xi tq'o'n twi' ti'j.

21-22Ex Icabod tb'i tal ne' ok tq'o'n ex tma: Ma tz'el q'i'n tajwalil Dios kyxol aj Israel tu'nju ma txi q'i'n kax k'ub'l tley Dios, chi xu'j. Tma ju yol lu tu'nju otoq txi q'i'n kax, ex tu'nju otoq kyim tlib' tuk'ix tchmil.