Éxodo 22 - Mam Huehuetenango New Ortography

Qe ley tu'n taj t-xel aju otoq naj

1Qa at jun xjal ma txi elq'ante jun wakẍ ex qa jun ẍne'l, ex qa ma kub' tb'yo'n ex qa ma txi tk'ayin, il ti'j tu'n taj tq'o'n jwe' wakẍ te t-xel wakẍ, ex kyaje ẍne'l te t-xel ẍne'l.

2Qa ma knet jun eleq' matoq in elq'a'n tuj ja, qa ma b'aj k'ixb'isa'n ex qa ma kyim, aju otoq b'aj k'ixb'isante te, minti' til ti'j tkyimlen xjal lu.

3Qatzun q'ijl ma knet ex ma kub' b'yo'n, attzun til aju xjal otoq kub' b'yonte te.

Aju xjal otoq tz'elq'a'n, k'ajel tq'o'n t-xel aju otoq tz'etz telq'a'n. Qatzun minti' tumel tu'n taj tq'o'n t-xel, kxe'ltzun k'ayit tu'n tchjet aju otoq tz'etz telq'a'n.

4Qa itz'x alumaj ok tknet tuj tkwent eleq', qa wakẍ, qa bur ex qa ẍne'l, kxe'ltzun tchjo'n kab' maj.

5Qa at jun xjal ma che'x ttzoqpi'n talun ex qa ma che okx tzoqpaj tuj tawal juntl xjal ex qa kyxol tqan uva, kxe'ltzun tq'o'n aju awal mas tb'anil in tzaj tuj tkojb'il, ex qa aju mas tb'anil in tzaj kyq'o'n tqan t-uva te t-xel aju otoq naj kyu'n qe talun.

6Qa minab'en ma txi' q'aq', qa ma txi k'ant kyxol tqan ch'i'x, ex qa ma tz'e'y triw tu'n q'aq' lu, qa aju otoq tz'ok chmo'n ex qa aju toktoq ti'j tqan, ex qa tkyaqil kojb'il, aju xjal otoq kyaj q'onte q'aq' kxel tchjo'n aju otoq tz'e'y.

7Qa ma kyaj toqxenan jun xjal tpwaq te juntl, ex qa jun ti'xti wi'yilxix, ex qa ma tz'etz elq'a'n jlu tuj tja, qa ma knet eleq', kxe'ltzun tchjo'n eleq' kab' maj.

8Qatzun minti' ma knet eleq', kxe'ltzun tajwil ja kywitz jwes tu'n tel nik'b'aj ti'j qa otoq tz'ok tq'o'n tq'ab' ti'j aju otoq kyaj oqxenan tuk'il.

9Qa at jun xjal ma tz'el tetzan jun wakẍ, jun bur, jun ẍne'l, jun xb'alun, ex qa juntl ti'xti otoq kub' naj, ex qa chi juntl kyja': Weye jlu; che xe'ltzun kykab'il kywitz jwes, ex aju kjawil tz'aq tuj til kyu'n jwes kxel tchjo'n kab' maj te tuk'il.

10Qa at jun ma txi toqxenan tbur te tuk'il, ex qa twakẍ ex qa t-ẍne'l ex qa noq alkyex juntl alumaj; qa ma k'ixb'i, qa ma kyim ex qa ma txi q'i'n mi a'l jun otoq ke'yinte te,

11aju xjal otoq tk'am oqxenaj kxel tma'n te tajwil jun yol axix tok tuj tb'i Qman, qa minti' otoq tz'ok tq'o'n tq'ab' ti'j toqxenaj tuk'il. Kxe'ltzun tniman tajwil alumaj aju tyol; atzun te mi'n chojin ti'j.

12Qatzun in ke'yin ti'j ok t-xi elq'a'n alumaj, kxe'ltzun tchjo'n te tajwil.

13Qatzun tu'n jun txkup te tjaq' k'ul otoq b'aj paẍu'n alumaj, kxe'ltzun ti'n ttx'aqan alumaj otoq kyim te jun yek'b'il te tajwil, ex mi'n chojin ti'j.

