Romanos 1 - Mam Huehuetenango New Ortography

Jun q'olb'eb'l tu'n Pablo kye okslal tuj Roma

1Aqine Pablo, majen qine te Jesucrist, txko'maj qine tu'n Dios tu'n woke apostol, ex pa'nmaj qine tu'n te pakb'alte tqanil kolb'il aju ma tzaj tq'o'n Dios.

2Aju tqanil lu tzaj ttziyan atxix ojtxi kyu'n qe t-sanjel ex in tma'n kyuj qe xjan Tu'jil.

3Aju tqanil kolb'il lu in yolin ti'j Tk'wa'l Dios, aju Qajaw Jesucrist; ok Jesucrist te xjal tej tul itz'j ti'j tiyjil David.

4Ex el chik'e' tu'n tipumal Dios qa Tk'wa'l Dioste. Ate Xewb'aj Xjan tzaj chik'b'ante tej tjatz anq'in Jesús kyxol kyimni.

5Ex noq tu'n Jesucrist ma nk'ame jun xtalb'il ex ma tzaj tq'o'n woklene tu'n woke te apostol, tu'ntzun t-xi kyniman xjal tyol Jesucrist ex tu'n kyokslan ti'j kyuj kykyaqil nasyon, tu'ntzun tnimanjtz aju tb'i.

6Ax ikx kyeye ate'ye kyxol qe jlu, ex o che txkonjtze tu'n kyoke tuj tkwent Jesucrist.

7In xi ntz'ib'ane kyeye kykyaqile aqeye ate'ye tuj tnam Roma, k'ujla'n qeye tu'n Dios, ex ma che txkonjtze tu'n kyoke o'kx te Dios. Awt Qman Dios tuk'ix Qajaw Jesucrist che tzaj q'onte xtalb'il kyeye ex tu'n tqe'xix kyk'u'je.

Tajb'il apostol Pablo tu'n t-xi' ke'yil kye okslal tuj Roma

8Tnejelxix in xi nq'o'ne chjonte te Dios aju in chin ajb'ene te, in xi nq'o'ne chjonte kyi'je kykyaqile noq tu'n Jesucrist, porke tuj tkyaqil twitz tx'otx' ma tz'el tqanil kyokslab'le.

9Porke in chin ajb'ene te Dios tu'n tkyaqil wanmiye, in chin pakb'ane tqanil b'a'n in yolin ti'j Tk'wa'l, ex ax Dios testiw wi'je qa kukx in che tzaj nna'ne tuj nna'j Diose.

10In chin kub'sane twitz Dios alkye jun tumel tu'n npone kyuk'ile, b'a'nwt npone qa ik tajb'il Dios.

11Porke wajb'ile tu'n tok nke'yine kywitze, tu'n t-xi nq'o'ne jun onb'il kyeye tuj kyokslab'le, tu'ntzun kywe'xixe.

12Kyja'tzun ok npone kyuk'ile, kb'ajel qkyuwsan qib' qxolx noq tu'n qokslab'l, tu'n kyokslab'le ex tu'n wokslab'le.

13Erman waje tu'n kyb'inteye, nimku maj o wajb'eye tu'n nxi'ye ke'yil kyeye ex minti' in ten amb'il tu'nju at nim waq'une, o wajb'eye tu'n nxi'ye aq'nal kyxole tu'n kyokslan txqantl xjal, ik tza'n o b'ant wu'ne kyuj txqantl nasyon kyxol xjal mya judiy qe.

14In nna'ne qa il ti'j tu'n t-xi nma'ne tqanil b'a'n kye kykyaqil xjal: kye xjal griego ex kye xjal mya griego qe, kye xjal aj nab'l ex kye xjal mya aj nab'l.

15Kyja'tzun, ik tza'n weye, ma kub' nximane tuj wanmiye tu'n t-xi nma'ne tqanil kolb'il ax ikx te kyeye aqeye ate' tuj tnam Roma.

Aju tipumal tqanil b'a'n

16Mlay chin ch'ixwiye tu'n t-xi nma'ne tqanil b'a'n aju evangelio, porke tipumal Dioste tu'n kyklet kykyaqil xjal aqeju ma che okslan, tnejelxix kye xjal judiy ax ikx kye xjal mya judiy qe.

17Porke tu'n tqanil b'a'n in yek'unjtz tza'n tten tu'n qok te tz'aqlxix tu'n Dios; noq o'kx tu'n qokslab'l tu'n qok te tz'aqlxix ik tza'n in tma'n tuj Tu'jil: Aju xjal tz'aqlxix, tu'n tokslab'l k'anq'il.

