Santiago 1 - Mam Huehuetenango New Ortography

Jun q'olb'eb'l tu'n Santiago

1Aqine Santiago, tmajen Dios qine ex tmajen Qajaw Jesucrist; in xi nq'o'ne jun q'olb'eb'l kyeye, aqeye tiyjil Israel, kab'laj k'loj kyb'ete, kysipan kyib'e tuj tkyaqil twitz tx'otx'.

Tu'n Dios in tzaj tq'o'n qnab'l

2Aqeye wermaniye, qa ma tzaj junxilchaq joyb'il kyi'je, tz'okwit te nim tzalajb'il kyeye.

3Porke b'a'n kyu'ne, qa ma che malonjtze tuj kyokslab'le, ktel mastl kypasense tu'n tik'x kyu'ne.

4Tz'ok tililx kyu'ne tu'n tten kypasense cabalxix, tu'n tok kynab'le ex tu'n kytene minti' kypaltile, ex minti' jun atx taj kyeye.

5Qa at jun kyxole atx taj tnab'l, qaninx tnab'l te Dios, ex ktzajel tq'o'n Dios tnab'l; porke ate Dios nimxix in tzaj tq'o'n kye kykyaqil ex minti' in ilin.

6Pero qe'xix tk'u'j xjal ti'j Dios ok t-xi tqanin, ex mi'n jawje' tk'u'j; porke aju xjal minti' in qe' tk'u'j ti'j Dios, ik tten ik tza'n twitz mar in yukch tu'n kyq'iq' ex in xtulq'in.

7Qa at jun xjal minti' in qe' tk'u'j ti'j Dios, tz'elx tnik' ti'j, minti' jun ti'xti ktzajel q'o'n te tu'n Qajaw.

8Jun xjal kab'e tk'u'j mya segur ta' tuj tkyaqil tb'e.

9Aju erman tal yaj, tzalajx tu'nju kjawil nimsa'n tu'n Dios;

10ex aju q'inun, tzalajx ti'j tu'n tok te ch'in; porke knajel te q'inun ik tza'n t-xmakal k'ul.

11Porke ok tja'wil q'ij tuk'ix nim tkyaqal, b'i'x in tzqij k'ul ex nne'l tz'aq t-xmakal, aju ke'yin tb'anilxix, knajel. Ikxtzun te q'inunju, kukx tok tilil tu'n ti'j tnegosyo, ex ok knajel.

In tzaj yajb'il qe ex joyb'il qi'j

12At tzalajb'il teju xjal qa ma tzik'x tu'n ok tok tuj joyb'il ti'j; porke qa ma tzik'x tu'n, ok tk'ma' jun oyaj tu'n tten tchwinqlal, aju tzaj tma'n Dios tu'n ttzaj tq'o'n kye qeju in che k'ujlan te.

13Qa at jun xjal ma tz'ok tuj joyb'il ti'j tu'n tb'inchante aju mya b'a'n, mi'n tma qa tu'n Dios ma tz'ok tuj joyb'il ti'j; porke mlay b'ant tu'n tok Dios tuj joyb'il ti'j tu'n tb'inchante aju mya b'a'n, ex mi jun nno'k tuj joyb'il ti'j tu'n Dios.

14Ex teyle junjun nno'k tuj joyb'il ti'j, ax tnab'l in xmoxin te tu'n tpon tk'u'j ti'j ju mya b'a'n, ax tnab'l in sb'unte te.

15Nej in pon tk'u'j ti'j ju mya b'a'n; oktzun tch'iy ju mya b'a'n tuj tanmi, in tb'incha'n il, oktzun tch'iy il, in tzajtzun kamik tu'n il.

16Aqeye erman at nk'u'je kyi'je, mi'n che tzpete ti'j jlu.

17Tkyaqil oyaj b'a'n ex tkyaqil oyaj tb'anilxix, atzun in ku'tz tuj kya'j, atzun in tzaj tuk'il Dios aju b'inchal kye spik'un ate' twitz kya'j. Minti' in tch'expu'n Dios tnab'l, ex mya ik tten Dios ik tza'n jun xlekun in b'et.

18Tu'nxju tajb'il ma qo ok te tk'wa'l noq tu'n tyol axix tok, tu'ntzun qok tnejel okslal kyxol qe tch'isb'en, ik tza'n tnejel twitz awal.

Aju qokslab'l axix tok

19Kyja'tzun erman aqeye at nk'u'je kyi'je, kykyaqile b'a'n tu'n t-xi kyb'i'n naje ju yol, pero mya jurat naj tu'n kyyoline, ex mya jurat naj tu'n kyjaw kyaqpaje.

20Porke aju xjal jurat in jaw q'ojl, minti' in tb'incha'n aju tz'aqlxix tuj twitz Dios.

21Kyja'tzun, kyq'onkje tkyaqil ttz'ilil tuk'ix ju mya b'a'n ma chmet-xix, ex che oke mans, tu'n kyk'monteye ju yol ma ku'x awa'n tuj kyanmiye; porke at tipumal ju yol lu tu'n tklet kyanmiye.

22Kynimanxe ju yol, ex mya noq o'kx tu'n kyb'inteye, porke qa o'kx in xi kyb'i'ne ex minti' in japun kyu'ne, in kysb'un kyib'e.

23Qa at jun o'kx in xi tb'i'n ju yol ex minti' in japun tu'n, ik tten ik tza'n jun xjal nno'kx tke'yin twitz tuj jun respej.

24Porke ok tb'aj tke'yin twitz in xi'tzun, ex b'i'x nnik' tna'l tu'n tza'n ke'yin.

25Atzun teju in ku'x tke'yinxix tuj ley tz'aqlxix, aju ley at tzoqpib'l tu'n, ex kukx in ku'x tke'yin, ex minti' nnik' tna'l tu'n aju in tb'i'n, noq o'kx in japun tu'n, atzunte jlu at tzalajb'il te ti'j ju in tb'incha'n.

26Qa at jun kyxole tuj tnab'l qa in niman Dios, pero qa minti' in ajtz tjak'u'n ti'j ttzi', in kub' t-sb'un tib', ex aju tokslab'l noqx gan.

27Aju ajb'eb'l twitz Qman Dios saqxix ex minti' tpaltil, atzun jlu: tu'n qonin kyi'j k'wa'l minti' kyman ex kyi'j meb'a xu'j tuj yajb'il kye, ex tu'n tok qkwentin qib' tu'n mi'n qtz'ilix kyxol xjal.