14Qa at jun ma txi majnante jun tchej tuk'il, ex qa ma k'ixb'i ex qa ma kyim akux mi a'ltoq tajwil, kxe'ltzun tchjo'n majnalte jte' twi chej.

15Qatzun attoq tajwil tej tkyim chej, mi'ntzun txi tchjo'n xjal; qa majna'n otoq tzaj alumaj, o'kxtzun majnib'l te kchjetel tu'n.

Qe ley tu'n kyajb'en kyxol xjal

16Qa at jun ma kub' sb'unte jun q'apoj mya tq'o'n tyol tuk'il juntl xinaq, ex qa ma kub' tan tuk'il, kxe'ltzun tq'o'n twi q'apoj, ex kjawil t-xu'jla'n.

17Qatzun tk'i' tman q'apoj txi tq'o'n tme'jel tu'n tok te t-xu'jil xinaq lu, kxe'ltzun tq'o'n xinaq twi q'apoj te mamb'aj, ik tza'n kywi q'apoj na'nx kylonte xinaq.

18Qa at jun xu'j b'a'n ky'a'n, mi'n kyaq'e amb'il te tu'n kukx tanq'in.

19Qa at jun xjal ma yaẍin tuk'il jun alumaj, il ti'j kb'el b'yet.

20Qa at jun ma txi q'onte chojb'il te junxitl dios ex mya te weye, aqine Kymane, il ti'j kb'el b'yet.

21Mi'n kyb'inchaye mya b'a'n kyi'j qe stranjer xjal ex mi'n che b'aj kyyajla'ne, porke ikx kyeye e tene te stranjer xjal tuj Egipto.

22Mi'n b'aj kyyajla'ne qe meb'a xu'j mi qe k'wa'l minti' kyman ex kytxu'.

23Qatzun ma che b'aj kyyajla'ne, ex qa ma che ok ten qanil onb'il weye, ax tok ktzajel nb'i'ne tq'ajq'ajel kywi';

24ktzajeltzun ntx'u'jile kyi'je, ex che b'el nb'yo'ne tu'n spad. Che kyjel kyxu'jile meb'a, ikx qe kyk'wa'le.

25Qa at jun ma txi q'onte pwaq te tch'ex jun xjal meb'a, aju ax najl kyxol qe xjal etzan wu'ne, mi'n tb'incha ti'j ik tza'n in tb'incha'n jun q'ol ch'ex, ex mi'n tz'el tqanin ta'l tpwaq.

26Qa at jun ma tz'el q'inte t-xb'alun tuk'il te prent ti'j tch'ex, k'ajel tq'o'n xb'alun lu ok tex q'ij,

27tu'nju o'kx xb'alun lu in ajb'en te txayb'il te. Qa minti' ma tz'aj tq'o'n, ¿titzun k'ajb'el tu'n ok ttan? Oktzun ttzaj tqanin onb'il weye, ktzajel nb'i'ne tq'ajq'ajel twi' tu'nju at tq'aq'b'il nk'u'je.

28Mi'n che yoline mya b'a'n ti'j Dios, ex mi'n tzaj kyqanine mya b'a'n tib'aj ju tok te kawil tuj kytanmiye.

29Mya yajxi ktzajel kyq'o'ne tnejel twitz kyawale weye, tuk'ix ta'l twitz uva.

Che tzajel kyq'o'ne qe tnejel kyky'ajale te weye.

30Ax ikx qe tnejel kyal kywakẍe ex qe tnejel kyal kyẍne'le; wuq q'ij che tel kyuk'il kytxu', ex tuj twajxaqin q'ij kyul-len itz'j, che tzajel kyq'o'ne weye.

31Che okele xjan te weye. Mi'n txi kychyo'ne kychib'jal alumaj otoq che b'aj kypaẍu'n txkup tuj kojb'il; kyq'onxe jlu kye tx'yan.