Kykyaqil xjal at kyil

18Porke max tuj kya'j in tzaj tq'o'n Dios castiw kyib'aj xjal minti' tchi Dios tuj kywitz ex b'inchal mya b'a'n qe, tu'nju kyb'inchb'en mya b'a'n maqo'n kyu'n aju yol ax tok.

19Kykyaqil xjal jaku tz'el kynik' ti'j qa at Dios, porke o tzaj tyek'un Dios kye.

20Maske minti' q'ancha'l te Dios, pero jaku tz'el qnik' ti'j qa ma qo kub' ten ximal ti'j tkyaqilju o tb'incha. Kyja'tzun, chik'lxix ta', atxix tej tb'ant twitz tx'otx' nne'l qnik' ti'j qa at Dios ex aju tipumal minti' b'ajsb'il te. Kyja'tzun minti' kykolb'il kyib' xjal tu'nju minti' in che niman te Dios.

21Maske el kynik' ti'j Dios, pero minti' jaw kynimsa'n tb'i, ik tza'n mya Dioste tuj kywitz; ex minti' xi kyq'o'n chjonte te; noq o'kx kub' kyximan aju noqx gan, ex e ok minti' kynab'l, ex aju kyanmi tuj qlolj ta'.

22Ok kyq'on kyib' te aj nab'l, pero e ok minti' kynab'l.

23Kyaj kykolin tu'n kyk'ulun twitz ju Dios ma'xix toklen ex mlay naj, ex e k'ulun twitz tilb'ilal xjal aju knajel ex twitz kyilb'ilal chyu'j, ex twitz kyilb'ilal jil kyaje kyqan, ex twitz kyilb'ilal lob'aj.

24Tu'ntzunju, e je'x ttzoqpi'n Dios tu'n kyb'inchante mya b'a'n, tu'n tb'aj kytz'ilsan kyib' ik tza'nx tajb'il kyanmi; kyja'tzun kub' kyq'o'n tch'ixwi kyximlal kyxolx.

25Kyaj kyq'o'n aju tyol Dios axix tok ex xi kyniman aju nik'aj yol, e k'ulun kywitz qe tch'isb'en Dios ex e ajb'en kye; minti' e k'ulun twitz Dios aju b'inchalte tkyaqil, aju b'a'n tu'n tnimanjtz tb'i te jumajx. Ikxwitju.

26Tu'ntzunju, e je'x ttzoqpi'n Dios tu'n kyb'inchante aju tajb'il kychib'jal elni ti'j kwent; qe xu'j kyaj kyq'o'n kymojb'ab'l kyib' tuk'il kychmil, ex kyb'incha aju mya q'o'n kye xjal tu'n kyb'inchante.

27Ax ikx kyb'incha xinaq, kyaj kyq'o'n kymojb'ab'l kyib' tuk'il kyxu'jil, pon tk'u'j jun ti'j juntl, ex kyb'incha kyxolx aju ch'ixb'ajil tb'inx, e yaẍin xinaq tuk'il juntl xinaq, kyja'tzun kub' tq'o'n Dios kycastiw tu'nju otoq che el tzpet.

28Ex tu'nju minti' kub' tuj kywitz tu'n t-xi kyniman Dios, axte Dios kyaj q'onte kye tu'n tel tzpet kynab'l tu'n kyb'inchante aju mya tuj tumel.

29Nojni tuj kyanmi tu'n tkyaqil mya b'a'n,, nimku mya b'a'n in kyb'incha'n, in pon kyk'u'j ti'j nimku, mya b'a'n qe, at tlo'ch kyk'u'j kyi'j xjal, b'yol xjal qe, jawni che q'ojin, sb'ul qe, kukx in che yolin kyi'j kyuk'il qa mya b'a'n qe, ẍtaq'il yol qe,

30si'mil yol qe, ik'un Dios kyu'n, yasul qe, jawni qe, in jaw kyniman kyib', o'kx in che ximan ti'j alkye txqantl mya b'a'n tu'n tb'ant kyu'n, mib'an che niman te kyman,

31minti' kynab'l, minti' in japun kyyol kyu'n, minti' kyk'ujlalil kyi'j xjal, kyk'i' kub' kynajsa'n til juntl, minti' tq'aq'b'il kyk'u'j ti'j juntl.

32Maske b'a'n tley Dios kyu'n jatum in tma'n qa il ti'j tu'n kykyim kykyaqil qeju in che b'inchante tkyaqil jlu, mya noq o'kx in kyb'incha'n tkyaqil mya b'a'n, ax ikx in che tzalaj kyi'j txqantl xjal in che b'inchante mya b'a'n.